ચાલ સખી પાંદડીમાં ઝાકળના ટીપાની

No Comments

 

 

ચાલ સખી પાંદડીમાં ઝાકળના ટીપાની
જેમ ફરી જિંદગીને મૂકીએ,
ટેરવાનો સ્પર્શ એક ઘટના કહેવાય છે
કે લાગણી ગણાય એમ પૂછીએ.

વેદના તો અડીખમ ઉભો કંઠાર
જતાં આવતાં જુવાળ ભલે કોતરે,
સુખ સાથે આપણો તો જળનો સંબંધ
ક્યાંક રેતી ઢાંકે ને ક્યાંક ઓસરે.

છીપલાની હોડીને શઢથી શણગાર ચાલ
કાંઠો છોડીને હવે ઝૂકીએ,
પાંદડીમાં ઝાકળનાં ટીપાંની જેમ
સખી ચાલ ફરી જિંદગીને મૂકીએ.

ચાંદનીને ચાંદનીનું નામ ન’તા દે’તા
એ વાતો અકબંધ મને યાદ છે,
વૃક્ષ પછી ડાળ પછી પંખીનો માળો
ને ઉપર આકાશ જેવો સાદ છે.
મૂળમાંથી ફૂટે ને ટોચ લગી જાય
એવી લાગણીને કેમ રે ઉવેખીએ,
ઝાકળશી જિંદગીને પાનની લીલાશ પરે
ચાલ સખી એક વાર મૂકીએ.

– ધ્રુવ ભટ્ટ

સ્વર અને સ્વરાંકન : અમર ભટ્ટ

સામસામે આવીએ તો

No Comments

 


 

સામસામે આવીએ તો ફફડે બે હોઠ પછી બોલવાનું સાનભાન ખોઇએ,
બે’ક ઘડી લાગે કે આટલામાં હોઇએ ને બે’ક ઘડી લાગે ન હોઇએ.

આખું આકાશ એક બટકેલી ડાળ પર લીલેરી કુંપળ થઇ ફૂટે
છાતીમાં સંઘરેલ સાત-સાત દરિયાઓ પરપોટા જેમ પછી ફૂટે
ધોમધોમ તડકામાં પાસપાસે ચાલીએ તો લાગે કે ભીંજાતા હોઇએ…
… બોલવાનું સાનભાન ખોઇએ.

સામસામે આવીએ તો ફફડે બે હોઠ પછી બોલવાનું સાનભાન ખોઇએ.
સાવ રે સભાનતાથી સાચવેલું ભાન અહીં યાદોમાં ધૂળધૂળ થાતું,
ડેલીબંધ બેઠેલા હોઇએ છતાંય કોઇ આવીને સાવ લૂંટી જાતું,
પૂરબહાર હસવાની મૌસમમાં કોઇવાર ઓચિંતા અંદરથી રોઇએ..

… બોલવાનું સાનભાન ખોઇએ.

સામસામે આવીએ તો ફફડે બે હોઠ પછી બોલવાનું સાનભાન ખોઇએ,
બે’ક ઘડી લાગે કે આટલામાં હોઇએ ને બે’ક ઘડી લાગે ન હોઇએ.

-વંચિત કુકમાવાલા,

સ્વર : પ્રીતિ ગજ્જર, ભાસ્કર શુક્લ

રીમઝીમ રીમઝીમ

No Comments

 

 

રીમઝીમ રીમઝીમ રીમઝીમ રીમઝીમ
બાદલ બરસે , રીમઝીમ બાદલ બરસે ,
રીમઝીમ બરસે, બાદલ બરસે
હો…..મારું મન ગુંજે ઝનકાર , મારું મન ગુંજે ઝનકાર
રીમઝીમ રીમઝીમ રીમઝીમ રીમઝીમ !!!!

