આવી રસીલી ચાંદની

No Comments

 

 

આવી રસીલી ચાંદની વનવગડો રેલાવતી
આવી રસીલી ચાંદની વનવગડો રેલાવતી

છાયા બની એ ચંદ્રની એને પગલે પગલાં પાડતી
આવી રસીલી ચાંદની

છાયા ન માનું ચાંદનીને ચંદ્રની એ તો પ્રિયા!
છાયા ન માનું ચાંદનીને ચંદ્રની એ તો પ્રિયા!

ઓ રંગરસિયા આમ બોલી મન ભરમાવે કાં સદા?
નૈનની ભૂલ ભૂલામણી

આવી રસીલી ચાંદની વનવગડો રેલાવતી
છાયા બની એ ચંદ્રની એને પગલે પગલાં પાડતી
આવી રસીલી ચાંદની

ચંદ્ર છૂપાયો વાદળીમાં તેજ તારું જોઈને!
જોને જરી તું આવ્યો ફરીને મુખ પર તારા મોહીને
થાયે શીદ લજામણી!

આવી રસીલી ચાંદની વનવગડો રેલાવતી
છાયા બની એ ચંદ્રની એને પગલે પગલાં પાડતી
આવી રસીલી ચાંદની

– ભાસ્કર વોરા

સ્વરઃ મહમદ રફી અને લતા મંગેશકર

સંગીતઃ દિલીપ ધોળકીયા

ભૂવા જાગરિયાના દોરા તું છોડ,

No Comments

 

 

ભૂવા જાગરિયાના દોરા તું છોડ,
અને ન માળા ફેરવ તું સીતા-રામની..
તને નજરું લાગી છે મારા નામની !

લહેરાતા વાળ તારે ખેંચીને બાંધવા
ને આઇનામાં જોઇ અમથું હસવું
માથે ઓઢીને તારું શેરીમાં ફરવું
ને ઊંબરે બેસીને તારું રડવું

ઘરના તો ઠીક હવે ગામ આખું કહેશે,
કે રહી ના હવે તું કશા કામની..
તને નજરું લાગી છે મારા નામની !

વાસીદું કરશે તો છાણવાળા હાથ
હવે મેંહદી રંગેલ તને લાગશે
ઓચિંતા આંગળીમાં વાગશે ટચાકા
અને કેટલીય ઇચ્છાઓ જાગશે

વાડીએ જવાનું કોઇ બહાનું કાઢીને હવે
પકડી લે કેડી મારા ગામની..
તને નજરું લાગી છે મારા નામની !

ભૂવા જાગરિયાના દોરા તું છોડ,
અને ન માળા ફેરવ તું સીતા-રામની..
તને નજરું લાગી છે મારા નામની !

– વંચિત કુકમાવાલા

સંગીત : અનિલ ધોળકિયા

સ્વર : અનિલ ધોળકિયા , સોનલ રાવલ

સોળ સજી શણગાર

No Comments

 

 

સોળ સજી શણગાર
ગયાં જ્યાં જરીક ઘરની બહાર,
અમોને નજરું લાગી !

બે પાંપણની વચ્ચેથી
એક સરકી આવી સાપણ
ડંખી ગઈ વરણાગી.

કાંસા કેરે વાટકડે નજરુંનો ટુચકો કીધો,
હવે ન ઊખડયો જાય,થાળીને વળગી બેઠો સીધો,
આવા ન્હોય ઉતાર
નજરના આમ ન તૂટે તાર
અમોને નજરું લાગી !

તેલ તણી લઈ વાટ અમે દીવાલ ઉપર જઈ ફેંકી,
ખીલી સમ ખોડાઈ ગઈ ત્યાં નવ વાંકી નવ ચૂંકી,
જડને યે આ સૂઝ
તો રહેવું કેમ કરી અણબૂઝ
અમોને નજરું લાગી !

