દાદાના આંગણામાં કોળેલા આંબાનું…
Sep 25
ગીત Comments Off on દાદાના આંગણામાં કોળેલા આંબાનું…
દાદાના આંગણામાં કોળેલા આંબાનું કૂણેરું તોડ્યું રે પાન
પરદેશી પંખીના ઊડ્યા મુકામ પછી માળામાં ફરક્યું વેરાન
ખોળો વાળીને હજી રમતા’તા કાલ અહીં સૈયરના દાવ નતા ઉતર્યા
સૈયરના પકડીને હાથ ફર્યા ફેર-ફેર, ફેર હજીય નતા ઉતર્યા
આમ પાનેતર પહેર્યું ને ઘૂંઘટમાં ડોકાયું જોબનનું થનગનતું ગાન
આંગળીએ વળગેલાં સંભાર્યા બાળપણાં, પોઢેલાં હાલરડાં જાગ્યાં કુંવારા દિવસોએ ચોરીમાં આવીને ભૂલી જવાના કોણ માંગ્યા
પછી હૈયામાં કાજળમાં સેંથામાં સંતાતું ચોરી ગયું રે કોક ભાન
– માધવ રામાનુજ
સ્વર : પ્રીતિ ગજ્જર
સ્વરાંકન :ડો. ભરત પટેલ