આંખમાંથી શું ઝરે છે

No Comments

 

 

આંખમાંથી  શું  ઝરે  છે  શી ખબર
જે  દિવસ  છોડી  દીધું તારું નગર

એક પળ  તારા વિના ના  રહી શકું
તું   રહે  આરામથી   મારા    વગર

જીવથી   એને   વધુ     ચાહીશ  હું
લાવશે  તારા   મિલનની  જે  ખબર

લાગણી    મારી    છે  આયુર્વેદ  શી
એટલે    મોડી    તને   થશે   અસર

હોત    તું   પથ્થર   તો સારું થાત કે
હું   તને   પૂજી  શકત પૂછ્યા  વગર

– મુકેશ જોષી

સ્વર : આલાપ દેસાઈ

 

વૈષ્ણવજન તો તેને રે કહીયે

No Comments

 

 

વૈષ્ણવજન   તો   તેને  રે  કહીયે  જે પીડ પરાઈ જાણે રે
પરદુઃખે  ઉપકાર કરે તોયે  મન  અભિમાન  ન  આણે  રે

સકળ   લોકમાં   સહુને   વંદે   નિંદા   ન   કરે     કેની   રે
વાચ  કાછ  મન  નિશ્ચલ  રાખે  ધન ધન જનની તેની રે

સમદ્રષ્ટિને     તૃષ્ણા   ત્યાગી    પરસ્ત્રી   જેને    માત   રે
જિહ્વા થકી અસત્ય ન બોલે પરધન  નવ  ઝાલે  હાથ  રે

મોહ માયા વ્યાપે નહિ જેને દ્રઢ  વૈરાગ્ય  જેના મનમાં રે
રામનામશું તાળી રે વાગી સકળ તિરથ તેના  તનમાં રે

વણલોભી  ને   કપટ  રહિત  છે  કામ  ક્રોધ   નિવાર્યા  રે
ભણે  નરસૈયો  તેનું  દર્શન  કરતા  કુળ ઈકોતેર તાર્યા રે

– નરસિંહ મહેતા

સ્વર : કૌશિકી ચક્રવતી

દૂર રહે ત્યારે…

No Comments

 

 

દૂર રહે ત્યારે પણ લાગે આસપાસ તું સાજન
મારા દિલની ધડકન મારી તિવ્ર પ્યાસ તું સાજન

કદી લડખડું તો ઝપ્પ દઈને લઇ લેજે તું બાથે
જીવનપથ પર હાથ ઝાલીને ચાલીશું સંગાથે
મેં ચૂંટેલું મઘમઘતું એક ફૂલ ખાસ તું સાજન
દૂર રહે ત્યારે પણ લાગે આસપાસ તું સાજન

તું છે સરવર સ્નેહ તણું હું એમાં તરતી હોડી
તને પામવા ખળખળ કરતી નદી જેમ હું દોડી
હું શ્ર્વસતી પળપળ એ પુલકિત પરમ શ્ર્વાસ તું સાજન
દૂર રહે ત્યારે પણ લાગે આસપાસ તું સાજન

દૂર રહે ત્યારે પણ લાગે આસપાસ તું સાજન
મારા દિલની ધડકન મારી તિવ્ર પ્યાસ તું સાજન

– રીનલ પટેલ

સ્વર : ડો ફિરદોશ દેખૈયા

સ્વરાંકન : ડો ફિરદોશ દેખૈયા

ડેલીએથી પાછા મ વળજો, હો શ્યામ

No Comments

 

 

ડેલીએથી પાછા મ વળજો, હો શ્યામ
મેં તો ઠાલાં દીધાં છે મારા બારણાં

પાછલી તે રેણની નીંદરની કામળી
આઘી હળસેલતીક જાગું
દયણે બેસુંને ઓલી જમનાના વ્હેણની
ઘુમ્મરીમાં બૂડતી લાગું

