એક જ ટીપામાં હો

No Comments

 

 

એક જ ટીપામાં હો જાણે સાત સમંદર,
એવા ઝંઝાવાત હજુ હૈયાની અંદર;

હોય હરણને મૃગજળથી બે હાથનું છેટું,
તારી ને મારી વચ્ચે બસ, એટલું અંતર!

જેવી હું, એવો તું એ નક્કી હોવાનો,
ભેદ ભલે હો બ્હાર, બધું સરખું છે ભીતર;

જુઓ કિનારે હાથ કોઈ ફેલાવી ઊભું!
ચાલો અહિયાં અટકી જઈએ, નાખો લંગર.

– પ્રા. હિમલ પંડ્યા “પાર્થ”

*એક જ ટીપામાં હો જાણે સાત સમંદર*
કવિ : હિમલ પંડ્યા
સ્વર : ડો. ભાવના મહેતા અંધારિયા
સ્વરાંકન : પ્રણવ મહેતા
આલ્બમ : એવું લખ હવે

આ આલ્બમના વેચાણમાંથી પ્રાપ્ત તમામ રકમ રુ. ૪,૫૦,૦૦૦/- પોલિયોનાબૂદી અભિયાનને સમર્પિત કરવામાં આવેલ છે.

સોજન્ય કવિશ્રી હિમલ પંડ્યા

ગુલાલ આપું છું

No Comments

 


 

એક મુઠ્ઠી ગુલાલ આપું છું,
લે, ગુલાબી ધમાલ આપું છું.

મેં મને સાચવી ઘણાં વર્ષો,
પણ તને અબ્બીહાલ આપું છું.

આપજે એક રંગમાં ઉત્તર,
સપ્તરંગી સવાલ આપું છું.

તું મને લયની પાર લઇ જાજે,
હું તને સૂર તાલ આપું છું.

હાથ ફેલાવ સામટું લઇ લે,
ફાંટ બાંધીને વ્હાલ આપું છું.

— પારુલ ખખ્ખર

સ્વર :ગાર્ગી વોરા

સ્વરાંકન : ડો ભરત પટેલ

આસ્વાદ: ડો વસંત જોશી

દિલમાં કોઇની યાદ….

No Comments

 

 

દિલમાં  કોઇની  યાદના પગલાં   રહી ગયા,
ઝાંકળ ઊડી  ગયું  અને  ડાઘાં   રહી   ગયા.

એને   મળ્યા   છતાંય કોઇ   વાત  ના   થઇ,
ગંગા   સુધી   ગયા   અને પ્યાસા રહી ગયા.

ફૂલો   લઇને   બાગથી   હું   નીકળી   ગયો,
ને   પાનખરના   હાથમાં   કાંટા   રહી  ગયા.

વરસ્યા વિના જંતી રહી શિર પરથી વાદળી,
‘આદિલ’ નજર ઉઠાવીને   જોતા રહી ગયા.

– આદિલ મન્સુરી

સ્વર : સાધના સરગમ

 

…. ને વેશ ઝાઝાં

No Comments

 

 
હતી રાત થોડી ને વેશ ઝાઝાં
ત્યાં કરવી પડી એ સ્તિથિમાં ઉતાવળ

ભૂલેલાં જૂઠાં રાહથી પાછો વળવાં
હું લાવ્યોતો મારી ગતિમાં ઉતાવળ

જીવનભરનાં ગુન્હા …..કબૂલીને જેમાં
લખ્યોતો તને પત્ર મેં ખૂબ લાંબો

ઘડી અંતની આવી ગઈને થઇ છે
લિખિતંગની છેલ્લી ….લીટીમાં ઉતાવળ

ના સીતાહરણ થાત, ના થાત મૃત્યું
લંકાપતિનું , શ્રીરાઘવને હાથે

કંચનનો મૃગ જોઈ મોહી જવામાં
જો થાતી ન સીતા …. સતીમાં ઉતાવળ

મજા મસ્ત મહેફિલની માણવાને
નિમંત્ર્યતા તા મિત્રો મેં વીણી વીણી

નિહાળીને વર્તન હું પસ્તાઈ બેઠો
થતું, મેં કરી ….દોસ્તીમાં ઉતાવળ

હજુ જીવવુંને જીરવવુંતું બાકી
હજુ કાવ્યનાં ખૂબ કરવાતા સર્જન

પરંતુ ‘રવિ ‘ ની જરૂરત પ્રભુને
જે કીધી મરણની …. તિથિ ઉતાવળ

-રવિ ઉપાધ્યાય

સ્વર : આશિત દેસાઈ

તેજના રસ્તા ઉપર

No Comments

 


