શૂન્યતામાં પાનખર ફરતી રહી
May 19
ગઝલ Comments Off on શૂન્યતામાં પાનખર ફરતી રહી
શૂન્યતામાં પાનખર ફરતી રહી
પાંદડીઓ આભથી ખરતી રહી
ને પવન નું વસ્ત્ર ભીનું થઇ ગયું
ચાંદનીની આંખ નીતરતી રહી
સૂર્ય સંકોચાઈને સપનું બન્યો
કે વિરહની રાત વિસ્તરતી રહી
મૌનની ભીનાશને માણ્યા કરી
જુલ્ફમાં બસ અંગુલિ ફરતી રહી
હું સમયની રેત માં ડૂબી ગયો
મૃગજળે મારી તૃષા તરતી રહી
તેજ ઊંડાણોમાં ખળભળતું રહ્યું
કામનાઓ આંખમાં ઠરતી રહી
આપણો સંબંધ તો અટકી ગયો
ને સ્મૃતિની વેલ પાંગરતી રહી
આ બધા લાચાર થઇ જોતા રહ્યા
હાથમાંથી જિંદગી સરતી રહી
– આદિલ મન્સૂરી
સ્વર: શ્રુતિ વૃંદ
સ્વરાંકન: ગૌરાંગ વ્યાસ