સાવન ની સખી સાંજ સુહાગી
કરતા મોર પુકાર,ગગન ગોખથી
મદભર નૈના , વીજ કરે ચમકાર
મારું મન ગુંજે ઝનકાર
રીમઝીમ બરસે, બાદલ બરસે
રીમઝીમ રીમઝીમ રીમઝીમ રીમઝીમ

આંજણ આંજું , પહેરું પટોળા
સોળ સજું શણગાર ,
કઈ દિશ થી મારો કંઠ પધારે
કોઈ દિયો અણસાર। ..
મારું મન ગુંજે ઝનકાર
રીમઝીમ બરસે, બાદલ બરસે

– સુન્દરમ

સ્વર : વિભા દેસાઈ

સ્વરાંકન : ક્ષેમુ દિવેટિયા

રાતદિવસ ગોખલે

No Comments

 

 

રાતદિવસ ગોખલે રહી-રહીને તુલસીદલ સડ્યાં
બે જ પળ મૂકી દીધાં  તડકે,  ટપોટપ  ઊઘડ્યાં!

બાવડું   ચલવે    હથેળી?   કે   હથેળી   બાવડું?
કેટલા સ્હેલા   સવાલો!  જોશીને  ના  આવડ્યા…

મંગળા ત્રણસો, શયન સો, દોઢસોમાં રાજભોગ;
આપને ઠાકોરજી બહુ વાજબી   ભાવે   પડ્યા….

જો કહો   તો આંગળી   વાઢીને    અજવાળું  કરું
આશકા લઈ  હાથ   ધોઈ નાખતાં ના આવડ્યા

કુંડળી   જોવાને     ત્યારે   કોણ   રોકાયું   હતું?
મેષ ને  મંગળ ધનુષ ભેગા  જ  ભાંગીને  પડ્યા

હું   હજીયે   એકડા   પર   એકડો     ઘૂંટ્યા   કરું
આપને   તેંત્રીસ   કોટી  કેવી  રીતે આવડ્યા?

સૌ કોઈ પરસાદના પડિયાઓને  જોતાં   હતાં
એ  જ  ટાણે, એક પળ માટે જ, દર્શન ઊઘડ્યાં

– ઉદયન ઠક્કર

સ્વર અને સ્વારાંકન : ડો ભરત પટેલ

અડધી રમત થી

No Comments

 

 

અડધી   રમત   થી  ઊઠવાની    છૂટ   છે   તને,
તારી   શરત   થી   જીતવાની  છૂટ     છે   તને.

વાતો   જો   થઈ   શકે   તો   દિલે  બોજ ના રહે,
સીવેલાં   હોઠ  લઈ   જવાની     છૂટ   છે    તને.

ખાલી   જગા   સમાન   આ   જીવન   હવે  થયું,
પૂરી      શકે     એ    પૂરવાની   છૂટ    છે    તને.

મરજીથી તારી ગઈ છે તું, મનફાવે ત્યારે, યાર!
ખૂલ્લાં   છે   દ્વાર,   આવવાની   છૂટ     છે   તને.

નિશ્ચય   છે   મારો,   હું   તને  પામું આ જન્મમાં,
ચોર્યાસી    લાખ    વેઠવાની    છૂટ    છે    તને.

આ   આંગળીનાં    શ્વાસમાં   થઈ શબ્દની હવા,
આશ્રિતને    પ્રાણ    બક્ષવાની   છૂટ   છે   તને.

: ડો. વિવેક ટેલર

સ્વર : અમન લેખડિયા

સંગીત : મેહુલ સુરતી

વાંસના વનમાં થઇ વાતો પવન

No Comments

 

 

વાંસના વનમાં થઇ વાતો પવન,
કૃષ્ણ તણી ફૂંક થઇ ગાતો પવન.

તું મને સ્પર્શી ગઈ એવી રીતે,
ભ્રમ થયો એવો અરે ! આ તો પવન.

શ્વાસ તો તૂટી રહ્યાં છે ક્યારનાં,
ગ્રીષ્મ સાંજે ઠોકરો ખાતો પવન.

કોઇનાં છૂટી ગયાં છે પ્રાણ શું,
કેમ આ કંઇ વેળથી વાતો પવન.

– ભગવતીકુમાર શર્મા

સ્વર : રવિન નાયક

સ્વરાંકન : પરેશ ભટ્ટ

સદા સૌમ્ય શી વૈભવે ઊભરાતી

No Comments

 

 

સદા સૌમ્ય શી વૈભવે ઊભરાતી,
મળી માતૃભાષા મને ગુજરાતી.