તેજના  રસ્તા   ઉપર   દોર્યો    મને
શગની માફક   આપે   સંકોર્યો  મને

મંજરીની     મ્હેકના    ભારે      લચું
એક   આંબો  જાણે   કે   મોર્યો   મને

ના નીકળતું આંસુ ભમરો થઈ ગયું
એણે  અંદરથી  સખત  કોર્યો   મને

આ  બધા  શબ્દોનું ચિતરામણ કરી
મેં  જ  આ કાગળ ઉપર દોર્યો   મને

ઠોઠને   ઠપકો   નજાકતથી    દીધો
તેં   ગઝલ  આપીને  ઠમઠોયોં મને

ના મને પણ જાણ થઈ  એવી રીતે,
સાવ  હળવે  ચુપકીથી  ચોર્યો  મને

– મનોજ ખંડેરિયા

સ્વર અને સ્વરાંકન : ડો ભરત પટેલ

આસ્વાદ : વસંત જોશી

સામાય ધસી જઈએ

No Comments

 

 

સામાય ધસી જઈએ, આઘાંય  ખસી જઇએ,
એકાદ મળે ક્ષણ તો ક્ષણમાંય  વસી જઇએ.

આમેય   વિતાવવાની  છે  રાત સરોવરમાં,
તો ચાલ કમલદલમાં આ રાત ફસી જઈએ.

એકેક     કસોટીમાં     છે    પાર   ઉતરવાનું,
હર  શ્વાસ   કસોટી   છે,  એનેય  કસી જઇએ.

આ   ફીણ   તરંગોનાં  છે   શીખ  સમંદરની,
રેતાળ  કિનારા   પર  હેતાળ   હસી   જઇએ.

ઉત્કંઠ     હવામાં     છે    સંગાથ   સુગંધોનો,
હોવુંય   હવે   ઉત્સવ,  આકંઠ   શ્વસી  જઇએ.

– રાજેન્દ્ર શુકલ

સ્વર : અમર ભટ્ટ

મેં તજી તારી તમન્ના

No Comments

 


 

મેં તજી તારી તમન્ના તેનો આ અંજામ છે,
કે હવે સાચે જ લાગે છે કે તારું કામ છે.

છે સ્ખલન બે ત્રણ પ્રસંગોમાં મને પણ છે કબૂલ,
કોણ જાણે કેમ આખી જિંદગી બદનામ છે.

એક વીતેલો પ્રસંગ પાછો ઉજવવો છે ખુદા!
એક પળ માટે વીતેલી જિંદગીનું કામ છે.

આપની સામે ભલે સોદો મફતમાં થઈ ગયો,
આમ જો પૂછો બહુ મોઘાં અમારાં દામ છે.

જિંદગીના રસને પીવામાં જલ્દી કરો ‘મરીઝ’,
એક તો ઓછી મદિરા છે, ને ગળતું જામ છે.

– મરીઝ

સ્વર : બેગમ અખ્તર

શું જલુ જો

No Comments

 


 

શું જલુ જો કોઇની જાહોજલાલી થાય છે,
એ દશા છે એવી જ્યાંથી પાયમાલી થાય છે.

ગમ વધારે હોય દિલમાં તો ખુશાલી થાય છે,
જે દિવા ઝાઝા બળે ત્યારે દિવાળી થાય છે

વાદળો જામે છે દિલમાં ત્યારે છલકે છે સુરા
આસમા થી મય મળે છે ત્યારે પ્યાલી થાય છે.

ગમ કરો નહિ કે વીતે છે જિંદગી લઝઝત વિના,
થાઓ ખુશ- પીધા વિના પણ જામ ખાલી થાય છે.

