ગુજરાતી સાહિત્ય

દૂર રહે ત્યારે પણ લાગે આસપાસ તું સાજન
મારા દિલની ધડકન મારી તિવ્ર પ્યાસ તું સાજન

કદી લડખડું તો ઝપ્પ દઈને લઇ લેજે તું બાથે
જીવનપથ પર હાથ ઝાલીને ચાલીશું સંગાથે
મેં ચૂંટેલું મઘમઘતું એક ફૂલ ખાસ તું સાજન
દૂર રહે ત્યારે પણ લાગે આસપાસ તું સાજન

તું છે સરવર સ્નેહ તણું હું એમાં તરતી હોડી
તને પામવા ખળખળ કરતી નદી જેમ હું દોડી
હું શ્ર્વસતી પળપળ એ પુલકિત પરમ શ્ર્વાસ તું સાજન
દૂર રહે ત્યારે પણ લાગે આસપાસ તું સાજન

દૂર રહે ત્યારે પણ લાગે આસપાસ તું સાજન
મારા દિલની ધડકન મારી તિવ્ર પ્યાસ તું સાજન

– રીનલ પટેલ

સ્વર : ડો ફિરદોશ દેખૈયા

સ્વરાંકન : ડો ફિરદોશ દેખૈયા