ગુજરાતી સાહિત્ય

ઉંબરા  મોઝાર મ્હોર્યો  આંબલો
છાતીની મોઝાર મ્હોરી શાખ રે ……

અવળા તે હાથની આડશ્યું  કરીને કાંઈ
સવળે  પેટાવ્યા દીવા ગોખમાં
નમતાં નેવાંથી ઢળી જાય અંજવાસ એને
કેમ ભર્યો  જય ફૂટી બોખમાં ?
ફળિયું ધીખે ‘ને ધીખે ઓરડો
એન આકરો ધીખે છે વૈશાખ રે…..
છાતીની મોઝાર મ્હોરી શાખ રે ……

હોય  જો  કપાસ એને ખાંતે ખાંતે કાંતીએ
‘ને કમખો વણીને  કાંઈ પ્હેરીએ
માથાબૂડ  આપદાના ઝળુંમ્બ્યાં  રે ઝાડ
ઝીણા  નખ થકી કેટલાંક વ્હેરીએ ?
મોભ રે મૂકીને ઊડ્યો  મોરલો
ભેળી  ઊડી  હાલી બેઉ આંખ રે …
છાતીની મોઝાર મ્હોરી શાખ રે ……

– સંજુ વાળા

સ્વર : ગાર્ગી વોરા
સ્વરાંકન : ડો.ભરત પટેલ

વંદન..વંદન વંદન તુમ્હેં અભિનંદન
દેશકે તુમ સમ્માન હો પ્યારે
દેશકે તુમ અભિમાન ભી હો
દેશકા દિલહો , દેશકી જાઁ હો
તુમ હો દેશકી ધડકન
વંદન તુમ્હેં અભિનંદન

શેરકી હો તુમ દહાડ, બંદે
ગરુડકી હો ઉડાન તુમ
ખડે રહે ચટ્ટાનકી ભાઁતિ
ચ્હેરેકી મુસ્કાન હો તુમ
તુમ હો દેશકા યૌવન
વંદન તુમ્હેં અભિનંદન

આન ,બાન ઔર શાન હમારી
રાહ દેખતા દેશ તુમ્હારી
બાલ ન બાઁકા હોને દેંગે
આશીષ હૈ તુમ્હેં ભારત માઁકી
મંત્ર ગા રહા જનમન
વંદન તુમ્હેં અભિનંદન

હવાસે બાતેં કરતે ઉડના
ચલના યૂઁહિ સીના તાન
વીંગ કમાંડર અભિનંદનકે
રક્ષક પવનપુત્ર હનુમાન
ધન્ય ધન્ય તવ જીવન
વંદન તુમ્હે અભિનંદન

– તુષાર શુક્લ

સ્વર : અમન લેખડિઆ, સત્યને જગીલાલા, નૂતન સુરતી, કેતન પટેલ, પ્રતિષ્ઠા વાઘેલા, દિપ્સા શાસ્ત્રી, હાર્દિક ટેલર, કેયુર વાઘેલા, હર્ષિત બેદ ને સ્વરવૃન્દ

સ્વરકાર : સુનીલ રેવર
સંગીત : સુનીલ રેવર

ચકલામાં ચેતીને ચાલો, નવાઈલાલ !
હોળીનો પૈસો આલો, નવાઈલાલ !

આજે છે રંગ રંગ હોળી, નવાઈલાલ !
આવી ઘેરૈયાની ટોળી, નવાઈલાલ !

ખાવાં છે સેવ ને ધાણી, નવાઈલાલ !
દાણ માગે છે દાણી, નવાઈલાલ !

આવ્યાં નિશાળિયા દોડી, નવાઈલાલ !
શાહીની શીશીઓ ઢોળી, નવાઈલાલ !

ઝાલી છે હાથમાં ઝોળી, નવાઈલાલ !
સિકલ તમારી છે ભોળી, નવાઈલાલ !

જૂની પોતડી પ્હેરી, નવાઈલાલ !
લાગો છો રસિયા લ્હેરી, નવાઈલાલ !

ઊંધી તે પ્હેરી ટોપી, નવાઈલાલ !
હસશે ગામની ગોપી, નવાઈલાલ !

ચશ્માની દાંડી વાંકી, નવાઈલાલ !
આંખોની આબરૂ ઢાંકી, નવાઈલાલ !

ચાલોને ઘેરમાં ફરશું, નવાઈલાલ !
નદીએ નાવણિયાં કરશું, નવાઈલાલ !

કોરા રહેવાની વાત મૂકો, નવાઈલાલ !
આજે દિવસ નથી સૂકો, નવાઈલાલ !

મૂછોમાં બાલ એક ધોળો, નવાઈલાલ !
કાળા કલપમાં બોળો, નવાઈલાલ !

કૂવાકાંઠે તે ના જાશો, નવાઈલાલ !
જાશો તો ડાગલા થાશો, નવાઈલાલ !

આજે સપરમો દા’ડો, નવાઈલાલ !
લાવો ફાગણનો ફાળો, નવાઈલાલ !

ચકલામાં ચેતીને ચાલો, નવાઈલાલ !
હોળીનો પૈસો આલો, નવાઈલાલ !

– વેણીભાઈ પુરોહિત

સ્વર : નિશા કાપડિયા

લંબચોરસ ઓરડામાં એક સમય  ઘૂંટાય છે,
વક્ર. રેખાઓ ક્ષણોની શ્વાસમાં   છેદાય  છે.

શક્યતાનું એક પણ  વર્તુળ નથી   પૂરું  થતું,
હર ક્ષણે કંપાસની તીણી અણી ભોંકાય છે.

ચાલ, સંબંધોનું કોઈ  કોણમાપક   શોધીએ,
કે  હૃદયને   કેટલા   અંશો સુધી   છેદાય  છે.

બે સમાંતર રેખની વચ્ચેનો  હું  અવકાશ છું,
શૂન્યતાની  સાંકળો   મારા  વડે  બંધાય  છે.

આરઝૂના    કાટખૂણે   જિંદગી   તૂટી   પડે,
ને પછી એ   મોતના બિંદુ  સુધી  લંબાય છે.

– નયન દેસાઈ

સ્વર અને સ્વરાંકન : શ્યામલ સૌમિલ મુન્શી

અહો     શ્વાસ     મધ્યે   વસંતો   મહોરી,
ઊડે    રંગ   ઊડે   ન   ક્ષણ   એક  કોરી!

ઊડે    દૂરતા   ને   ઊડે    આ    નિકટતા,
અહીં  દૂર   ભાસે,   ત્યહીં  સાવ   ઓરી!

ઊડે આખ્ખું    હોવું    મુઠીભર   ગુલાલે,
ભીંજે પાઘ મોરી,   ભીંજે   ચુનરી  તોરી!

ઊડે છોળ   કેસરભરી    સર  સરર. સર,
ભીંજાતી    ભીંજવતી.   ચિરંતનકિશોરી!

સુભગ આપણો સ્વર બચ્યો છે સલામત,
ગઝલ     ગાઈયેં,    ખેલિયેં ફાગ,   હોરી!

– રાજેન્દ્ર શુક્લ

સ્વર અને સ્વરાંકન : અમર ભટ્ટ