ગુજરાતી સાહિત્ય

જાશું   જઈને   કાળની     ગરદન    ઝુકાવશું,
સંસાર   પરથી   જુલ્મની   હસ્તી   મિટાવશું.

જવાળાઓ   ઠારશું       ને   ફૂલો   ખિલાવશું,
જગને   અમારા   પ્રેમનો   પરચો     બતાવશું.

કમજોરથી    અમે   નથી   કરતા   મુકાબલો;
કોણે   કહ્યું   કે   ‘મોતથી    પંજો     લડાવશું ?’

મૃગજળને   પી જશું  અમે  ઘોળીને  એક  દી,
રણને   અમારી  પ્યાસનું   પાણી    બતાવશું.

ચાલે છે ક્યાં  વિરોધ  વિના  કોઈ  કારભાર ?
ભરશું  જો   ફૂલછાબ  તો  કાંટા  ય  લાવશું !

ડૂબેલ માની   અમને    ભલે   બુદબુદા   હસે,
સાગર   ઉલેચશું   અને     મોતી     લુંટાવશું.

આખી  સભાને   સાથમાં  લેતા  જશું   અમે;
અમને  ઉઠાડશો    તો   કયામત   ઊઠાવશું.

બળશે નહીં  શમા તો જલાવીશું  તનબદન !
જગમાં અખંડ જ્યોતનો  મહિમા નિભાવશું.

માથા  ફરેલ   શૂન્યના   ચેલા   છીએ    અમે,
જ્યાં  ધૂન  થઈ   સવાર  ત્યાં  સૃષ્ટિ રચાવશું.

― શૂન્ય પાલનપુરી

સ્વર : ડો. પાર્થ ઓઝા
સ્વરાંકન : સંજય ઓઝા