રમે અન્ય સખીઓ થકી દેઇ તાળી,
સુધા કર્ણ સીંચે ગુણાળી રસાળી.
કરે બોલતા જે ભર્યા ભાવ છાતી,
રમો માતૃભાષા મુખે ગુજરાતી.

મળી હેમઆશિષ, નરસિંહ-મીરાં,
થયા પ્રેમભટ્ટ ને અખો ભક્ત ધીંરા,
પૂજી નર્મદે કાન્ત ગોવર્ધને જે,
સજી ન્હાનલે કલ્પનાભવ્ય તેજે.

ધ્રુવા સત્ય-સાથી અહિંસા સુહાતી,
નમો ધન્ય ગાંધીગિરા ગુજરાતી.

– ઉમાશંકર જોષી

સ્વર : ભૂમિક શાહ

સંગીત : અમિત ઠક્કર

સુખ તો એવું લાગતું

No Comments

 

 

સુખ તો એવું લાગતું જાણે પાંદડા ઉપર પાણી.
ઉક્કેલવી એ કેમ કરી આ પરપોટાની વાણી ?

આંખ ખોલું તો મોસૂઝણું
ને આંખ મીંચું તો રાત
ખૂલવા ને મીંચવા વચ્ચે
આપણી છે ઠકરાત

પળમાં પ્રગટે ઝરણાં જેવી કોઈની રામકહાણી.
સુખ તો એવું લાગતું જાણે પાંદડા ઉપર પાણી.

ટહુકો નભમાં છલકી ઊઠે
એટલો હો કલરવ
સાંજનો કૂણા ઘાસ ઉપર
પથરાયો પગરવ

લીંપણ કોઈ ગાર-માટીનું સહુને લેતું તાણી.
સુખ તો એવું લાગતું જાણે પાંદડા ઉપર પાણી.

– દિલીપ જોશી

સ્વરાંકન : ડો ભરત પટેલ

એક માણસ નાતમાં સાચો પડે

No Comments

 

 

એક   માણસ   નાતમાં    સાચો   પડે,
એમને    એમાંય    પણ    વાંધો   પડે.

એ બધા માની  જ  લે  એને    મરણ,
આદમી   થોડોક   બસ   આડો   પડે.

આમતો હમણાં જ નીકળી જાત પણ,
જીવ   સાલો   આપણો   જાડો   પડે !

હું   ય   વ્હાલો   હોઇશ   મારા બાપને,
ગાલ   પર    મારાય   તે     ખાડો   પડે.

ક્યાં    મળે   છે   તપ વગર ફળ કોઈને,
જો   રહો   તડકે   તો   પડછાયો  પડે !

એટલો    માણસ   નથી   તૈયાર   આ,
છળકપટમાં   એ   હજી  પાછો    પડે.

દીવડાં     પ્રગટાવ     તારી    આંખનાં,
શ્વાસ   આ   મારો   હવે   ઝાંખો  પડે.

પ્રેમનું       અત્તર      લગાડો     દૂરથી,
બહુ    જશો   નજદીક   તો  ડાઘો પડે.

– સ્નેહલ જોષી

સ્વર : દિશાની મહેતા

સ્વરાંકન : ડો ભરત પટેલ

આસ્વાદ : હરજીવન દાફડા

 

કાળની કેડીએ ઘડીક સંગ

No Comments

 


 

કાળની કેડીએ ઘડીક સંગ
રે ભાઈ, આપણો ઘડીક સંગ;
આતમને તોય જનમોજનમ લાગી જશે એનો રંગ !

ધરતી આંગણ માનવીના આ ઘડીક મિલનવેળા,
વાટમાં વચ્ચે એક દી નકી આવશે વિદાયવેળા!
તો કેમ કરીનેય કાળ ભૂલે ના એમ ભમીશું ભેળા !
હૈયાનો હિમાળો ગાળી ગાળીને વહશું હેતની ગંગ !

પગલે પગલે પાવક જાગે ત્યાં ઝરશું નેનની ઝારી,
કંટકપથે સ્મિતવેરીને મ્હોરશું ફૂલની ક્યારી;
એકબીજાને જીતશું, રે ભાઈ,જાતને જાશું હારી !
ક્યાંય ના માય રે આટલો આજ તો ઉરને થાય ઉમંગ !

– નિરંજન ભગત

Older Entries Newer Entries