Archive for the ‘ગીત’ Category

હે કૃષ્ણ ! કૃપા વરસાવો

Saturday, February 9th, 2019

 

 

હે કૃષ્ણ ! કૃપા વરસાવો
હે કૃષ્ણ ! કૃપા વરસાવો

હૃદયે બાંધ્યા તોરણ, કહાના, આંખમાં યમુના પૂર
શ્યામનામ ગૂંજે ધબકારે, શ્વાસ વાંસળી સૂર…
કરુણાકર , કરુણા વરસાવો, મારો જીવનદીપ જગાવો…
હે કૃષ્ણ! કૃપા વરસાવો

કરમાં પહેર્યા ભક્તિકંકણ, કંઠે વૈજંતી માળ
નૂપુરે રણકે, રાધા! રાધા! મન મીરાં કરતાલ
કરુણાકર, કરુણા વરસાવો, મારે રૂદિયે રાસ રચાવો…
હે કૃષ્ણ! કુપા વરસાવો

નિકટ નિરંતર રહો નાથ, શાને દર્શનથી હું દૂર?
“હું’ને ભૂલી નિત્ય સાંભળું, તવ મુરલીના સૂર
કરુણાકર, કરુણા વરસાવો, આવો હરિ આવો…
હે કૃષ્ણ! કુપા વરસાવો

– ડો નિભા હરિભક્તિ

સ્વર : અનિકેત ખાંડેકર

થઈ શકે તો બસ ઉથલપાથલ કરો

Friday, February 8th, 2019

 

 

થઈ શકે તો બસ ઉથલપાથલ કરો, વનને વસ્તી,  શહેરને  જંગલ કરો;
હો શીદને પથ્થર    ઉપાડો છો તમે, પાંપણો ઉંચકો અને  ઘાયલ  કરો.

જ્યાં નિરંતર કોઈનો પગરવ  હશે,
ત્યાં પ્રતીક્ષાનો સતત ઉત્સવ હશે.

લાગણીની     વ્યગ્રતા   છે   ટેરવાં,   બંધ   દ્વારોની વ્યથા  છે  ટેરવાં.
શક્યતા    સબંધની    એમાં     હશે, એક   બારીની  જગા છે  ટેરવાં.
આંખમાં  ભીનાશ જે   ઉભરી હતી, એ  બધી યે  પી  ગયાં છે   ટેરવાં.
ભેદ  જ્યાં  જાણ્યો હથેળીનો   પછી  સાવ  મુંગા થઈ ગયાં  છે  ટેરવાં.

-કૈલાશ પંડિત

સ્વરઃ શેખર સેન
સ્વરાંકનઃ પુરુષોત્તમ ઉપાધ્યાય

સાંભરે પ્રથમ મિલનની રાત

Friday, February 8th, 2019

 

 

સાંભરે પ્રથમ મિલનની રાત, સાંભરે પ્રથમ મિલનની રાત
જેના તે રસ ઢળ્યાં જીવનમાં, જેના તે રસ ઢળ્યાં જીવનમાં
ઊજળાં ઊગ્યાં પ્રભાત
સાંભરે પ્રથમ મિલનની રાત, સાંભરે પ્રથમ મિલનની રાત

ના ના કરતાં, રસથી નીતરતાં, હૈયા ધીમે દબાતાં,
ના ના કરતાં, રસથી નીતરતાં, હૈયા ધીમે દબાતાં
લજ્જાની પાળો તૂટી ત્યાં રસ સાગર છલકાતાં
શીખવે સજન નવીન કોઈ વાત
સાંભરે પ્રથમ મિલનની રાત, સાંભરે પ્રથમ મિલનની રાત

અર્ધ જાગતાં, અર્ધ મીંચાતાં, લોચન નીંદ ન આવે
લોચન નીંદ ન આવે
અણજાણ્યાં અણમાણ્યાં ભાવો આવી પ્રીતમ જગાવે
આવી પ્રીતમ જગાવે
સહેવાઈ હોય એ જાણે મધુરી એ રસધાર

સાંભરે પ્રથમ મિલનની રાત, સાંભરે પ્રથમ મિલનની રાત
જેના તે રસ ઢળ્યાં જીવનમાં, જેના તે રસ ઢળ્યાં જીવનમાં
ઊજળાં ઊગ્યાં પ્રભાત
સાંભરે પ્રથમ મિલનની રાત, સાંભરે પ્રથમ મિલનની રાત

– રસકવિ રઘુનાથ બ્રહ્મભટ્ટ

સ્વરઃ પૌરવી દેસાઈ

મારો સાજન મળ્યો ન મને મેળામાં

Friday, February 8th, 2019

 

 

હું તો હાટડીએ હાટડીએ ઘૂમી વળી
ને પડી આવી એવી તે કૈંક વેળામાં
મારો સાજન મળ્યો ન મને મેળામાં