સાત વખત સૂકાં મરચાંનો શિરથી કર્યો ઉતાર,
આગ મહીં હોમ્યાં ત્યાં તો કૈં વધતો ચાલ્યો ભાર,
જલતાં તોય ન વાસ
અમોને કેમ ન લાગે પાસ ?
અમોને નજરું લાગી !

ભૂવો કહે ના કામ અમારું નજર આકરી કો’ક,
ટુચકા તરહ તરહ અજમાવી થાકયાં સઘળાં લોક,
ચિત ન ચોંટે કયાંય
હવે તો રહ્યુંસહ્યું ના જાય,
અમોને નજરું લાગી !

‘લ્યો, નજરું વાળી લઉં પાંછી’ એમ કહી કો’ આવ્યું,
નજરું પાછી નહીં મળે આ દરદ હવે મનભાવ્યું,
હવે નજરનો ભાર
જીવનનો થઈ બેઠો આધાર.
અમોને નજરું લાગી !

– હરિન્દ્ર દવે

સ્વર – નિશા કાપડિયા

પાંપણ પાછળ નેણ છુપાવ્યાં

No Comments

 

 

પાંપણ પાછળ નેણ છુપાવ્યાં, પાલવ પાછળ હૈયું,
પણ મારી પાની કહ્યું નહિ માની
છુપે ના છુપાણી કરે મનમાની

સાસરીની સાંકડી શેરીમાં વાગે કદી ના સંગીત
જાતાં ને આવતાં ઝાંઝરીની તાલે પાની ગાતી રહે ગીત

નહિ એ મૂંઝાણી રહી અણજાણી
સદાકાળ પાની કરે મનમાની

પણ મારી પાની કહ્યું નહિ માની
છુપે ના છુપાણી કરે મનમાની

મૈયરથી મુને મળવા આવ્યો એ મારો કોઈ મન મિત
પિયરથી તારા વાવડ લાવ્યો, તું શું ભૂલી ગઈ પ્રીત
લાવ્યો છું એક ઝાંઝરજોડી, સુણાવ તું કોઈ ગીત

સુણી હું લજાણી પણ મારી પાની
નહિ લજવાણી એના ઝાંઝરની વાણી

નાચે મારી પાની થઈને મસ્તાની
એ રોકે ના રોકાણી હું લાખ રીસાણી

પણ મારી પાની કહ્યું નહિ માની
છુપે ના છુપાણી કરે મનમાની

સ્વરઃ કવિતા કૃષ્ણમૂર્તિ

ગીતઃ નિરંજના ભાર્ગવ

સંગીતઃ નવીન શાહ

તન-તંબુર એકરાગ બજે બસ

No Comments

 

 

તન-તંબુર એકરાગ બજે બસ એક રંગ છલકાયો,
લાલ, પીળા, પચરંગી માથે શ્યામલ રંગ છવાયો.

એક કામળી, એક બાંસુરી
હૃદયે એક જ નામ,
તન મેવાડે, મન જઈ મ્હાલે
મોરપિંચ્છને ધામ,
પ્રીત પારખી, પ્રીતમ સીધ્ધો રંગમોલમાં ધાયો,
લાલ, પીળા, પચરંગી માથે શ્યામલ રંગ છવાયો.

મરુભોમની મુઠ્ઠી ધૂલિ
ભઈ અસુંવનની ભાખા,
વ્યાકૂળ વિરહા, સ્વયમ વલ્લરી
જેની ઊંચી શાખા,
ગાઈ ગાઈ-ને ગિરધરને તેં ચાહ્યો બહુ છેતરાયો,
લાલ, પીળા, પચરંગી માથે શ્યામલ રંગ છવાયો

–સંજુ વાળા

સ્વર : ગાર્ગી વોરા

સ્વરાંકન: ડો ભરત પટેલ

કંકુ ઘોળ્યા, શુકન લખી જોયા

No Comments

 

 

