જરાય દોસ્તો ખબર નથી કે

No Comments

જરાય દોસ્તો ખબર નથી કે, અમોને શાની સજા મળી છે
કશુંય તહોમત નથીજ માથે, વગર ગુનાની સજા મળી છે

વિનમ્ર થઈ ને કદાપી એકેય કરી ના ફરિયાદો જિંદગીમાં
રહી રહી ને ખબર પડી કે, ન બોલવાની સજા મળી છે

ઘણીય વેળા ઊભા રહ્યા તો, અશક્ત માની હટાવી દીધા
ઘણીય વેળા સમયથી આગળ વધુ થવાની સજા મળી છે

અમારા ઘરમાં અમારા અવસર ઉપર નિમંત્ર્યા બધાને કિંતુ
હવે અમારી સભાથી અમને વહી જવાની સજા મળી છે

-મનોજ ખંડેરિયા

સ્વર : અમર ભટ્ટ
સ્વરાંકન : અમર ભટ્ટ

આંખોનો ભેદ આખરે…

No Comments

આંખોનો ભેદ આખરે ખુલ્લો થઇ ગયો.
બોલ્યા વિના જ હું બધે પડઘો થઇ ગયો.

આ એ જ અંધકાર છે કે જેનો ડર હતો.
આંખોને ખોલતાં જ એ તડકો થઇ ગયો.

જળને તો માત્ર જાણ છે, તૃપ્તિ થવા વિષે.
મૃગજળને પૂછ કેમ હું તરસ્યો થઇ ગયો.

તારી કૃપાથી તો થયો કેવળ બરફનો પહાડ
મારી તરસના તાપથી દરિયો થઇ ગયો.

મસ્તી વધી ગઇ તો વિરક્તિ થઇ ગઇ
ઘેરો થયો ગુલાલ તો ભગવો થઇ ગયો.

-જવાહર બક્ષી

સ્વર : આલાપ દેસાઈ
સ્વરાંકન : આશિત દેસાઈ

હંસલો પિંજરે પુરાણો ગુરુજી

No Comments

હંસલો પિંજરે પુરાણો ગુરુજી, મારો હંસલો પિંજરે પુરાણો
કાયાનું કોડિયું ઝોલાં રે ખાતું ને આતમડો મૂંઝાણો..

પળ પળ છળતી મૃગજળ સમ આ સંસારી જાત
હોય ભલે રાણીનો જાયો સૌને માથે કાળ
જે આવે તે જાય એટલું જાણો.. ગુરુજી મારો..

બાંધ ગઠરિયા પાપ-પુણ્યની, જાવું સામે પાર
ઉપર ફૂલ નીચે કાંટા, અવળો આ સંસાર
કાયાનો કાચો તણો વાણો.. ગુરુજી મારો..

-અવિનાશ વ્યાસ

સ્વર : આલાપ દેસાઈ
સ્વરાંકન : ગૌરાંગ વ્યાસ

હું મારી મરજીમાં નૈ

No Comments

હું મારી મરજીમાં નૈં
હરિજી, મુંને એવી મોહાડી ગયા, સૈ 

હું શું વરસું? હું શું રેલું? હું શું ઢોળું, તિયાં ?
મન મારું એક જળનો ખોબો – જગજીવન પી ગિયા 
સાટામાં મને સતપત ઉજાગરાઓ દૈ.

મીરાં કે પ્રભુ, રમવા આજ્યો ઉતાવળા રથ જોડી
 હું અરધી ચોપાટે પટમાં પડી રહેલ કોડી 
ખોબામાં તમે ઢાંકો, રમાડો મુંને લૈ.