ઊભી રહું ક્યાંય તોય આખું ચકડોળ
મને વેળાનું ફરતું દેખાય
ભમતી અભાન હું યે ચૌટે ને ચોકે
અને અણસારો કોઈ ન કળાય

અચકાયું હતું મારું ઓચિતું મન
જેવી નીકળી કે બ્હાર મારા ડેલામાં
મારો સાજન મળ્યો ન મને મેળામાં

લંબાતી જાય વાટ ચાલું ને જેમ જેમ
થાક્યા પહેલા યે હું તો થાકું
જોઈ રહે લોક બધું મારા નસીબ જેવું
રસ્તામાં મારી સામે વાંકું

ફૂલ મને હસતાં
ને કાંટાઓ અટવાયા
નવા રે નક્કોર મારા સેલામાં
મારો સાજન મળ્યો ન મને મેળામાં

– મહેશ શાહ

સ્વરઃ હંસા દવે
સ્વરાંકન: પુરુષોત્તમ ઉપાધ્યાય

ચકલીની ચાંચ

Sunday, January 27th, 2019

 

 

તૂટે તૂટે રે ચકલીની ચાંચ
ના દર્પણ તૂટે ના દર્પણમાં દેખાતું સાચ

સૌ લીલાછમ તરણા પાસે દોડી દોડી પૂગે
ભોં વિંધ્યાની પીડા કેમે આપણમાં ના ઉગે

સામે દેખ્યું સાચું ના દેખાતું ગણ્યું ભાસ

ના દેખાતું ઉકેલવાના ક્યાં છે હવે ખમીર
સૌ પાસે છે મન બાંધવા નહિતર દોરી હીર

રોજ રોજ ફૂટીને દર્પણ થાતું અંતે કાચ
તૂટે તૂટે રે ચકલીની ચાંચ

– હરીશ વડાવીયા

સ્વર : સોહેલ બ્લોચ, ઉર્વશી પંડ્યા
સ્વરાંકાન : ડો ભરત પટેલ
આસ્વાદ : સ્નેહી પરમાર

મારા રુદિયામાં આવ્યા હરિ

Monday, January 21st, 2019

 

 

મારા રુદિયામાં આવ્યા હરિ
મારી સુરતામાં કૂણીકૂણી પીંછી ફરી
ઘડી હું ફૂંક ને હું જ બંસરી
ઘડી ડું જ હરિવર નકરી

મને ખબર્યું ન પડતી ખરી …
પળ પળમાં હરિવરની વાંચી,
હું ચબરખી ઉકેલાઉ સાચી
હરિ સોંસરવી હું સંચરી …

કવિ – રમેશ પારેખ
સ્વર : એશ્વર્યા મજમુદાર

હરિ મારી આંખ્યુંમાં કરજો વિસામો

Sunday, January 20th, 2019

 

 

હરિ મારી આંખ્યુંમાં કરજો વિસામો,
પાંપણની પોટલીમાં આસુંનાં તાંદુલ લઈ
ઉભો હું થઈને સુદામો,
હરિ મારી આંખ્યુંમાં..

દરિયાની ભરતીમાં મોજાનો લોડ
એમ ઉછળવું કાયામાં રગોનું;
પાસંળીની પાર પીડા એટલી સમાઈ છે
જેટલું દ્વારીકામાં સોનું,
જરા ધસમસતા શ્વાસોને થામો.
મારી આંખ્યુંમાં કરજો વિસામો.

કીકીઓનાં કુંજામાં સપનાની કાંકરીઓ
નાખે જળધાર એક સીંચી;
કે ધારને કિનારે હરિ હસતાં દેખાય
પછી હળવી આંખ લઉં મીંચી.
હવે જળનો કિનારો છે સામો,
મારી આંખ્યુંમાં કરજો વિસામો.

– પ્રણવ પંડ્યા

સ્વર : સોનિક સુથાર
સ્વરાંકન : સુરેશ જોશી

અણધાર્યા રસ્તે હવે આવી ને ઊભો રહ્યો

Tuesday, January 15th, 2019

 


 

અણધાર્યા રસ્તે હવે આવી ને ઊભો રહ્યો,
પ્હોંચ્યો ના મંઝિલ સુધી, ના હું સફરમાં રહ્યા.

મૃગજળની રાખી તરસ, એનો આ અંજામ છે.
આંખોમાં આંસુ નથી, યાદોનું તોફાન છે.

ન કાબુમાં મન…..
છે કેવી ઘુટન…
જશે કઈ તરફ આ ડગર, કોને ખબર…..

સમયનાં વમળ છે,
દિશાઓ અકળ છે.
ને મઝધારે ઉઠે ભંવર….

છે તરણાંની આશા
તો કેવળ નિરાશા
થયું ભાગ્ય પણ બેઅસર….

