શ્યામ તને હું સાચે કહું છું, માન મલાજો લોપી;
હું તો તારી હે ગિરધારી, ગયા જનમની ગોપી.

જાણીતી ને તોય અજાણી, એક યમુના વહ્યા કરે;
એક વાંસળી મોરપીંછની, મૂંગી મૂંગી સહ્યા કરે;
સૂરશબ્દની સીમાએથી, આંખ આંખમાં રોપી,
હું તો તારી હે ગિરધારી, ગયા જનમની ગોપી.

કિયા જનમનાં કદંબ ઊગ્યા, કિયા જનમની છાયા;
મીંરા ને મોહન મુખડાની, અનંત લાગી માયા.
શ્યામલ તારા ચરણ કમળમાં સઘળું દીધું સોંપી;
હું તો તારી હે ગિરધારી, ગયા જનમની ગોપી.

– સુરેશ દલાલ

સ્વર : ઐશ્વર્યા મજમુદાર