પળ છું નાજુક ઉઠાવ ધીમેથી

No Comments

પળ છું નાજુક ઉઠાવ ધીમે થી ,
આંખમાં તું સમાવ ધીમે થી ,

એ ભલે હોય જળ કે હો મૃગજળ,
કોઈ આવે છે નાવ ધીમે થી ,

શબ્દ વચ્ચે નું મૌન પણ સાંભળ ,
અર્થ જેવું બિછાવ ધીમે થી,

ક્યાંક ઠેબે ચઢું ન એ બીકે
હું કરું આવજાવ ધીમે થી,

માંડ નીરવ થયો અવાજો માં ,
તું મને ખળભળાવ ધીમે થી.

વ્હાણ જેવો હું હોઉં દરિયાનું ,
૨ણમાં મુજને ચલાવ ધીમે થી

એમ તારા વિચારમાં હું છું,
જેમ વહેતી હો નાવ ધીમે થી ,

ક્યાંક મારો અભાવ લાગે તો,
આ ગઝલ ગુનગુનાવ ધીમે થી,

-મહેશ દાવડકર

સ્વરઃ અમન લેખડિયા
સ્વરાંકન : હરીશ ઉમરાવ

કોઈનું પણ આંસુ લૂછ્યું હોય તે…

No Comments

કોઈનું પણ આંસુ લૂછ્યું હોય, તે બેસે અહીં,
ને પછી છાતીમાં દુઃખ્યું હોય, તે બેસે અહીં.

હાથ વચ્ચે નામ ઘૂંટ્યું હોય તે બેસે અહીં,
ને અદબથી એને ભૂસ્યું હોય તે બેસે અહીં.

સૂર્ય તપતો હોય એનો મધ્યમાં ને તે છતાં,
કોઈનાં ચરણોમાં ઝૂક્યું હોય, તે બેસે અહીં.

હાથ પોતાનોય બીજો જાણવા પામે નહીં,
કીડિયારું એમ પૂર્યું હોય તે બેસે અહીં.

એટલો લાયક ખરો કે હું અહીં બેસી શકું ?
એટલું પોતાને પૂછ્યું હોય તે બેસે અહીં.

જે ક્ષણે પોતાને પૂછ્યું હોયની બીજી ક્ષણે,
આ સભામાંથી જે ઊઠ્યું હોય, તે બેસે અહીં.

– સ્નેહી પરમાર

સ્વર : પિયુષ દવે
સ્વરાંકન : ડો ભરત પટેલ

માધવ હું તમારી મીરાં

No Comments

માધવ હું તમારી મીરાં
ઓળખ માટે ઘૂંઘરું આપું
દઇ દઉં નયન અધીરાં

ઝેર પીધું તે ઓછું છે કે
હવે જુઓ છો ત્રાસું
આંખોમાં તો જુઓ ક્યારનું
ડળક ડળક ચોમાસું
એકવાર તો મળી જાઓ ને
યમુનાજીને તીરાં

મોરપીંછ નો મંડપ બાંધી
લગન કર્યા’તા શ્યામ
સાવ અજાણ્યા થઇ ને આજે
પૂછો કાં મારું નામ !
આમ પૂછીને તમે જ આપણાં
તોડીયાં રે મંદિરાં

– સુરેશ દલાલ

સ્વર : પ્રગતિ વોરા
સ્વરાંકન : રાજેશ પઢારિયા

Contact Us On WhatsApp @Amit Trivedi