તમે શ્યામ થઈને

No Comments

 

 

તમે શ્યામ થઈને ફૂંકો, મને   વાંસળી    બનાવો
પછી આભ થઈને વ્યાપો, મને વાદળી  બનાવો

ભલે   અંગથી   છૂટીશું   પણ  સંગ   યાદ   રહેશે
તમે  સાપ-રૂપ  લો   તો   મને  કાંચળી  બનાવો

તમે  પર્વતો  ઊઠાવો  કે  પછી કોઈ રથ બચાવો
મને ભાર  કંઈ  ન  લાગે  મને  આંગળી  બનાવો

તમે આંખમાં   વસો છો અને શ્વાસમાં શ્વસો છો
અમે  તોય  તમને  જોશું  ભલે  આંધળી બનાવો

– દિલીપ રાવળ

સ્વર : રૂપકુમાર રાઠોડ

જીવન-મરણ છે એક બહુ ભાગ્યવંત છું

No Comments

 

 

જીવન-મરણ   છે  એક  બહુ  ભાગ્યવંત છું,
તારી   ઉપર   મરું છું   હું   તેથી જીવંત  છું.

ખૂશ્બૂ હજી છે બાકી  જો સૂંઘી   શકો  મને
હું     પાનખર   નથી-હું   વીતેલી  વસંત છું.

હદથી વધી જઈશ તો તરત જ મટી જઈશ,
બિંદુની   મધ્યમાં     છું-હું  તેથી અનંત   છું.

બન્ને દશામાં શોભું  છું – ઝુલ્ફોની   જેમ  હું
વીખરાયેલો   કદી   છું,   કદી   તંતોતંત   છું.

મારા    પ્રયાસ   અંગે, ન આપો સમજ મને,
બુધ્ધિનો જેે માં ભાગ   નથી એવો   ખંત છું

રસ્તે   પલાંઠી વાળીને  -બે ઠો છું. હું ‘મરીઝ’
ને આમ   જોઈએ તો    ન  સાધુ   ન   સંત

– મરીઝ

બસ એટલી સમજ મને પરવરદિગાર દે

No Comments

 

 

બસ   એટલી   સમજ   મને પરવરદિગાર દે,
સુખ    જ્યારે જ્યાં  મળે, બધાના વિચાર દે.

માની   લીધું   કે  પ્રેમની  કોઈ     દવા  નથી,
જીવનના   દર્દની   તો    કોઈ   સારવાર   દે.

ચાહ્યું   બીજું   બધું  તે   ખુદાએ   મને દીધું,
એ   શું   કે   તારા   માટે   ફક્ત ઈન્તજાર દે.

આવીને    આંગળીમાં    ટકોરા   રહી ગયા,
સંકોચ   આટલો  ન  કોઈ   બંધ   દ્વાર   દે.

પીઠામાં   મારું  માન  સતત  હાજરીથી  છે
મસ્જિદમાં રોજ જાઉં તો કોણ આવકાર દે !

નવરાશ  છે   હવે   જરા   સરખામણી કરું,
કેવો  હતો   અસલ   હું, મને  એ  ચિતાર દે.

તે  બાદ  માંગ  મારી     બધીયે    સ્વતંત્રતા,
પહેલાં  જરાક   તારી   ઉપર. ઈખ્તિયાર  દે.

આ   નાનાં-નાનાં   દર્દ તો થાતાં નથી સહન,
દે    એક   મહાન. દર્દ   અને  પારાવાર    દે.

સૌ પથ્થરોના બોજ  તો ઊંચકી લીધા અમે,
અમનેે. નમાવવા   હો  તો  ફૂલોનો   ભાર  દે.

દુનિયામા   કંઇકનો   હું કરજદાર છું ‘મરીઝ’,
ચૂકવું   બધાનું   દેણ   જો અલ્લાહ ઉધાર દે.

– મરીઝ

સ્વર : પુરુષોત્તમ ઉપાધ્યાય

પાનખરની શુષ્ક્તા

No Comments

 

 

પાનખરની   શુષ્ક્તા  પથરાય   આસપાસ
પાંપણે તારું સ્મરણ. છલકાય  આસપાસ

સ્વપ્નમાં   ચીતરી   રહું  લીલાશને   હજી
ત્યાં ખરે તુજ નામના ટહુકાઓ આસપાસ

છાલકો    પગરવ   તણી વાગે છે ક્યારની
ધારણા  રેતી  બની   પથરાય   આસપાસ

દર્પણો      ફૂટી   ગયા     સંબંધનાં    હવે
ને  પછી  ચેહેરા  બધા  તરડાય આસપાસ

પાનખરની  શુષ્ક્તા   પથરાય.ય આસપાસ
પાંપણે  તારું  સ્મરણ છલકાય આસપાસ

– વિહાર મજમુદાર

સ્વર :ગાર્ગી વોરા

ટોચ પર છો ના ચડાયું!

No Comments

આસ્વાદ

 

 

ટોચ   પર   છો ના ચડાયું!
સુખ     તળેટીમાં   સમાયું.

દોસ્ત, તારું વ્હાલ પણ કાં
આજ    લાગે   ઓરમાયું?

લાગણી  સામું   જુએ   છે,
જાણે  બાળક  હો  નમાયું!

સૂર્ય   સામે    શબ્દ    મૂકો,
તેજ    નીકળશે     સવાયું!

આ  કવિતા  છે  બીજું  શું?
એકલો           વિચારવાયુ.

