કહી ન શકાય એટલો તને પ્રેમ કરું છું

Comments Off on કહી ન શકાય એટલો તને પ્રેમ કરું છું

 

 

કહી ન શકાય એટલો તને પ્રેમ કરું છું
સહી ન શકાય એટલો તને પ્રેમ કરું છું

આકાશ હવે આવડું અમથું નાનકું લાગે
ધરતી હવે જાણે કે પરમાણું લાગે
મન આ મારું ક્યારેક તો ઉખાણું લાગે
સહી ન શકાય એટલો તને પ્રેમ કરું છું

કેટલાંયે આ શબ્દો જાણે તરણાં જેવાં
આવરું બહાવરું દોડતાં જાણે હરણાં જેંવાં
પહાડથી જાણે દડતાં ઝીણાં ઝરણાં જેવાં
વહી ના શકાય એટલો તને પ્રેમ કરું છું

ખડક થાઉં તોયે હવે તો તારા વિના
રહી ન શકાય એટલો તને પ્રેમ કરું છું .

– જગદીશ જોશી

સ્વર – સંગીત : આશિત દેસાઇ

હોડીને દૂર શું? નજીક શું?

Comments Off on હોડીને દૂર શું? નજીક શું?

 

 

છોને છોડે એ ભૂમિના કિનારા
ને શહેરના મિનારા
કે હોડીને દૂર શું? નજીક શું?

એક વાર સઢ ભર્યા ફૂલ્યાં
ને વાયરા ખૂલ્યાં
કે હોડીને દૂર શું? નજીક શું?

સામે આભના તે આગળા ખૂલે
ને પંથ નવા ઝૂલે
કે હોડીને દૂર શું? નજીક શું?

તેના પહોળા પાલવ દૂર ફરકે
ને ઝીણું ઝીણું મરકે
કે હોડીને દૂર શું? નજીક શું?

કદી કુદી દે તારલીને તાલી
હસંત મતવાલી
કે હોડીને દૂર શું? નજીક શું?

કદી ઝંઝાને વીંજણે રમંતી
તૂફાને ભમંતી
કે હોડીને દૂર શું? નજીક શું?

એ તો સરખાં-સમોવડાંને ભેટે
ત્રિકાળને ત્રિભેટે
કે હોડીને દૂર શું? નજીક શું?

આજ બીજકલા દેખીને ઊપડી
પૂનમ એની ઢૂકડી
કે હોડીને દૂર શું? નજીક શું?

એણે ધ્રુવનું નિશાન ભલું તાક્યું,
બાકી ન કાંઈ રાખ્યું
કે હોડીને દૂર શું? નજીક શું?

છોને છોડે એ શહેરના મિનારા
ને ભૂમિના કિનારા
કે હોડીને દૂર શું? નજીક શું?

– ઉમાશંકર જોશી

સ્વરઃ હરિહરન

સંગીતઃ અજિત શેઠ

ધારો કે એક સાંજ આપણે મળ્યાં

Comments Off on ધારો કે એક સાંજ આપણે મળ્યાં

 

 

ધારો કે એક સાંજ આપણે મળ્યાં અને આપણે હળ્યાં
પણ આખા આ આયખાનું શું?
ખુલ્લી આ આંખ અને કોરી કિતાબ
એને ફરીફરી કેમ કરી વાંચશું?

માનો કે હોઠ સ્હેજ મ્હોરી ઉઠ્યા
ને છાતીમાં મેઘધનુષ ફોરી ઉઠ્યાં
પણ બળબળતી રેખાનું શું?

આકાશે આમ ક્યાંક ઝુકી લીધું
ને ફૂલોને ‘કેમ છો?’ પૂછી લીધું
પણ મૂંગી આ વેદનાનું શું?

માનો કે આપણે ખાધું-પીધું
અને માનો કે રાજ! થોડું કીધુંયે રાજ,
પણ ઝૂરતા આ ઓરતાનું શું?

ધારો કે રાણી! તમે જીતી ગયાં
અને ધારો કે વાયરા વીતી ગયા
પણ આ માંડેલી વારતાનું શું?

– જગદીશ જોષી

સ્વર : ભુપિંદર

એકલ દોકલ વરસાદે કેવી ભીંજાતી હું

Comments Off on એકલ દોકલ વરસાદે કેવી ભીંજાતી હું

 

સ્વર : પરેશ ભટ્ટ

 

 

એકલ દોકલ વરસાદે કેવી ભીંજાતી હું,
વાત વાતમાં વ્હાલમ વાદળ ઓઢાડીને છૂ.

સાંજ પડે ને વ્હાલમ આવી પૂછે, ‘કેમ છો રાણી’,
છે મજા એવું બોલીને છલકે આંખે પાણી,
તો આંસુના દિવાને એ પછી એણે ફૂંક મારી – ‘ફૂ’

વ્હાલમ ક્યારે દરિયો દિલનો ઢોળે,
ક્યારે વ્હાલમ મૂકી માથું સૂવે મારે ખોળે.
ને મેં કહ્યું કે રોકાઈ જા, તો એ કહે – ‘ઉંહુ

એકલ દોકલ વરસાદે કેવી ભીંજાતી હું,
વાત વાતમાં વ્હાલમ વાદળ ઓઢાડીને છૂ.

– મુકેશ માવલણકર

 

સ્વર :  ગાર્ગી વોરા

 

હવે પહેલો વરસાદ અને બીજો વરસાદ

Comments Off on હવે પહેલો વરસાદ અને બીજો વરસાદ

 

 

હવે પહેલો વરસાદ અને બીજો વરસાદ અને છેલ્લો વરસાદ
. એવું કાંઈ નહીં !
હવે માટીની ગંધ અને ભીનો સંબંધ અને મઘમઘતો સાદ,
. એવું કાંઈ નહીં !

સાવ કોરુંકટાક આભ, કોરોકટાક મોભ, કોરાંકટાક બધાં નળિયાં,
સાવ કોરી અગાસી અને તે ય બારમાસી, હવે જળમાં ગણો
. તો ઝળઝળિયાં !
ઝીણી ઝરમરનું ઝાડ, પછી ઊજળો ઉઘાડ પછી ફરફરતી યાદ,
. એવું કાંઈ નહીં !
હવે પહેલો વરસાદ અને બીજો વરસાદ અને છેલ્લો વરસાદ
. એવું કાંઈ નહીં !

કાળું ભમ્મર આકાશ મને ઘેઘૂર બોલાશ સંભળાવે નહીં;
મોર આઘે મોભારે ક્યાંક ટહુકે તે મારે ઘેર આવે નહીં.
આછા ઘેરા ઝબકારા, દૂર સીમે હલકારા લઇને આવે ઉન્માદ,
. એવું કાંઈ નહીં !
હવે પહેલો વરસાદ અને બીજો વરસાદ અને છેલ્લો વરસાદ
. એવું કાંઈ નહીં !

કોઈ ઝૂકી ઝરુખે સાવ કજળેલા મુખે વાટ જોતું નથી;
કોઈ ભીની હવાથી શ્વાસ ઘૂંટીને સાનભાન ખોતું નથી.
કોઈના પાલવની ઝૂલ, ભીની ભીની થાય ભૂલ, રોમે રોમે સંવાદ
. એવું કાંઈ નહીં !
હવે પહેલો વરસાદ અને બીજો વરસાદ અને છેલ્લો વરસાદ
. એવું કાંઈ નહીં !

-ભગવતીકુમાર શર્મા

સ્વર : સોલી કાપડીયા

 

Older Entries

@Amit Trivedi