હશે મારી દશા કેવી

No Comments

 

હશે મારી દશા કેવી તને સમજાય છે સાકી!
હવે પીધા પછી પણ મારું દિલ ગભરાય છે સાકી.

અસર આવી નથી જોઈ, મેં વર્ષોની ઈબાદતમાં,
ફક્ત બે જામમાં તરત જ જીવન બદલાય છે સાકી.

ભલે એ સત્ય છે, પણ વાત છે જૂના જમાનાની,
નશામાં પણ હવે ક્યાં આદમી પરખાય છે સાકી?

‘મરીઝ’ આવા નશામાં પણ આંખ ઉઘાડી રાખે છે,
ખબર કોને કે એની આંખ ક્યાં મીંચાય છે સાકી

અબ્બાસ વાસી ‘મરીઝ’

સ્વર : ઓસમાન મીર

તું ના કહે હું હા કહું

No Comments

 

તું ના કહે હું હા કહું કેવી અજબ છે જિંદગી
વ્હેતી રહે છે જળ સમી કેવી ગજબ છે જિંદગી

ફરતા ફરે સપનાં સજાવી હાથની રેખા મહીં,
કોને મળેલી પૂછજે મરજી મુજબ છે જિંદગી.

વેરાન રણ શાં વિસ્તરે છે ઝાંઝવાં નજરો મહીં
છીપે તરસ ના તોય પીવાની તલબ છે જિંદગી

હેતાળ જળ શીતળ લઈ વગડે મળે થૈ વીરડી
વેરાન પંથે લાગણી કેરી પરબ છે જિંદગી.

જીવી શકે તું મોજથી લૈ મૌન નો સાગર ભરી,
કૈ રાઝ રાખે છે છુપાવી બાઅદબ છે જિંદગી.

  • કવિ દાજી

સ્વર : પિતાંબર પારઘી

રસ ઘૂંટી, રસપ્રદ બનાવી લ્હાવો લે છે

No Comments

 

રસ ઘૂંટી, રસપ્રદ બનાવી લ્હાવો લે છે
સાચ-જૂઠને ચાવી-ચાવી લ્હાવો લે છે

દંતકથામાંથી એક દોરો ખેંચી કાઢી
અફવાઓ આભે ચગાવી લ્હાવો લે છે

ભલે સત્યના સ્વામી એ કહેવડાવે કિંતુ
હકીકતોને હચમચાવી લ્હાવો લે છે

પરમ પ્રકૃતિપ્રેમીના હક્કદાવા માટે
ઝરણાનું ટેટું ચીપકાવી લ્હાવો લે છે

ઊડી ગયેલા પોપટ સાથે વેર વાળવા
સિતાબાઇ પીંજર પઢાવી લ્હાવો લે છે

સમજીને પોતાને સમકક્ષ મીર-ગાલિબના
વાતે-વાતે નામ વટાવી લ્હાવો લે છે

સો ટચનો કોઇ શબ્દ પારખી તું પણ લઇ જો
જ્યમ તાળું ખુલ્યાનો ચાવી લ્હાવો લે છે

  • સંજુ વાળા

શ્યામ, તને લખવો છે કાગળ,

No Comments

 

 

શ્યામ, તને લખવો છે કાગળ,
પ્રિય લખું? કે ગમશે સખા??
વ્હાલમ્‌ કહું કે સાંવરિયા…

શું લખું તારા નામની આગળ?
શ્યામ, તને લખવો છે કાગળ…

છેડે સખીઓ નામ કહેને
રોકે રસ્તો ઠામ બતાવ કહેને
ક્યાં છે તારો શ્યામ કહેને
કોણ છે તારો પ્રાણ કહેને

બોલું ત્યાં તો વરસે વાદળ
શ્યામ, તને લખવો છે કાગળ…

કાગળમાં બસ શ્યામ લખું?
હૈયે છે તે તમામ લખું?
રોમ રોમ તુજ નામ લખું?
તો કાગળ શું કામ લખું?
પ્રેમબાવરી હું તો પાગલ