જિંદગીની         ભરબજારે
શ્વાસનું   ખિસ્સું      કપાયું!

–  હિમલ પંડ્યા

સ્વર : ગાર્ગી વોરા

સ્વરાંકન : ડો ભરત પટેલ

આસ્વાદ : ગુણવંત ઉપાધ્યાય

ખુદાને પામવાનું નામ શ્રદ્ધા

No Comments

 

 

ખુદાને પામવાનું નામ શ્રદ્ધા
દુઆઓ માંગવાનું નામ શ્રદ્ધા

ધીરજની ગાંસડી માથે મૂકીને,
દુઃખોને ઢાંકવાનું નામ શ્રદ્ધા.

તમે આવો નહીં ને તે છતાયે,
તમારા આવવાનું નામ શ્રદ્ધા.

સંબંધો તૂટે એનું નામ શંકા,
સંબંધો સાંધવાનું નામ શ્રદ્ધા

કવિ – દિગન્ત પરીખ

સ્વર – પુરુષોત્તમ ઉપાધ્યાય, હંસા દવે

સંગીત – પુરુષોત્તમ ઉપાધ્યાય

આંખની સામે આવી ઊભી

No Comments

 

 

આંખની સામે આવી ઊભી છોકરી ભીને વાન
ઉઘડી જાણે ઉષા રાણી ગાતી મીઠા ગાન

રાગ ભૂપાલી ઓઢણી એની
સરગમ જેવી કાય
પીલું ,કાફી ફરતે ફરતા
હોરા બની લહેરાય
રંગ ઉડે છે અંગથી એનાં આંખ બની રસખાણ

ઋતુ વાસંતી પગલાં ચૂમે
ફૂલ પસીને નહાય
ઝાકળ જેવી ઝાંઝરી એની
ફાગ બની ફોરાય
સ્વર સૂરીલા, લય લચકતા, એમાં ઉમેરી તાન

બાગ-બગીચા રાહ જૂએ છે
એની બારે માસ
વાડી વઝીફા નીચાં નયને
ઘૂમતા રહે ચોપાસ
કોણ હશે એ જેને નસીબે જયજયવંતી જાન ?

– ગુણવંત ઉપાધ્યાય

સ્વર : ડો ભરત પટેલ

સ્વરાંકન : ડો ભરત પટેલ

પાગલથી કરવો પ્યાર

No Comments

 

 

પાગલથી  કરવો  પ્યાર  તમારું ગજું નથી
જીવન   થશે  ખુવાર    તમારું ગજું નથી

તજવા   તમારા    દ્વાર તમારું ગજું નથી
તલવારની   છેે   ધાર તમારું   ગજું  નથી

એ  તો અમે તજીને  ધરા આવીએ ગગન
થવું  એ  હદની   બાર   તમારું ગજું નથી

રેવાદો   પક્ષ  લેવો   અમારો  ભલા થઈ
દુશ્મન   થશે   હજાર   તમારું ગજુ નથી

‘નાઝીર’ની જેમ હસ્તી મીટાવી નહી શકો
કરજો   નહી  કરાર   તમારું  ગજું નથી.

– નાઝિર દેખૈયા

સ્વર : ઓસમાણ મીર

ભાન હોય છે

No Comments


સૌનક પંડયા

 

 

નાદાન મનને એ બધું ક્યાં ભાન હોય  છે ?
આંસુની  પૂર્વભૂમિકા  અરમાન   હોય  છે

તેઓ સુખી છે જેમને બીજાના દુઃખ મહીં,
દુઃખી થવાનું  દોહ્યલું   વરદાન   હોય   છે

મિત્રો  જો  શત્રુ  નહિ  બને તો એ કરે શું ?
દુશ્મન  ઉપર  તમારું  વધુ ધ્યાન હોય છે

હાથે    કરીને    ગૂંચવ્યું   છે   કોકડું   તમે,
નહિતર તો જીવવું ઘણું આસાન હોય છે

ઝગડો   કરીને  થાકી ગયાં  ચંદ્ર  ને  નિશા ,
ઝાકળનાં  બુંદ  રુપે  સમાધાન  હોય   છે

– કિરણ ચૌહાણ

સ્વર : સૌનક પંડયા

સ્વરાંકન : સૌનક પંડયા

સહજ સાંભરે એક બાળા ગુણીજન

No Comments

 

 

સહજ   સાંભરે   એક   બાળા ગુણીજન
ગઝલ   ગીતની   પાઠશાળા   ગુણીજન

પ્રણયની  પઢી  પાંચ    માળા  ગુણીજન
ખુલ્યાં બંધ  દ્વારોનાં   તાળા   ગુણીજન

નહીં  છત  મળે  તો   ગમે    ત્યાં  રહીશું
ભરો કિન્તુ અહીંથી  ઉચાળા   ગુણીજન

કદી   પદ – પ્રભાતી   કદી   હાંક ,ડણકાં
ગજવતા   રહે     ગીરગાળા    ગુણીજન

પડયો   બોલ  ઝીલે,  ઢળે  થાળ  માફક
નીરખમાં ય નમણા ,  નિરાળા ગુણીજન

ધવલ    રાત્રી   જાણે    ધુમાડો   ધુમાડો
અને   અંગ  દિવસોનાં  કાળા ગુણીજન

આ મત્લા થી મક્તા સુધી  પહોંચતા તો
રચાઈ    જતી     રાગમાળા    ગુણીજન

– સંજુ વાળા

સ્વર : ઓસમાણ મીર

Older Entries Newer Entries

@Amit Trivedi