ગુજરાતી સાહિત્ય

પાનખરની શુષ્ક્તા પથરાય આસપાસ
પાંપણે તારું સ્મરણ છલકાય આસપાસ

સ્વપ્નમાં ચીતરી રહું લીલાશને હજી
ત્યાં ખરે તુજ નામના ટહુકાઓ આસપાસ

છાલકો પગરવ તણી વાગે છે ક્યારની
ધારણા રેતી બની પથરાય આસપાસ

દર્પણો ફૂટી ગયા સંબંધનાં હવે
ને પછી ચેહેરા બધા તરડાય આસપાસ

પાનખરની શુષ્ક્તા પથરાય આસપાસ
પાંપણે તારું સ્મરણ છલકાય આસપા

-વિહાર મજમુદાર

સ્વર : ગાર્ગી વોરા
સ્વરાંકન : વિહાર મજમુદાર – નિનાદ મહેતા

ઓ ગોકુળ નિવાસી, આવો વ્યાકુળ પાસે,
ઓ ગોકુળ નિવાસી કહાન કયા આવો વ્યાકુળ પાસે-
હું તો તુજની પ્યાસી, ઓ ગોકુળ નિવાસી

જમના ઘાટે, ગોકુળ વાટે,
અંતર કેરી પ્રેમલ જ્વાળે
ઢૂંઢી રહી છું વાટે ઘાટે
ઓ ગોકુળ નિવાસી-

વૃંદાવનની કુંજ ગલીમાં
શ્રાવણ વર્ષાની હેલીમાં.
ઘૂમી રહી છું નિર્જન સ્થળમાં
ઓ ગોકુળ નિવાસી-

આવી મુજની પ્યાસ છીપાવો
પ્રીતમ કહાના હાસ્ય રેલાવો
વર્ષારાતે ક્યાં તલસાવો?
ઓ ગોકુળ નિવાસી-

હું તો મુજની પ્યાસી-

-ભૂપેન્દ્ર વકીલ

સ્વર : શૌનક પંડ્યા
સ્વરાંકન : સુનિલ રેવર

વાયોલીન – ઉ. હપુખાન
ગીટાર – રમેશ તેલંગ
તબલા – દુર્ગાપ્રસાદ મહારાણા
આલ્બમ : ઉરમાં ગુંજારવ

એટલું ટપકાવવાનું નોંધમાં,
સુખ નથી મળતું, નકામું શોધ માં.

સાવ સાચો હું મને લાગ્યા કરું,
હોય છે જ્યારે બધા વિરોધમાં.

એક સમજણ આજ લગ સાથે હતી,
એ ય વહી ગઈ લાગણીના ધોધમાં.

પ્રેમ કે આદર ન સ્પર્શે જેમને,
છોડ, તું એને કશું સંબોધ મા.

આચરણથી એ ગળે ઊતરી જશે,
જે નથી શીખવી શકાયું બોધમાં.

ખૂબ ઝડપી દોડ થાતી જાય છે,
જ્યારથી દુનિયા ખડી અવરોધમાં.

: હિમલ પંડ્યા

સ્વરઃ ડો ભરત પટેલ
સ્વરાંકન : ડો ભરત પટેલ