ગુજરાતી સાહિત્ય

હો પિયા તોરી લાગી રે લગન
રૈન રે ઝુમેલી બરખન માસની
રૂમઝુમ રેલ્યો અંધકાર

ભીને રે અંચલ જામતી રાનમાં
ધરતી ફૂલ ગંધ ભાર
વીજને તેજે તે નીરખું પંથને
ઉરમાં એક રે અગન …લાગી રે લગન પિયા

તમરાં બોલે છે તરુવર પુંજમાં
જલપે ઝરણાં હજાર
અડધી રાતે રે મનનો મોરલો
મારો ગાય મલ્હાર
આભ રે વિટાયું અવનિ અંગને
એવા મિલને મગન….. લાગી રે લગન પિયા

-રાજેન્દ્ર શાહ

સ્વર : હેમા દેસાઈ
સ્વરાંકનઃ ક્ષેમુ દિવેટિયા

આજ રિસાઈ અકારણ રાધા…
આજ રિસાઈ અકારણ
બોલકણી એ મૂંગી થઇ ને
મૂંગું એનું મારણ

મોરલીના સૂર છેડે માધવ
વિધ વિધ રીતે મનાવે
નીલ-ભૂરા નીજ મોરપિંછને
ગોરા ગાલ લગાવે
આજ જવાને કોઇ બહાને
નેણથી નીતરે શ્રાવણ

છાની છેડ કરે છોગાળો
જાય વળી સંતાઈ
તોય ન રીઝે રાધા કહાનનું
કાળજું જાય કંતાઈ
થાય રે આજે શામળિયાને
અંતરમાં અકળામણ
રાધા આજ રિસાઈ અકારણ

આજ રીસાઇ અકારણ
રાધા… આજ રિસાઈ અકારણ

-સુરેશ દલાલ

સ્વર : અમર ભટ્ટ
સ્વરાંકન : ક્ષેમુ દિવેટિઆ

માધવ ! વળતા આજ્યો હો !
એક વાર પ્રભુ ખબર અમારી લેતા જાજ્યો હશે

રાજમુગુટ પહેરો કે મોટા કરો ધનુષટંકાર
મોરપિ૨છ ધરી જમુના કાંઠે વેણુ વાજ્યો હો

અમને રૂપ હૃદય એક વસિયું ગમાર કયો તો સહેશું
માખણ ચોરી નાચણ પગલે નેણ લગાજયો હો

રોકી કોણ શકે તમને પ્રભુ રાખી પ્રાણ પરાણે
જોશું વાટ, અમારા વાવડ કદી પુછાજ્યો હો…

-મકરન્દ દવે

સ્વરઃ મૃદુલા પરીખ
સ્વરાંકન :ક્ષેમુ દિવેટિયા

હે સખિ મુને વહાલા રે સુંદર શામળો રે
કે શી કરૂં વ્હાલપણાંની વાત
વિવેકરૂપી વિસરતો નથી કે
ઘડી ઘડી પલ દિન ન રાત

સારા ઉસાસે રાખી મુન સાંભરે
ગોવિંદ ઉપર ઘણો છે ભાવ મુને
એના વિના રે કાંઇ નથી ગમતું
કે લઉં એની સુંદરતાનો લ્હાવ

મનડું માણે છે એની મોહનિય
ચંચળ ચિતડું આરે ચળે નહિ
આંખ તો ઠરી છે એની ઉપર
કે હેત હરી હૃદય કમલની માંહી

પ્રભુજી પધારો મંદિર માંહી
વ્હાલા કેમ વસી રહ્યાં વાટે
નિરાંતના સ્વામી સમરત શ્રી હરિ
કે વ્હાલે મારે પૂરી મનની આશ
હે સખિ મુને

-‘નિરાંત’

સ્વરઃ સુધા દિવેટીઆ
સ્વરાંકન :ક્ષેમુ દિવેટિઆ

 ÷
લક્ષ વિણ  ૯હેરતાં લોલ લહરી લહું
એક સરખું હવે – કે”  કહું   ના  કહું

ગંધકપૂરવત્     વ્યાપતો     તત્ક્ષણે
શબ્દને સહજ જ્યાં  અંગુલીથી ગ્રહું

લેશ અળગું નહીં ૨જ  નહીં  વેગળું
આપમાં  ઓગળે   જે  કંઈ  હું  ચહું

સાંભળું  હું  મને   ગગન   ગોરંભતો
નાભિથી    નેત્રલગ  નાદરૂપે   વહું

આ  તમે   એમ    સંબોધતો   ભલે
જોઉં તો હર પળે હોઉં છું  હું જ હું

–રાજેન્દ્ર શુકલ

સ્વર : શ્યામલ મુનશી અને સૌમિલ મુનશી
સ્વરાંકનઃ ક્ષેમુ દિવેટિયા