બારણાંની તડમાંથી પડતા અજવાસને
ટેકે ઊભી રે મારી ધારણા
મેં તો ઠાલાં દીધાં છે મારા બારણાં

કૂકડાંની બાંગ મોંસૂઝણાંની કેડીએ
સૂરજની હેલ્ય ભરી આવે
કોડના તે કોડિયે ઠરતા દીવાને ફરી
કાગડાના બોલ બે જગાવે

ખીલેથી છૂટતી ગાયુંની વાંભ મુંને
બાંધી લ્યે થઈને સંભારણાં
મેં તો ઠાલાં દીધાં છે મારા બારણાં

ડેલીએથી પાછા મ વળજો, હો શ્યામ
મેં તો ઠાલાં દીધાં છે મારા બારણાં

-રમેશ પારેખ અને અનિલ જોશી
[ સહિયારી રચના ]

સ્વર : રવિન નાયક

વરસું તો હું ભાદરવો

No Comments

 


 

વરસું તો હું ભાદરવો ને સળગું તો વૈશાખ;
મારી પાસે બે જ વિકલ્પો, કાં આંસુ કાં રાખ.

ઘેરાઉં તો વાદળ કાળા, વિખરાઉં તો વ્હાલ
ભિંજાઉં તો શ્રાવણ છલબલ, કોરું તો દુષ્કાળ

બીડાઉં તો સ્વપ્ન સલુણું, ઊઘડું તો હું આશ
મારી પાસે બે જ વિકલ્પો, કાં આંસુ કાં રાખ.

વરસું તો હું ભાદરવો…

ફોરું તો હું ફૂલ અને જો બટકું તો હું ડાળ
ચાલું તો હું પંથ અને ભટકું તો અંતરિયાળ

ઊડું તો આકાશ, નહિ ઊડું તો ઘાયલ શ્વાસ
મારી પાસે બે જ વિકલ્પો, કાં આંસુ કાં રાખ.

વરસું તો હું ભાદરવો ને સળગું તો વૈશાખ;
મારી પાસે બે જ વિકલ્પો, કાં આંસુ કાં રાખ.

વરસું તો હું ભાદરવો…

સ્વરઃ નયના ભટ્ટ

ગીતઃ ભગવતીકુમાર શર્મા

સંગીતઃ હરીશ ઉમરાવ

માનવીના હૈયાને નંદવામાં

No Comments

 


 

માનવીનાં હૈયાને નંદવામાં વાર શી
માનવીના હૈયાને
અધ બોલ્યા બોલડે
થોડે અબોલડે
પોચા શા હૈયાને પીંજવામાં વાર શી
માનવીનાં હૈયાને નંદવામાં વાર શી
માનવીના હૈયાને

સ્મિતની જ્યાં વીજળી
જરી શી ફરી વળી

એના એ હૈયાને રંજવામાં વાર શી
એવા તે હૈયાને નંદવામાં વાર શી

માનવીનાં હૈયાને નંદવામાં વાર શી
માનવીના હૈયાને

-ઉમાશંકર જોશી

સ્વર : નિરૂપમા શેઠ

હરદમ તને જ યાદ કરું

No Comments

 


 

હરદમ તને જ  યાદ   કરું, એ   દશા   મળે,
એવું   દરદ   ન   આપ   કે  જેની દવા મળે.

સોંપી દઉં   ખુદાઈ   બધી   એના   હાથમાં,
દુનિયામાં ભૂલથી જો  કોઈ   બાવફા   મળે.

ઝંઝા   સમે   ગયો  તે   ગયો,   કૈં પતો નથી,
દેજો   અમારી યાદ   અગર   નાખુદા   મળે.

સૌથી   પ્રથમ   ગુનાની  કરી  જેણે કલ્પના,
સાચો અદલ તો એ જ કે  એને  સજા મળે.

