આપણે તો એટલામાં રાજી

Comments Off on આપણે તો એટલામાં રાજી

 
 

 
 

આપણે તો એટલામાં રાજી
આખાયે જંગલમાં રોજ રોજ ફૂટે છે
. ક્યાંક એક કૂંપળ તો તાજી
. આપણે તો એટલામાં રાજી

એકાદું પંખી જો ડાળ ઉપર બેસે
. તો થાય, મળ્યું આખું આકાશ
એકાદું ગીત કોઈ મોસમનું ગાય
. તોય રોમરોમ ફૂટે પલાશ
એકાદી લહેરખી પવનની જ્યાં સ્પર્શે
. ત્યાં રણઝણતી ઝાલરી બાજી
. આપણે તો એટલામાં રાજી…

પાણીની એકાદી છાલકમાં હોય કદી
. રીમઝીમ રેલાતો મલહાર
છાતીમાં નાંગરેલ સપનામાં હોય કોઈ
. એકાદી ક્ષણનો વિસ્તાર
એક એક કૂંપળમાં જંગલ ઊભરાય ?
. કોઈ પૂછે, તો કહીએ કે હાજી
. આપણે તો એટલામાં રાજી
 
– રમણીક સોમેશ્વર
 

સ્વર : કૌશલ અને કાજલ છાયા
સ્વરાંકન : કાજલ છાયા

 
 

આમ રોજે ઘેરાય, નહીં વરસે

Comments Off on આમ રોજે ઘેરાય, નહીં વરસે

 
 

 
 

આમ રોજે ઘેરાય, નહીં વરસે,
વરસાદ મારા વ્હાલમજી જેવો…
મને તરસાવી પોતે પણ તરસે,
વરસાદ મારા વ્હાલમજી જેવો…

કોરા રહે ને વળી જાતે હિજરાય એવા
બંને સ્વભાવથી છે સરખા,
મન મૂકી વરસે નહીં બેમાંથી કોઈ
મને લથબથ ભીંજ્યાના અભરખા;
એમ સમજાવ્યો સાનમાં ન સમજે,
વરસાદ મારા વ્હાલમજી જેવો…

મનના માનેલ અને આષાઢી છેલ,
હું તો કેમ કરી સમજાવું તમને?
ઓઢણીનું આછેરું ઈજન ન ઓળખો તો
લાજ્યું ન આવે કાંઈ અમને?
સાવ આઘે આઘેથી મને અડકે,
વરસાદ મારા વ્હાલમજી જેવો…
 
-તુષાર શુક્લ
 
સ્વર: આરતી મુન્શી
સ્વરાંકન: હરિશ્ચંદ્ર જોશી
 
 

આટઆટલાં વરસો જેણે…

Comments Off on આટઆટલાં વરસો જેણે…

 
 

 
 

આટઆટલાં વરસો જેણે રાખ્યું ઘર હુંફાળું
મ્હેંદી મૂકી ચાલ્યું આજે ઘરનું એ અજવાળું

દીકરી જાતા એમ લાગતું ગયો ગોખથી દીવો
નૈં સંધાય હવે આ ફળિયું ગમે એટલું સીવો
જેની પગલી પડતાં સઘળે થઈ જાતું રજવાડું
મ્હેંદી મૂકી ચાલ્યું આજે ઘરનું એ અજવાળું

રંગોળીમાં પડશે નહીં રે પહેલા જેવી ભાત
દૂર દૂર રે ચાલી જાશે ઘરની આ મિરાત
આંસુથી ભીંજાશે સૌની આંખોનું પરવાળું
મ્હેંદી મૂકી ચાલ્યું આજે ઘરનું એ અજવાળું
 
-અનિલ ચાવડા
 

સ્વર : નયન પંચોલી.
સ્વરાંકન : નયન પંચોલી.
 
