ગુજરાતી સાહિત્ય

તમને સમય નથી અને મારો સમય નથી
કોણે કહ્યું કે આપણી વચ્ચે પ્રણય નથી

રોકી રહી છે તમને તમારી શરમ અને
મારા સિવાય મારે બીજો કોઈ ભય નથી

વિસરી જવું એ વાત મારા હાથ બહાર છે
ને યાદ રાખવું એ તમારો વિષય નથી!

હું ઈન્તેજારમાં અને તમે હો વિચારમાં
એ પણ છે શરૂઆત કંઈ આખર પ્રલય નથી

-બાપુભાઈ ગઢવી

સ્વર : પુરૂષોત્તમ ઉપાધ્યાય
સ્વરાંકન : પુરૂષોત્તમ ઉપાધ્યાય

સુખના વનમાં દુ:ખના વનમાં અહો – અરે કઠિયારા રે.
સપનાંઓની ભારી બાંધી દિવસે જોતાં તારા રે,

માથા ઉપર ભારી મૂકી પગને તળિયે ભાર રે .
લખચોરાશીના ચક્કરમાં ફેરા વારંવાર રે.

દુ:ખ વળગે છે સુખ સળગે છે, ઊડે છે અંગારા રે;
સુખના વનમાં દુ:ખના વનમાં અહો – અરે કઠિયારા રે.

કોઈ નથી આરોઓવારો ક્યાં મૂકવાનો ભારો રે ?
સાથ નથી સંગાથ નથી ને કોઈ નથી સધિયારો રે.

અમે અમારા નહીં રહ્યા કે નહીં રહ્યા તમારા રે;
સુખના વનમાં દુ:ખના વનમાં અહો – અરે કઠિયારા રે.

-કિશોર શાહ

સ્વર : દિતી અને કૃશાનુ મજમુદાર
સ્વરાંકન : કૃશાનુ મજમુદાર