જિંદગી તો એ જ રહેવાનીછે, જાગો કે ઊંઘો,
કાં તો ખ્વાબી થાય છે, કાં તો ખયાલી થાય છે.

કોણ દુનિયાને પિછાણે? કોણ દુનિયાથી બચે?
વેર રાખે છે અને પાછી વહાલી થાય છે.

છે સફળતાને વિફળતા એક સીમા પર પ્રેમ માં,
હાથ પકડાતો નથી તો હાથતાલી થાય છે.

મારી આશાઓ મળે છે એવી માટીમાં હવે,
સાકી! આ તારા સુરાલયની જે પ્યાલી થાય છે.

એવી દુનિયામાં ભલા દુખના દિલાસા કોણ દે?
એક્નો ગમ જ્યાં બીજા માટે ખુશાલી થાય છે.

જાણતું કોઇ નથી એના ફકીરી હાલ ને,
એટલે બેફામ દુનિયામાં સવાલી થાય છે.

– બેફામ

સ્વર : બેગમ અખ્તર

ફક્ત દિલની….

No Comments

 


 

ફક્ત દિલની સફાઈ માગે છે,
પ્રેમ ક્યાં પંડિતાઈ માગે છે !

આંખની ઓળખાણ છે કાફી,
લાગણી ક્યાં ખરાઈ માગે છે !

એક માણસ મળે ખરા દિલનો,
મન પછી ક્યાં ખુદાઈ માગે છે !

નામ ભગવાન એ જ વ્યક્તિનું,
જે બધાની ભલાઈ માગે છે.

જોઈએ સુખ બધાંને પોતિકાં,
કોણ પીડા પરાઈ માગે છે !

–કિરીટ ગોસ્વામી

સ્વર : ઓસમાન મીર

તમને એમાં વાંધો છે કંઈ

No Comments

 

 

અંદર અંદર સળવળતી એક ઘટનાથી શરૂઆત કરું તો તમને એમાં વાંધો છે કંઈ?
ઠરી ગયેલી ફૂંક ફરી પેટાવી ઝંઝાવાત કરું તો તમને એમાં વાંધો છે કંઈ ?

આજે સ્હેજ છાતીની અંદર શું દુ:ખે છે એને જાણી લેવાનું મન થઈ આવ્યું છે
એ કારણસર છાતી ઉપર થોડો ચંચુપાત કરું તો તમને એમાં વાંધો છે કંઈ ?

સમય નામના ડસ્ટરથી ભૂંસાઈ જવાના ડરની મારી છાને ખૂણે જઈ બેઠી જે –
એવી બિલકુલ અંગત કોઈ વાત અહીં સાક્ષાત કરું તો તમને એમાં વાંધો છે કંઈ

જ્યારે પણ ઉપસી આવે છે લમણાંની કોઈ નસ તો એનો સ્પર્શ હંમેશા હોય છે હાજર
વ્હાલપની એ મૂર્તિ માટે જીવની હું બિછાત કરું તો તમને એમાં વાંધો છે કંઈ?

જાણું છું કે આપ તો સાંગોપાંગ રસિક છો, હે શ્રૌતાજન ! નમન આપની રસવૃત્તિને –
કિન્તુ હું પણ આંસુની છાલકથી ઉલ્કાપાત કરું તો તમને એમાં વાંધો છે કંઈ ?

પાણીના એક ટીપાનો વિસ્તાર કરે જે સહસા એને જડશે પાણીદાર રહસ્યો
એવું કોઈ એક ટીપું લઈને એના સમદર સાત કરું તો તમને એમાં વાંધો છે કંઈ ?

કબીર નરસિંહ મીરાં નામે ખળખળતી એક નદી આપની અંદર વ્હેતી મેં ભાળી છે
સ્હેજ આપની પડખે બેસી હું ય જાત રળિયાત કરું તો તમને એમાં વાંધો છે કંઈ ?

– સંજુ વાળા

સ્વર : ડો ભરત પટેલ

સ્વરાંકન : ડો ભરત પટેલ

Older Entries Newer Entries