અંતરના પાને હળવેથી

No Comments

અંતરનાં પાને હળવેથી અંકાયા સ્વર અક્ષર;
સૂર-શબ્દના થાય હૃદય પર સહિયારા હસ્તાક્ષર;
એવા આ હસ્તાક્ષર.

વતન તણી માટીની ફોરમ ભીંજવી દેતી ભીતર;
ફૂલ-ફૂલની ઓળખ લઇને ખુશ્બુ વહેતી ઘર ઘર;
સમય ભલેને સરી જાય પણ અમર રહે સ્વર અક્ષર;
સૂર-શબ્દના થાય હૃદય પર સહિયારા હસ્તાક્ષર;
એવા આ હસ્તાક્ષર.

એક જ નાની ફૂંક વહે ને એક બંસરી વાગે;
એક જ પીંછીં રંગ ભરે ને દ્ર્શ્ય સજીવન લાગે;
કંઠ એક જો બને પૂજારી ગીત બને પરમેશ્વર;
સૂર-શબ્દના થાય હૃદય પર સહિયારા હસ્તાક્ષર;
એવા આ હસ્તાક્ષર.

-તુષાર શુક્લ

સ્વર : જગજીત સિંહ
સ્વરાંકન : શ્યામલ સૌમિલ મુનશી

સાવ અમસ્તું નાહક નાહક

No Comments

સાવ અમસ્તું નાહક નાહક નિષ્ફળ નિષ્ફળ રમીએ,
ચાલ મજાની આંબાવાડી! આવળબાવળ રમીએ.

બાળસહજ હોડી જેવું કંઈ કાગળ કાગળ રમીએ,
પાછળ વહેતું આવે જીવન, આગળ આગળ રમીએ.

માંદા મનને દઈએ મોટું માદળિયું પહેરાવી,
બાધાને પણ બાધ ન આવે, શ્રીફળ શ્રીફળ રમીએ.

તરસ ભલેને જાય તણાતી શ્રાવણની હેલીમાં,
છળના રણમાં છાનાંમાનાં મૃગજળ મૃગજળ રમીએ.

હોય હકીકત હતભાગી તો સંઘરીએ સ્વપ્નાંઓ,
પ્રારબ્ધી પથ્થરની સાથે પોકળ પોકળ રમીએ.

ફરફર ઊડતું રાખી પવને પાન સરીખું પહેરણ,
મર્મર સરખા પારાવારે ખળખળ ખળખળ રમીએ.

હું ય ‘ગની’, નીકળ્યો છું લઈને આખોમાખો સૂરજ,
અડધીપડધી રાત મળે તો ઝાકળ ઝાકળ રમીએ.

-ગની દહીંવાલા

સ્વરઃ ઐશ્વર્યા મજમુદાર
સ્વરાંકન : ગૌરાંગ વ્યાસ

નહીં કરું ગુસ્સો હવે

No Comments

નહીં કરું ગુસ્સો હવે,
હાથ તો છોડો હવે.

ભાર લાગે છે મને,
પાંપણો ઉંચકો હવે.

હા ભલે મળશું નહીં,
ફોન તો કરજો હવે.

ફૂલ જેવું ક્યાં રહ્યું,
ઘાસને સુંઘો હવે.

વાર તો અહીંયા નથી,
ભીંતથી નીકળો હવે.

-કૈલાસ પંડિત

સ્વરઃ હેમા દેસાઈ
સ્વરાંકનઃ આશિત દેસાઈ

Contact Us On WhatsApp @Amit Trivedi