મહેકની માફક

Comments Off on મહેકની માફક

 

 

મહેકની  માફક   ફૂલો     વચ્ચે   ફરીશું
ક્યાં   સુધી   ભમરો   બનીને   કરગરશું

સૂર્ય   કહે  છે  આગિયાઓને  લીધે  છું
વાત  આ  સાચી  હશે  તો   શું   કરીશું

એક   હોડી   ક્યારની  જીદે   ચઢી  છે
સહેજ પણ પાણી નથી તો પણ તરીશું

– અંકિત ત્રિવેદી

સ્વર :આલાપ દેસાઈ
સ્વરાંકન : આલાપ દેસાઇ
સંગીત : દર્શન ઝવેરી

સોના વાટકડી જેવું આ કાળજું

Comments Off on સોના વાટકડી જેવું આ કાળજું

 


 

સોના વાટકડી જેવું આ કાળજું
ને યાદનું કેસર ઘોળ્યા કરું,
આંખની સામે જે ચહેરો હતો.
એ ચહેરાને હું તો ખોળ્યાં કરું .

સાંજનું ઉદાસ આ કેવું આકાશ
અમે ઊડેલાં પંખીને ગોતી ૨હ્યાં.
સૂમસામ પડી છે તારી પથારી
મારા તકિયા પર આંસુઓ મોતી થયાં
મનમાં ને મનમાં હું તારા આ નામને
એકલી ને એકલી બોલ્યાં કરું.

બારણાની બ્હાર આ રસ્તો પડ્યો છે
પણ ચાલવાનું મન મને થાતું નથી .
કંઠમાં અધવચ્ચે અટકયું છે ગીત
પણ ગાવાનું મન મને થાતું નથી .
કયારનો ઉજાગરાનો દીવો બળે છે :
કહે, દીવાને કેમ કરી ઓલવ્યાં કરું.

-પન્ના નાયક

સ્વરઃ પૌરવી દેસાઈ
સ્વરાકંન : ક્ષેમુ દિવેટિયા

@Amit Trivedi