તમારા નયનમાં એક સ્વપ્નું થઈને
Apr 04
ગીત Comments Off on તમારા નયનમાં એક સ્વપ્નું થઈને
તમારા નયનમાં એક સ્વપ્નું થઈને
મને સંતાઈ જાતાં નહિ વાર લાગે
તમારા ચરણની નીચે કુસુમ થઈને
મને ચગદાઈ જાતાં નહિ વાર લાગે
આંખેથી પૂછ્યું તે આંખેથી કહેવાની
કરશો નહિ જો તમે મહેરબાની
તમે મહેરબાની
તો તમારા કલાપે એક ગજરો થઈને
મને ગૂંથાઈ જાતાં નહિ વાર લાગે
નહિ વાર લાગે
મારી જ મહેફીલમાં મારાથી દૂર રહી
નર્તન કરો છો બીજા કોઈ સામે
તમારા આ નૂપુરનું
તમારા આ નૂપુરનું ઘુંઘરું થઈને મને
બંધાઈ જાતાં નહિ વાર લાગે
નહિ વાર લાગે
ચંપો થઈને તમારા ચમનમાં
મનમાં તમન્ના છે મહેકી જવાની
અરે મહેકી જવાની
પણ તમારા
આ ઘૂંઘટનો એક નિસાસો થઈને
મને રૂંધાઈ જાતાં નહિ વાર લાગે
નહિ વાર લાગે
અમે દિલ દીધું તમે દિલ દઈ દ્યો
નહિ દ્યો તો થાશે શું એ પણ કહી દઉં
કે તમારા આ પાલવનો છેડો થઈને
મને ચૂંથાઈ જાતાં નહિ વાર લાગે
નહિ વાર લાગે નહિ વાર લાગે
તમારા નયનમાં એક સ્વપ્નું થઈને
મને સંતાઈ જાતાં નહિ વાર લાગે
સ્વરઃ પુરુષોત્તમ ઉપાધ્યાય
ગીત-સંગીતઃ અવિનાશ વ્યાસ