કંકુ ઘોળ્યા, શુકન લખી જોયા
સાથિયે સાથિયે સખી જોયા

ભૂર્જપત્રોને ય ઓળખી જોયા
પગ ઊધઈના ય પારખી જોયા

મૂળ થડ ડાળ ડાળખી જોયા
ઝૂલી જોયા ‘ને લખલખી જોયા

જે તને થઈ મળ્યા નર્યું ઝાકળ
એ દિવસ મેં ય ધખધખી જોયા

એ જ ઊંચાઈ એ જ આદિમતા
તળથી લઈ છેક તીરખી જોયા

સાવ સરખાં ભજન-ગઝલ ભાળ્યાં
તો, નિકટ જઈને નીરખી જોયાં

એક ફક્કડ ; ફકીર છે બીજો
હાથનાં પોત પારખી જોયાં

– સંજુ વાળા

સ્વર : ગાર્ગી વોરા

સ્વરાંકન : ડો ભરત પટેલ

એક પાટણ શેરની નાર પદમણી,

No Comments

 


 

એક પાટણ શહેરની નાર પદમણી,
આંખ નચાવતી ડાબી ને જમણી,
સૂરત જાણે ચંદા પૂનમની, બીચ બજારે જાય..
ભાતીગળ ચૂંદલડી લહેરાય,
ઝાંઝરીયું ઝમક ઝમક ઝમક ઝમક ઝમક ઝમક થાય..

એક વાગડ દેશનો બંકો જુવાનીયો,
રંગ જાણે એનો લાલ ફાગણીયો,
કંઠે ગરજતો જાણે શ્રાવણિયો, સાવજડો વર્તાય,
નજર્યુંમાં આવી એવો નજરાય,
દલડું ધબક ધબક ધબક ધબક ધબક ધબક થાય..

રંગમાં નખરો, ઢંગમાં નખરો,
રૂપ એવું અંગ અંગમાં નખરો;
પાતળી કેડને ભાર જોબનનો જીરવ્યો ના જીરવાય,
ભાતીગળ ચૂંદલડી લહેરાય,
ઝાંઝરીયું ઝમક ઝમક ઝમક ઝમક ઝમક ઝમક થાય..

બંકડી મૂછો અરે બંકડી પાઘડી,
રંગ કસુંબલ ભરી આંખલડી,
હાલક ડોલક ડુંગરે ચડે પડ છો ના પરખાય,
નજર્યુંમાં આવી એવો નજરાય,
દલડું ધબક ધબક ધબક ધબક ધબક ધબક થાય..

– અવિનાશ વ્યાસ

સ્વર સ્વર : પાર્થિવ ગોહિલ અને દિપાલી સૌમેયા

ઓ હૃદય, તેં પણ ભલા!

No Comments

 

 

ઓ હૃદય, તેં પણ ભલા! કેવો ફસાવ્યો છે મને?
જે નથી મારા બન્યાં, એનો બનાવ્યો છે મને!

સાથ આપો કે ના આપો એ ખુશી છે આપની,
આપનો ઉપકાર, મારગ તો બતાવ્યો છે મને.

સાવ સહેલું છે, તમે પણ એ રીતે ભૂલી શકો,
કે તમારા પ્રેમમાં મેં તો ભુલાવ્યો છે મને.

મારા દુઃખના કાળમાં એને કરું છું યાદ હું,
મારા સુખના કાળમાં જેણે હસાવ્યો છે મને.

હોત દરિયો તો હું તરવાની ય તક પામી શકત,
શું કરું કે ઝાંઝવાંઓએ ડુબાવ્યો છે મને.

કાંઈ નહોતું એ છતાં સૌએ મને લુંટી ગયા,
કાંઈ નહોતુ એટલે મેં પણ લુંટાવ્યો છે મને.

એ બધાંનાં નામ દઈ મારે નથી થાવું ખરાબ,
સારાં સારાં માનવીઓએ સતાવ્યો છે મને.

તાપ મારો જીરવી શકતાં નથી એ પણ હવે,
લઈ હરીફોની મદદ જેણે જલાવ્યો છે મને.