કાઠું  થયું  હૃદય  તો   જીવનની મજા ગઈ,
એ  પણ રહી ન આશ કે જખ્મો નવા મળે.

રાખો   નિગાહ   ‘શૂન્ય’ના પ્રત્યેક ધામ પર,
સંભવ છે ત્યાં જ  કોઈ પણ રૂપે ખુદા મળે.

– ‘શૂન્ય’ પાલનપુરી

સ્વરઃ ધનાશ્રી પંડિત

હવે મંદિરના બારણા ઉઘાડો

No Comments

અનુરાધા પોડવાલના સ્વરમાં :

 

 

પુરૂષોત્તમ ઉપાધ્યાયના સ્વરમાં :

 


 

હવે મંદિરના બારણા ઉઘાડો મોરી માત
ગગન કેરે ઘાટ આવી નોરતાની રાત

ચંદ્રમાનું ચંદન અને સૂરજનું કંકુ
આસમાની ઓઢણીમાં ટપકીયાળી ભાતઓ
ગગન કેરે ઘાટ આવી નોરતાની રાત

કે નભના તારલિયા તારી આરતી ઉતારે
ને સમીરની શરણાઇ ગાઇ તુજને સત્કારે
આજે માવડીના મિલનની જાગ્યું અભિરાત
ગગન કેરે ઘાટ આવી નોરતાની રાત

– અવિનાશ વ્યાસ

સ્વર : અનુરાધા પોડવાલ

મારે રુદિયે બે મંજીરાં

No Comments

 


 

મારે રુદિયે બે મંજીરાં:
એક જૂનાગઢનો મહેતો, બીજી મેવાડની મીરાં…

ક્રુષ્ણક્રુષ્ણના રસબસ રણકે
પડે પરમ પડછન્દા:

એક મંજીરે સૂરજ ઝળહળ,
બીજે અમિયલ ચન્દા.

શ્વાસશ્વાસમાં નામસ્મરણના સરસર વહત સમીરા…

રાસ ચગ્યો ને હૈડાહોંશે
હાથની કીધી મશાલ;

વિષનો પ્યાલો હોઠ પામીને
નરદમ બન્યો નિહાલ.

હરિનાં જન તો ગહનગભીરાં, જ્યમ જમુનાનાં નીરાં…
મારે રુદિયે બે મંજીરાં.

– ભગવતીકુમાર શર્મા

સ્વર : પુરૂષોત્તમ ઉપાધ્યાય

જળના ભરોસે હોડીબાઈ નીસર્યાં

No Comments

 

 

જળના ભરોસે હોડીબાઈ નીસર્યાં

જળના ભરોસે હોડીબાઈ નીસર્યાં
છાંયડા ક્યાંક રે ડ્હોળા ને ક્યાંક નીતર્યા

ક્યાંક ઠેસ રે વાગે છે પોચા આભની
ક્યાંક વાગે પોચો પોચાયેલ પ્હાડ
ક્યાંક વાગે રે રેતીનાં તળ છીછરાં

એનો તાતો રે તાણેલ શઢ તો પાંદડું!
એમાં જળના ભરોસા હિલ્લોળાય
એ તો વાયરા તોખારી પીને ફરફર્યા

હોડીબાઈ જળમાં બંધાણા કાચા તાંતણે
જળની જળવત્તા જાળવતા જાય!
હોડીબાઈ જળમાં જીવ્યાં ને જળમાં સંચર્યાં

એને જળનો થાકોડો, જળનો આશરો
એને જળના ઘરેણાં, જળની ટેવ
હોડીબાઈ જળનાં જડબાને સાવ વિસર્યાં!

કાવ્યઃ રમેશ પારેખ
સ્વરઃ હરિશ્ચંદ્ર જોશી અને ગાર્ગી વોરા
સ્વરાંકનઃ હરિશ્ચંદ્ર જોશી
સંગીત નિયોજનઃ સુરેશ જોશી

Older Entries