-રમેશ પારેખ 

સ્વર : ઐશ્વર્યા મજમુદાર
સ્વરાંકન : અમર ભટ્ટ

ઘૂંઘટે ઢાંકયું રે…

No Comments

ઘૂંઘટે ઢાંક્યું રે એક કોડિયું..
હે..હું તો નીસરી ભર બજાર જી..
લાજી રે મરું ..મારો સાયબો ખોવાયો..
કોને કહું આવી વાત જી..
ઘૂંઘટે ઢાંક્યું રે એક કોડિયું

ટોડલે ટોડલે મેં તો તોરણો બાંધ્યા..
મારે મેઢિયું ઝાક ઝમાળજી રે…
હે..જોબન ઝરુખે રુડી ઝાલરૂં વાગે
ઝાંઝર, ઘૂંઘર, માળ જી..
ઘૂંઘટે ઢાંક્યું રે એક કોડિયું …

રાત ઢળીને ઘેરા ઘડીયાળા વાગ્યા
અને પ્રાંગણનાં ફૂટયાં ફૂટ્યા દોરાજી રે..
હે…તો’ય ના આવ્યો, મારો સાયબો સલૂણો
જાગી આઠે પહોરજી…
ઘૂંઘટે ઢાંક્યું રે એક કોડિયું …!

-ચતુર્ભુજ દોશી

સ્વર : સાધના સરગમ
સ્વરાંકન :અવિનાશ વ્યાસ

અમને કોની રે સગાયું

No Comments

અમને કોની રે સગાયું આજ સાંભરે
ઊંડે તળિયાં તૂટે ને સમદર ઊમટે
કોઈ પાળ્યું રે બંધાવો ઘાટે ઘોડા દોડાવો
આઘે લેર્યુંને આંબી કોણ ઊઘડે
અમને કોની રે સગાયું આજ સાંભરે

આજ ખોંખારા ઊગે રે સૂની શેરીએ
ચલમ તણખા ઊડે રે જૂની ધૂણીએ
અમને દાદા દેખાય પેલી ડેલીએ…. અમને

માડી વાતું રે વાવે આ ઉજ્જડ ઓટલે
ખરતાં હાલરડાં ઝૂરે રે અધ્ધર ટોડલે
ઊંચે મોભને મારગ કોણ ઊતરે    ….. અમને

કોઈ કૂવા રે ગોડાવો, કાંઠે બાગો રોપાવો,
આછા ઓરડીયા લીંપાવો ઝીણી ખજલિયું પડાવો
આજે પરસાળ્યું ઢાળી સૌને પોંખીએ..
અમને સાચી રે સગાયું પાછી સાંભરે

-દલપત પઢિયાર

સ્વર: અમર ભટ્ટ
સ્વરાંકન : અમર ભટ્ટ

સાધો, તંબૂર પણ તરફડશે

No Comments

 સાધો, તંબૂર પણ તરફડશે
ભજનના એક જ ઘૂંટડા સારુ હરિ ઘૂંટણિયે પડશે.

મદિરા ભેગું મુરશિદ તેં
એવું શું દીધું પાઈ,
સાકી ને સાખીમાં અમને
ભેદ દીસે ના કાંઈ;
ભગતિનો પરસેવો સૂંઘી લીલાપુરુષ લડખડશે.

ખર્યા પાંદ પર દિકપાલે
બેસાડ્યા ચોકીપ્હેરા,
કરે ઠેકડી એક જ હળવી
મલયપવનની લ્હેરા;
ફરી વળગશે દીંટે જો હડફેટે સંતન ચડશે

-હરીશ મીનાશ્રુ

સ્વર : નિધિ ધોળકિયા
સ્વરાંકન : ડો. ભરત પટેલ

તે છતાં મારી તરસ

No Comments

તે છતાં મારી તરસ તો ક્યાં કદી છીપી હતી,
આમ ઊભાઊભ મેં આખી નદી પીધી હતી.

પાંદડા ભેગાં કરીને જેમ દરજીડો સીવે,
એમ મેં તૂટી ગયેલી કૈંક ક્ષણ સીવી હતી.

આભ આખું એકદમ તૂટી પડ્યું તો શું થયું?
વેદના વરસાદની માફક અમે ઝીલી હતી.

ટ્રેન ઊભી હોય શબવત્ રાહમાં સંકેતની,
જિંદગી આખીય મારી એ રીતે વીતી હતી

ત્યારથી હું હર સમય મારા નશામાં હોઉં છું,
શૂન્યતાની એક પ્યાલી એમણે દીધી હતી.

-હર્ષ બ્રહ્મભટ્ટ

સ્વર : આલાપ દેસાઈ
સ્વરાંકન : આશિત દેસાઈ

Contact Us On WhatsApp @Amit Trivedi