સીતા કહે રામ ને

No Comments

સીતા કહે રામ ને
પૂછો ઘનશ્યામ ને

રાધા ને ગોપી સંગ રાસ કેમ રમાય ?
અમૃત થઇ મીરાં ના હોઠ કેમ ચુમાય !

લાજ લૂટે પાંચાલીની સભામાં દુશાસન તો
સખા થઇ ચીર એના કેમ રે પુરાય
સીતા કહે રામ ને પૂછો ઘનશ્યામ ને …

તનમનથી સંગ તમારી ફરી હું તો વન માં
કોઈની વાતે વ્હાલા શંકા ન કરાય
પ્રેમ ના ઝૂલે કેવા ઝૂલે કાન રુક્ષ્મણી
શીખો તમે સીતા નો હાથ કેમ ઝલાય
સીતા કહે રામને પૂછો ઘનશ્યામ ને …

બીજા ભવે અવતરજો શ્યામ રૂપે રામજી
વાંસાળીના સૂર રૂડાં શ્ચાસે રેલાય

અયોધ્યાની શેરીઓમાં સોળે શણગાર સજી
સંગ તમારી રસબર રાસે રમાય
સીતા કહે રામને પૂછો ઘનશ્યામ ને .…

-રમેશ ચૌહાણ

સ્વર : ઓસમાણ મીર

દીવા હતા ખામોશ

No Comments

દીવા હતા ખામોશ પણ ,મુજ દિલ તણા અજવાસ માં ,
પ્હોંચી ગયાતા આખરે , તે ઘર સુધી અંધાર માં .

આવ્યા કદી થઇ અપ્સરા , સ્વપ્નો મહી છુપાઈ ને ,
પરદો કરી આવે ઘડી ને જાય છે પલકાર માં .

વિશ્વાસ મૂકી ઝંપલાવ્યું મેં હતું જે નાવ પર ,
ડૂબ્યો હતો તેના જ વિશ્વાસે પછી મજધાર માં .

જો શર્ત પર ચાલ્યા અમે મંઝિલ ક્ષિતિજ બનતી ગઈ
શર્તો વગર ચલ ચાલીએ શું કામ એનું ચાહ માં

આંખો મહી યાદો મહી આવી વસ્યા છો શ્વાસ માં
થઈ લાગણી ધબક્યા કરો છો મુજ દિલ તણા ધબકારમાં ..

-રમેશ ચૌહાણ

સ્વર : સૌમિલ મુનશી
સ્વરાંકન : શ્યામલ સૌમિલ મુનશી
સંગીત : રાહુલ મુંજારિયા

તમે સાંજે મળો તો

No Comments

તમે સાંજે મળો તો મને એકલા મળો
કે મારા દિવસ આખાને વળે હાશ :
આવનારી રાતના ઝુમ્મરમાં સળગે નહીં
ઉન્હા ઉજાગરાની પ્યાસ.

આંખો મીંચાય, પછી શમણું ઊગે
એ તો નીંદરમાં બાવળની શૂળ;
ઝાંઝવાની જીવલેણ નદીયું પર બાંધો નહીં
વાયદાના ભાંગેલા પુલ :

એવી તે વાવી કઇ જીવતરમાં ભૂલ
કે તમે મળવામાં આટલા ઉદાસ !

ધોધમાર તડકો કંઇ આછો થયો
અને સાંજની હવા તે બહાવરી;
કાળીકાળી વાદળી ખુલ્લા આકાશમાં
વરસી નહીં કે નહીં આછરી

આદરેલી વાત તમે અધવચ્ચે આંતરી
ને શબ્દોના ટૂંપાયા શ્વાસ !

– જગદીશ જોષી

સ્વર :કૃષાનુ મજમુદાર
સ્વરાંકન :સંજીવ મુનશી

તમે રે અષાઢી નભના વાદળાં વ્હાલમ

No Comments

તમે રે અષાઢી નભના વાદળાં વ્હાલમ
અમે ધરતીની તરસી ધૂળ રે
તમારે સ્નેહે મધુરું મ્હેંકીએ

તમે રે મ્હોરેલા ચ્હેરા આભલા વ્હાલમ
અમે કાળી કોયલડીનો કંઠ
તમારે કાજે રે મીઠું કુંજીએ હોજી

તમે રે આંગળીઓ બજવણ હારની વ્હાલમ
અમે રે તંગ સિતારના તાર
તમારે અડકે રે મધુરું ગુંજીએ હોજી

તમે રે મંદિર કેરી મૂર્તિયું વ્હાલમ
અમે સૂકી સળકડી ના ધૂપ
તમારે કાજે મીઠું ધૂપીએ હોજી

-બકુલા પુરુરાજ જોશી

સ્વર : ડો સાવનિ દિવેટિયા શાહ
સ્વરાંકન : રાસબિહારી દેસાઇ

વહાલપ નું નામ એ તો મધમીઠું નામ

No Comments

વહાલપ નું નામ એ તો મધમીઠું નામ
એને બોલું તો કેમ કરી બોલું
ઉરનું આ દ્વાર એ તો પ્રીતમ નું ધામ
એને ખોલું તો કેમ કરી ખોલું

તમે બોલ્યા જ્યાં નામ હું તો ભૂલી પડી
હુ તો સમણામાં ક્યાંય ક્યાંય ઘૂમી વળી
અરે મનથી એ નામ મીઠું ચૂમી વળી
સોના નું નામ મારું પાડેલું નામ
એને બોલું તો કેમ કરી બોલું

મારા મનની મંજૂષા ની મોંઘી મૂડી
કોઈ બોલે જ્યાં નામ મારી ખનકે ચૂડી
મને પાંખો ફૂટે અને હું તો જાઉં ઉડી
મારા મનના ગોકુળીયામાં નટખટ નું નામ
એને બોલું તો કેમ કરી બોલું

  • સુધીર દેસાઈ

સ્વર : પૌરવી દેસાઈ
સ્વરાંકન : રાસબિહારી દેસાઇ ( મુંબઈ )

.

Older Entries

Contact Us On WhatsApp @Amit Trivedi