ફળિયે ઢોલ ઢબુક્યા આજે

No Comments

 

 

ફળિયે ઢોલ ઢબુક્યા ત્યારે , હૈયે દાંડી વાગે
દોર વીંટેલી એક ઢીંગલી , ઉંબર જઈ છલાંગે

આંખોનું જે રતન હતું તે આંસુ થઈને વછૂટે
ઢીંગલીના આ મૈયર ઘરનું એક આયખું ખૂટે
અષાઢ આંખે ઉતરી આવે , ફૂલ્યા ફાલ્યા ફાગે

ખૂલતા તોયે બંધ રહેશે , ઘરના બારી ઝાંપા
અડતા આંખે ભીંત ઊપરથી લાલ રંગના થાપા
રાત વરત નું સૂનું ખોરડું નળીયા સોતુ જાગે

કાલી ઘેલી મીઠી વાતું , ચાંદરડા થઇ ચમકે
વા થી ઘરની સાંકળ જાણે , ખખડે મીઠા ઠમકે
ફોરા થઇ આ આંખોમાં, તે આવેલી લાગે

શીયા – વીં યા આ ઘરના તોરણ, ભોંય ઝૂકીને ઝૂરે
ઉંબર આડો થઇ રીસાયો , કોણ સાથીયા પૂરે ?
કાકા કરવું બંધ કર્યું છે ઘર મોભારે કાગે
ફળિયું પરના બેવળ નળીયા ,ઘર ખાલીપો તાગે

– ભાસ્કર ભટ્ટ

સ્વરાંકન : ડો ભરત પટેલ

દિવસ રાત થાતા આ  જેના   ઈશારે

No Comments

 

 

દિવસ રાત થાતા આ  જેના   ઈશારે
ઘડીભર તને પણ એ ક્યાંથી  વિસારે

સકળ બ્રહ્મ  જેની  અજાયબ અટારી
નઝર જયાં કરૂં  હોઉ  એના  જ   હારે

બધા  દર્દની   એક  એવી   દવા  છે
અહોરાત રટવું  પરમ  નામ   પ્યારે

જો શોધો  તો ઓછી પડે જીંદગાની
જો ચાહો તો ખુદ આંગણે એ પધારે

કથાનક   નથી   સાવ  કોરું કરમનું
અમે શબ્દ ઘટ્યા  છે   સાંજે  સવારે

– દિલીપ જોશી

સ્વર : નિગમ ઉપાધ્યાય

સ્વરાંકન : ડો ભરત પટેલ

ગરબે રમવાના થિયા ઓરતા રે

No Comments

 

 

ગરબે રમવાના થિયા ઓરતા રે ,આવ્યાં આવ્યાં માં ના નોરતાં રે
ચોકે નરનાર સહુ ડોલતા રે,આવ્યાં આવ્યાં માં ના નોરતાં રે

પડવેથી પુનમનો પંથ કેવો પાવન, જ્યાં જ્યાં નિહાળો ત્યાં માના હો દર્શન
આંગણીએ આંગણીયા આજ થયા ઉપવન
સોળે શણગાર સહુ શોભતા રે,આવ્યાં આવ્યાં માં ના નોરતાં રે

ઝળહળતી હોય ધરા ઝળહળતું અંબર , માં ને પૂછીને ઊગે સૂરજ ને ચંદર
ચોકે ચોકે રે ઝરે ઉમંગી અવસર
આઠે બ્રહ્માણ્ડ રંગ ઢોળતાં રે, આવ્યાં આવ્યાં માં ના નોરતાં રે

– દિલિપ જોશી

સ્વરાંકન ડો ભરત પટેલ

 

રાત  રોનક  સમા તમારી  છે

No Comments

 


 

રાત    રોનક   સમા   તમારી  છે
મારું   શું   છે?  સભા   તમારી  છે

છે  અમારી   બધી  અફળ ઈચ્છા
જે   ફળી  તે   દુઆ   તમારી   છે

લ્યો !  ઉઠાવો  તરંગ  ફાવે એમ
જળ તમારું   હવા    તમારી   છે

આખરે  આપ   મુક્ત   પંખી  છો
આભ   જેવી   જગા   તમારી  છે

નિત્ય     હોવું       નવનવા    રૂપે
એ   પુરાણી   પ્રથા   તમારી   છે

કાલ   મેં    પ્રેમગ્રંથ  વાંચ્યો ‘તો
પાને   પાને   કથા    તમારી   છે

રાજ   ગિરનાર   છે    એ    સાચું
પણ શિખર પાર ધજા તમારી છે

– રાજ લખતરવી

સ્વરાંકન: ડો ભરત પટેલ

પરપોટો થઈ ફૂટી ગયો રે

No Comments

 


 

પરપોટો થઈ ફૂટી ગયો રે
દરિયો રે, દરિયો રે, દરિયો રે

કાંઠે બેસી બીજ રોપતા એક છોકરે
છાલ ખાઈને ફેંકી દીધો ઠળિયો

હથેળિયુંમાં સોળ વરસને દીધી માઝમ કેદ
નસીબની રે રેખામાં ઘોળ્યા શ્વાસ ભરેલા ભેદ

સાવરણીની સાત સળીની આણ ફગાવી
ખીલી ગઈ રે કૂંણી કુંવારી કળીઓ

અંધકારના અજાણ રાતાં નગર ફળ્યાં બે શ્વાસ
ગઢમાં ગ્હેક્યાં મોર સાંભળી ફરફર ડોલ્યું ઘાસ

દરિયો ડહોળી ગીત ગોબરું દરિયાકાંઠે
ભરી ભરી ને ઠલવે રે આંગળીઓ

પરપોટો થઈ ફૂટી ગયો રે
દરિયો રે, દરિયો રે, દરિયો રે

– વિનોદ જોશી

(‘ઝાલર વાગે જૂઠડી’ કાવ્યસંગ્રહ)

સ્વરઃ આલાપ દેસાઈ

સ્વરાંકનઃ આશિત દેસાઈ

આવ્યાં આવ્યાં કાંઈ વિલાયતુંના વા’ણ જો

No Comments

 

 

આવ્યાં આવ્યાં કાંઈ વિલાયતુંના વા’ણ જો
પણ નો આવ્યાં નાહોલિયા તારા નાવડાં

ઊંચે ઊડે કૂવાના જેમ થંભ જો
એવાં રે ફફડે રે મારાં કાળજાં

ચૂંદડી ને નાળિયેર, ખારેક ને સિંદૂર જો
આ પૂનમે રે ચડાવશું, દરિયા દેવને

કંથડો મારો જાણે કોડીલો કા’ન જો
રાધા રે જૂએ છે એની વાટડી રે

આવ્યાં આવ્યાં કાંઈ વિલાયતુંના વા’ણ જો
પણ નો આવ્યાં નાહોલિયા તારા નાવડાં

સ્વરઃ હંસા દવે
સંગીતઃ પુરુષોત્તમ ઉપાધ્યાય