છે હવે એ સૌને મારો ઘાટ ઘડવાની ફિકર,
શુદ્ધ સોના જેમ જેઓએ તપાવ્યો છે મને.

આમ તો હાલત અમારા બેય ની સરખી જ છે,
મેં ગુમાવ્યાં એમ એણે પણ ગુમાવ્યો છે મને.

આ રીતે સમતોલ તો કેવળ ખુદા રાખી શકે,
ભાર માથા પર મૂક્યો છે ને નમાવ્યો છે મને.

સાકી, જોજે હું નશામાં ગમને ભૂલી જાઉં નહિ,
એ જ તો આ તારા મયખાનામાં લાવ્યો છે મને.

આપ સાચા અર્થમાં છો મારે માટે તો વસંત,
જ્યારે જ્યારે આપ આવ્યાં છો, ખિલાવ્યો છે મને.

એ બધાં ‘બેફામ’ જે આજે રડે છે મોત પર,
એ બધાંએ જિંદગી આખી રડાવ્યો છે મને.

– બરકત વીરાણી‘બેફામ’

એક છોકરીના હાથથી રૂમાલ પડે

No Comments

 

 

એક છોકરીના હાથથી રૂમાલ પડે તે લેવા આખું યે ગામ વળે નીચે
જુવાન આંખ ફાડે , બુઢ્ઢાઓ આંખ મીંચે

નામ કોનું રૂમાલમાં આ છોકરીએ ભર્યું છે
તે બાબત પર ઠેર ઠેર ગરમી
પડ્યા ગામના બગીચાઓ ખાલી કુંજાર
અને નાસ્તિકો થઈ ગયા ધરમી
કારણ કે મંદિરે જાય છોકરી તો લોક શું કરવા
ટળવળે બગીચે ?

એક છોકરીના હાથથી . . . . . . . . . . . .

ગંધ છોકરીની આવી જે જીવને તે જીવની ગંભીરતામાં પડી ગયો ગોબો
સહુ છોકરાને અરીસાઓ ઠપકો આપે કે
” જરા મોંઢાંઓ માંજો ને શોભો ”

કારણ કે ફળિયાના હીંચકે આ છોકરી એકલી બેસીને રોજ હીંચે

એક છોકરીના હાથથી રૂમલ પડે તે લેવા . . . . . .

રમેશ મળે ક્યાં રમેશમાં ?!

– રમેશ પારેખ

સ્વર : રાગ મહેતા

સ્વરાંકન : રિષભ મહેતા

ચિત્ત તું શીદને ચિંતા ધરે ?

No Comments

 

 

ચિત્ત તું શીદને ચિંતા ધરે ?
કૃષ્ણને કરવું હોય તે કરે !

સ્થાવર જંગમ જડ ચેતનમાં માયાનું બળ જઠથી ઠરે;
સ્મરણ કર શ્રીકૃષ્ણચંદ્રનું, જનમ જનમના પાપ હરે
કૃષ્ણને કરવું હોય તે કરે !

નવ રે માસ રહી ગર્ભમાં પ્રાણી કૃષ્ણચંદ્ર નું ધ્યાન ધરે;
માયાનું જ્યાં કર્યું આવરણ , લખ ચોરાશી ફરે
કૃષ્ણને કરવું હોય તે કરે !

દોરી સૌની હરને હાથે ,એને ભરાવ્યું તે ડગલું ભરે;
જેવો જંત્ર વગાડે જંત્રી તેવો તેનો સ્વર નીસરે
કૃષ્ણને કરવું હોય તે કરે !

તારું ધાર્યું થાતું હોય તો, સુખ સાચેને દુઃખ હરે;
રાખ ભરોસો રાધાવરનો, જીવ હવે તું શીદને ડરે ?
કૃષ્ણને કરવું હોય તે કરે !

-દયારામ

સ્વર : સચિન લિમયે

Older Entries