ભોળી રે ભરવાડણ
Jun 16
ગીત Comments Off on ભોળી રે ભરવાડણ
ભોળી રે ભરવાડણ હરિને વેચવા ચાલી;
સોળ સહસ્ત્ર ગોપીનો વાહાલો, મટુકીમાં ઘાલી. ભોળી રે….
અનાથના નાથને વેચે આહીરની નારી;
શેરીએ-શેરીએ સાદ પાડે : લ્યો કોઈ મોરારિ. ભોળી રે…
મટુકી ઉતારી, માંહે મોરલી વાગી;
વ્રજનારીને મુખ જોતાં મૂરછા લાગી. ભોળી રે….
બ્રહ્માદિક ઇન્દ્રાદિક સરખા કૌતક એ પેખે;
ચૌદ લોકના નાથને કાંઈ મટુકીમાં દેખે. ભોળી રે…
ગોવાલણીના ભાગ્યે પ્રગટ્યા અંતરજામી;
દાસલડાંને લાડ લડાવે નરસૈંનો સ્વામી. ભોળી રે….
– નરસિંહ મહેતા
સ્વર: હેમા દેસાઇ
સંગીત : આશિત દેસાઈ