શ્યામ, તને લખવો છે કાગળ…

  • ડો નિભા હરિભક્તિ

સ્વર : સાધના સરગમ

હે કૃષ્ણ ! કૃપા વરસાવો

No Comments

 

 

હે કૃષ્ણ ! કૃપા વરસાવો
હે કૃષ્ણ ! કૃપા વરસાવો

હૃદયે બાંધ્યા તોરણ, કહાના, આંખમાં યમુના પૂર
શ્યામનામ ગૂંજે ધબકારે, શ્વાસ વાંસળી સૂર…
કરુણાકર , કરુણા વરસાવો, મારો જીવનદીપ જગાવો…
હે કૃષ્ણ! કૃપા વરસાવો

કરમાં પહેર્યા ભક્તિકંકણ, કંઠે વૈજંતી માળ
નૂપુરે રણકે, રાધા! રાધા! મન મીરાં કરતાલ
કરુણાકર, કરુણા વરસાવો, મારે રૂદિયે રાસ રચાવો…
હે કૃષ્ણ! કુપા વરસાવો

નિકટ નિરંતર રહો નાથ, શાને દર્શનથી હું દૂર?
“હું’ને ભૂલી નિત્ય સાંભળું, તવ મુરલીના સૂર
કરુણાકર, કરુણા વરસાવો, આવો હરિ આવો…
હે કૃષ્ણ! કુપા વરસાવો

– ડો નિભા હરિભક્તિ

સ્વર : અનિકેત ખાંડેકર

થઈ શકે તો બસ ઉથલપાથલ કરો

No Comments

 

 

થઈ શકે તો બસ ઉથલપાથલ કરો, વનને વસ્તી,  શહેરને  જંગલ કરો;
હો શીદને પથ્થર    ઉપાડો છો તમે, પાંપણો ઉંચકો અને  ઘાયલ  કરો.

જ્યાં નિરંતર કોઈનો પગરવ  હશે,
ત્યાં પ્રતીક્ષાનો સતત ઉત્સવ હશે.

લાગણીની     વ્યગ્રતા   છે   ટેરવાં,   બંધ   દ્વારોની વ્યથા  છે  ટેરવાં.
શક્યતા    સબંધની    એમાં     હશે, એક   બારીની  જગા છે  ટેરવાં.
આંખમાં  ભીનાશ જે   ઉભરી હતી, એ  બધી યે  પી  ગયાં છે   ટેરવાં.
ભેદ  જ્યાં  જાણ્યો હથેળીનો   પછી  સાવ  મુંગા થઈ ગયાં  છે  ટેરવાં.

-કૈલાશ પંડિત

સ્વરઃ શેખર સેન
સ્વરાંકનઃ પુરુષોત્તમ ઉપાધ્યાય

એવુંય ખેલ ખેલમાં ખેલી જવાય છે

No Comments

 

 

એવુંય   ખેલ    ખેલમાં    ખેલી    જવાય  છે,
હોતી નથી   હવા   અને   ફેલી   જવાય   છે.

ઊંઘી જવાય છે   કદી  આમ   જ   ટહેલતાં,
ક્યારેક     ઊંઘમાંય    ટહેલી     જવાય   છે.

આવી  ગયો  છું  હું  ય  ગળે   દોસ્તી   થકી,
લંબાવે   કોઈ હાથ   તો   ઠેલી   જવાય   છે.

બલિહારી છે બધીય ગુલાબી સ્મરણ તણી,
આંખો   કરું  છું  બંધ,  બહેલી   જવાય  છે

મળતી રહે  સહાય   નશીલી  નજરની  તો,
આંટીઘૂંટી    સફરની   ઉકેલી    જવાય  છે

લાગે  છે  થાક   એવો   કે   ક્યારેક   વાટમાં
સમજી હવાને  ભીંત   અઢેલી    જવાય   છે.

ઘાયલ ભર્યો છે  એટલો   પૂરો   કરો   પ્રથમ,
અહીંયાં  અધૂરો  જામ ના   મેલી  જવાય છે.

