અમને કોની રે સગાયું
May 22
ગીત Comments Off on અમને કોની રે સગાયું
અમને કોની રે સગાયું આજ સાંભરે
ઊંડે તળિયાં તૂટે ને સમદર ઊમટે
કોઈ પાળ્યું રે બંધાવો ઘાટે ઘોડા દોડાવો
આઘે લેર્યુંને આંબી કોણ ઊઘડે
અમને કોની રે સગાયું આજ સાંભરે
આજ ખોંખારા ઊગે રે સૂની શેરીએ
ચલમ તણખા ઊડે રે જૂની ધૂણીએ
અમને દાદા દેખાય પેલી ડેલીએ…. અમને
માડી વાતું રે વાવે આ ઉજ્જડ ઓટલે
ખરતાં હાલરડાં ઝૂરે રે અધ્ધર ટોડલે
ઊંચે મોભને મારગ કોણ ઊતરે ….. અમને
કોઈ કૂવા રે ગોડાવો, કાંઠે બાગો રોપાવો,
આછા ઓરડીયા લીંપાવો ઝીણી ખજલિયું પડાવો
આજે પરસાળ્યું ઢાળી સૌને પોંખીએ..
અમને સાચી રે સગાયું પાછી સાંભરે
-દલપત પઢિયાર
સ્વર: અમર ભટ્ટ
સ્વરાંકન : અમર ભટ્ટ