ના કોઈ જાણે, ના કોઈ સમજે
શું વિધાતા એ માંડી રમત….
સાથે હો ત્યારે કિંમત ના સમજે
દૂર હો ત્યારે વધે છે મમત

હથેળીમાં રણ….
સરકતી આ ક્ષણ…
શું પુરી થશે આ સફર? કોને ખબર…

ઉછળતો સમંદર
છે આંખોની અંદર
ન સમજાય મનની દશા….

જો ઈચ્છામાં બળ છે
તો રસ્તો સરળ છે
ખુલી જાશે નવમી દિશા….

– ભાર્ગવ ઠાકર

સ્વર : દિવ્યકુમાર
સ્વરાંકન : રાજીવ ભટ્ટ
સંગીત :રાજીવ ભટ્ટ

ફિલ્મ : બાપ રે બાપ

આજ ગગનમાં પતંગ ઊડે

Monday, January 14th, 2019

 

 

આજ ગગનમાં પતંગ ઊડે
મનમાં ઉમટે ઉમંગ
છલકાતી એક-એક અગાસી
ઉપર જામ્યો રંગ

ઊડે ઊડે રે પતંગ ગુજરાતનો
ઊડે ઊડે રે પતંગ ગુજરાતનો

આજ ગગનમાં પતંગ ઊડે
મનમાં ઉમટે ઉમંગ
છલકાતી એક-એક અગાસી
ઉપર જામ્યો રંગ

ઊડે ઊડે રે પતંગ ગુજરાતનો
ઊડે ઊડે રે પતંગ ગુજરાતનો

સરગમ…

એ હે… સનસનન…
ચગે રે ચગે… ચગે રે ચગે…
હે કાયપો છે…!!

અલગ અલગ રંગોના પતગો ચારે તરફ તરવરતા
ભુરા આ આકાશી આંગળમાં રંગોળી ભરતા
કોઇ સનન.. ધસે તો, કોઇ ધીમે ધીમે સરતા..
રંગબેરંગી માછલીઓની જેમ ગગનમાં ઉડતા

ઊડે ઊડે રે પતંગ ગુજરાતનો
ઊડે ઊડે રે પતંગ ગુજરાતનો

મસ્તીનો તહેવાર ઉજવતી, સઘળી ન્યાતિ-જાતિ
ભેદભાવને ભૂલીને જનતા તલના લાડુ ખાતા
પરપ્રાંતિ જોડાયા આવ્યા પરદેશી મુલાકાતી
પતંગ થઇને આખો દિવસ ઉડે સૌ ગુજરાતી

ઊડે ઊડે રે પતંગ ગુજરાતનો
ઊડે ઊડે રે પતંગ ગુજરાતનો

હળવા થઇએ પવનની સાથે થોડુ ઉડી લઇએ
મોટપ નીચે મુકી ઉપર નાના થઇને જઇએ
હું ગુજરાતી ચેતનવંતો મારો આ તહેવાર
રંગીલું આકાશ કરે ગુજરાતનો જયજયકાર..

ઊડે ઊડે રે પતંગ ગુજરાતનો
ઊડે ઊડે રે પતંગ ગુજરાતનો

આજ ગગનમાં પતંગ ઊડે
મનમાં ઉમટે ઉમંગ
છલકાતી એક-એક અગાસી
ઉપર જામ્યો રંગ

ઊડે ઊડે રે પતંગ ગુજરાતનો
ઊડે ઊડે રે પતંગ ગુજરાતનો

– ડો રઈશ મનિયાર

સ્વર : અમન લેખડિઆ, સત્યન જગીવાલા, દ્રવિતા ચોક્સી

સંગીત : મેહુલ ચોકસી

ખારવણ

Wednesday, January 9th, 2019

 

 

પગને છે પાંખો ને માથે છે બાંસિયું ને બાંસિયામાં બૂમલાંની ભારી, ભારી!
ખારવણ ખારી ખારી.

ખારવણ દરિયાનો કટકો તે ઉછળે ને ઉછળી ઉછળી ન્ને આવે કાંઠે;
ખારવો તો કાંઠાનું ભાઠોડું સાવ શીનો કટકા બટકાને તે ગાંઠે!
માંગે છે ખારવણ મનગમતા મોતી ને ખારવો દે માછલિયું મારી મારી.
ખારવણ ખારી ખારી.

હાથના હલ્લેસાથી જીવતર હંકારે ને આંખ્યુંમાં દરિયાને પાળે;
ખારવાની ફૂગ્ગીનો કેફ બધો ઉતારે એક જ તે તસતસતી ગાળે;
ખારવણ ઘૂઘવાતું સપનું ને ખારવાની નજરું પર બાઝેલી છારી છારી.
ખારવણ ખારી ખારી.

– વિમલ અગ્રાવત

સ્વર : ડો.ફિરદૌસ દેખૈયા