– અમૃત ઘાયલ

સ્વર : દીપ્તિ દેસાઈ
સ્વરાંકન : અમર ભટ્ટ

સાંભરે પ્રથમ મિલનની રાત

No Comments

 

 

સાંભરે પ્રથમ મિલનની રાત, સાંભરે પ્રથમ મિલનની રાત
જેના તે રસ ઢળ્યાં જીવનમાં, જેના તે રસ ઢળ્યાં જીવનમાં
ઊજળાં ઊગ્યાં પ્રભાત
સાંભરે પ્રથમ મિલનની રાત, સાંભરે પ્રથમ મિલનની રાત

ના ના કરતાં, રસથી નીતરતાં, હૈયા ધીમે દબાતાં,
ના ના કરતાં, રસથી નીતરતાં, હૈયા ધીમે દબાતાં
લજ્જાની પાળો તૂટી ત્યાં રસ સાગર છલકાતાં
શીખવે સજન નવીન કોઈ વાત
સાંભરે પ્રથમ મિલનની રાત, સાંભરે પ્રથમ મિલનની રાત

અર્ધ જાગતાં, અર્ધ મીંચાતાં, લોચન નીંદ ન આવે
લોચન નીંદ ન આવે
અણજાણ્યાં અણમાણ્યાં ભાવો આવી પ્રીતમ જગાવે
આવી પ્રીતમ જગાવે
સહેવાઈ હોય એ જાણે મધુરી એ રસધાર

સાંભરે પ્રથમ મિલનની રાત, સાંભરે પ્રથમ મિલનની રાત
જેના તે રસ ઢળ્યાં જીવનમાં, જેના તે રસ ઢળ્યાં જીવનમાં
ઊજળાં ઊગ્યાં પ્રભાત
સાંભરે પ્રથમ મિલનની રાત, સાંભરે પ્રથમ મિલનની રાત

– રસકવિ રઘુનાથ બ્રહ્મભટ્ટ

સ્વરઃ પૌરવી દેસાઈ

મારો સાજન મળ્યો ન મને મેળામાં

No Comments

 

 

હું તો હાટડીએ હાટડીએ ઘૂમી વળી
ને પડી આવી એવી તે કૈંક વેળામાં
મારો સાજન મળ્યો ન મને મેળામાં

ઊભી રહું ક્યાંય તોય આખું ચકડોળ
મને વેળાનું ફરતું દેખાય
ભમતી અભાન હું યે ચૌટે ને ચોકે
અને અણસારો કોઈ ન કળાય

અચકાયું હતું મારું ઓચિતું મન
જેવી નીકળી કે બ્હાર મારા ડેલામાં
મારો સાજન મળ્યો ન મને મેળામાં

લંબાતી જાય વાટ ચાલું ને જેમ જેમ
થાક્યા પહેલા યે હું તો થાકું
જોઈ રહે લોક બધું મારા નસીબ જેવું
રસ્તામાં મારી સામે વાંકું

ફૂલ મને હસતાં
ને કાંટાઓ અટવાયા
નવા રે નક્કોર મારા સેલામાં
મારો સાજન મળ્યો ન મને મેળામાં

– મહેશ શાહ

સ્વરઃ હંસા દવે
સ્વરાંકન: પુરુષોત્તમ ઉપાધ્યાય

તમારી આંખડી

No Comments

 

 

તમારી આંખડી કાજલ તણો  શણગાર માંગે  છે
આ કેવી રોશની છે કે જે સદા અંધકાર માંગે  છે

બતાવો   પ્રેમપૂર્વક  જર્જરિત  મારી  કબર  એને
જ્યારે જાલિમ જમાનો જિંદગીનો સાર માંગે  છે

છે સામે રૂપ કિંતુ આંખ ઊંચી થઈ નથી શકતી
વિજયની છે સરસ બાજી ને હૈયું  હાર  માંગે   છે

‘અમર’નું  મોત  ચાહનારા  લઈ  લો હૂંફમાં એને
મરી જાશે, એ  મરવાને  તમારો  પ્યાર માંગે  છે

– અમર પાલનપુરી

સ્વર-સંગીતઃ હરીશ ઉમરાવ

Older Entries

Contact Us On WhatsApp @Amit Trivedi