 

આવતાં જતાં જરા નજર તો નાખતાં રહો

Comments Off on આવતાં જતાં જરા નજર તો નાખતાં રહો

 
 

 
 
આવતાં જતાં જરા નજર તો નાખતાં રહો
બીજું કંઈ નહિ તો કેમ છો એટલું કહો
આવતાં જતાં…

જતાં ને આવતાં તમે ભલે સતાવતાં રહો
બીજું કંઈ નહિ તો કેમ છો એટલું કહો
જતાં ને આવતાં…

મેઘ કેરી વીજળી ને આંધિયા ખૂણે ખૂણે
પ્રભુએ દીધું રૂપ એક ચંદ્રને ને તમને

ચાલતાં ચરણ નીચેની કાંકરીય ફૂલ બને
છૂપાઈ કોકિલા તમારા કંઠના મધુવને

ઘૂંઘટમાં ભલે તમારું રૂપ ઢાંકતા રહો
બીજું કંઈ નહિ તો કેમ છો એટલું કહો
આવતાં જતાં…

જતાં ને આવતાં તમે ભલે સતાવતા રહો
બીજું કંઈ નહિ તો કેમ છો એટલું કહો
જતાં ને આવતાં…

શું કરું નજર નજરની તું હરી ગયો
દિલની સાથ દિલ લગાવી ઘર કરી ગયો

ચંદ્ર થઈને તું પૂનમનો મન હરી ગયો
ખાલી પ્યાલીમાં શરાબ તું ભરી ગયો

કદી કદી સિતારનો આ તાર છેડતા રહો
બીજું કંઈ નહિ તો કેમ છો એટલું કહો
જતાં ને આવતાં…

આવતાં જતાં જરા નજર તો નાખતાં રહો
બીજું કંઈ નહિ તો કેમ છો એટલું કહો
આવતાં જતાં…

આ લટકો આ મટકો કરે રે દિલનો કટકો
કહ્યા વગર નજરમાં ઘર કરીને કેમ છટકો

તૂટ્યા જીગર પર ન મારો આંખડીનો ઝટકો
જનાબ મારી આંખમાં ન ખ્વાબ થઈને ખટકો

ભલે જુવાન રૂપનું ગુમાન રાખતાં રહો
બીજું કંઈ નહિ તો કેમ છો એટલું કહો
આવતાં જતાં…

આવતાં જતાં જરા નજર તો નાખતાં રહો
બીજું કંઈ નહિ તો કેમ છો એટલું કહો
આવતાં જતાં…

 
-અવિનાશ વ્યાસ
 
સ્વર: મુકેશ , આશા ભોંસલે
સ્વરાંકન : અવિનાશ વ્યાસ
 
 

અલ્લક દલ્લક, ઝાંઝર ઝલ્લક

Comments Off on અલ્લક દલ્લક, ઝાંઝર ઝલ્લક

 
 

 
 

અલ્લક દલ્લક, ઝાંઝર ઝલ્લક, રઢિયાળો જમનાનો મલ્લક, એથી સુંદર રાધા ગોરી, મુખડું ઝળકે ઝલ્લક ઝલ્લક !
આભે પૂનમ ચાંદ ઊગ્યો છે,
રાસ ચગ્યો છે છમ્મક છમ્મક ! ગોપી ભેળો કાન ઘૂસ્યો છે, ઢોલક વાગે ઢમ્મક ઢમ્મક !
રાધિકાનો હાર તૂટે છે, મોતી ચળકે ચલ્લક ચલ્લક ! બધાં જડ્યાં પણ એક ખૂટે છે, રુએ રાધિકા છલ્લક છલ્લક !

લીધું હોય તો આલને કાના ! મોતી મારું ચલ્લક ચલ્લક ! તારાં ચરિતર છે ક્યાં છાનાં ? જાણે આખો મલ્લક મલ્લક !
કાને ત્યાંથી દોટ મૂકી છે, રીસ ચડી ગોપીજનવલ્લભ, કદંબછાયા ખૂબ ઝૂકી છે, બંસી છેડે અલ્લપ ઝલ્લપ !

રાધા દોડે ચિત્ત અધીરે, રાસ રહ્યો છે અલ્લક દલ્લક! સૂર વણાયે ધીરે ધીરે !
ઉર તણાયે પલ્લક પલ્લક !

અલ્લક દલ્લક ઝાંઝર ઝલ્લક: રઢિયાળો જમનાનો મલ્લક, એથી સુંદર રાધા ગોરી, મુખડું ઝળકે ઝલ્લક ઝલ્લક !
 
-બાલમુકુંદ દવે
 

સ્વર : અનંત વ્યાસ
સ્વરાંકન: અનંત વ્યાસ

 
 

Older Entries Newer Entries

@Amit Trivedi