શું નવો સંકલ્પ લઉં હું

No Comments

શું નવો સંકલ્પ લઉં હું આવનારા વર્ષમાં?
એટલું ચાહું વીતે એ અન્યના ઉત્કર્ષમાં.

પ્રેમ, શ્રદ્ધા, લાગણી, સંવેદના, સંસ્કારિતા,
આટલું ભરચક રહે અસ્તિત્વ કેરા પર્સમાં.

એકસરખી તો દશા કાયમ નથી રહેવાની, પણ-
એકસરખું હો વલણ તકલીફમાં ને હર્ષમાં!

છો ખૂટી જાતું બધું જે કાંઈ છે ભેગું કર્યું,
એક બસ હિમ્મત ખૂટે નહીં આકરા સંઘર્ષમાં.

જિંદગી હારી ચૂકેલાને ફરી બેઠો કરું*!
એટલી તાકાત પામું શબ્દમાં ને સ્પર્શમાં.

કૈંક તારું, કૈંક મારું, પણ બધું એનું જ છે,
આ ભરોસો, આ સમજ બસ કેળવું નિષ્કર્ષમાં.

— હિમલ પંડ્યા

ના બોલાય રે ના બોલાય…

No Comments

ના બોલાય રે ના બોલાય રે
એક અમી ભરપૂર ઉરે તવ
સોમલ કેમ ઘોળાય રે ……ના બોલાય

તારે હાથે પ્રિય મેં જ ધર્યો હતો
મેંદીએ રંગીન હાથ
અંગથી અંગ અડાડી ભર્યા નીલ
કુંજ મહીં ડગ સાથ
રંગ સુગંધની સોડ તણી અવ
વાત એ કેમ ખોલાયરે…..ના બેલાય

સ્હેજ અડે મૃદુ આંગળી ત્યાં
રણકે મધુરો ઝણકાર
એજ વીણા તણી તાંત તૂટી
બનિયો મૂક રે અવતાર
વાણી મહીં નહીં આંસુ મહીં નહીં
ઠાલવું અંતર આગ
આગની સંગ ઉમંગ ભર્યો લહુ
જીવનનો અનુરાગ
પ્રેમ પિયા ! તવ પૂજન ફૂલ શો
આંચમાં કેમ રોળાયરે……. ના બેલાય

-રાજેન્દ્ર શાહ

સ્વરઃ અલકા યાજ્ઞિક
સ્વરાંકન : ક્ષેમુ દિવેટિયા

સૌજન્ય : માલવ દિવેટિયા

કોણ જાણે કેમ કલમ શાંત પડી છે

No Comments

 
 


 

અસીમ મહેતા

 

કોણ   જાણે   કેમ  કલમ   શાંત  પડી  છે
ને  આમ તો એ કાલ આખી રાત રડી  છે

જીવન   ગુજારતા એક ઉંમર   જતી  રહી
ને  હવે   થાય  છે  એવી  પહેલી ઘડી  છે

પાષાણ હોત તો બધું આસાન થઈ  જતે
સંવેદના  જીવનમાં  મને  ખૂબ   નડી  છે

બધાં   બધાં   ને   એજ   પૂછ્યા  કરે  છે
તારી   કે   મારી   અહીં    કોને   પડી છે

– ડો. ફિરોઝ કાજી

સ્વરઃ અસીમ મહેતા
સ્વરાંકન : અસીમ મહેતા

લીલો રે રંગ્યો…

No Comments


 
 

   

લીલો રે ૨ંગ્યો જેણે પોપટ
ધોળો કીધો જેણે હંસ
સઘળે તે રંગે ચીતર્યો મોરલો
એને ઓળખવો છે અંશ
નજરું નાંખી આખા આભલે
જેની ભરી રે ભૂરાશ
જલનો લાગ્યો મીઠો ઘૂંટડો
માણી આંબળાની તૂરાશ
હે જી લીલો રે રંગ્યો

કાનજીની કાયા ગણું કેટલી
ધર્યું રાધાનું ય રૂપ
શબદુનો સાદ નહીં પ્હોંચતો
મારી રસના તો અવ ચૂપ
હે જી લીલો રે રંગ્યો

-પ્રિયકાન્ત મણિયાર

સ્વર : ભુપિન્દરસીંઘ
સ્વરાંકન : ક્ષેમુ દિવેટિયા

સૌજન્ય : માલવ દિવેટિયા

ચન્દ્રીએ અમૃત મોકલ્યાં

No Comments

ચન્દ્રીએ અમૃત મોકલ્યાં, રે બ્હેન!
ફૂલડાંકટોરી ગૂંથી લાવ,
જગમાલણી રે બ્હેન!
અમૃત અંજલિમાં નહિ ઝીલું, રે બ્હેન!

અંજલિમાં ચાર-ચાર ચારણી, રે બ્હેન!
અંજલિમાં છૂંદણાંના ડાઘ :
જગમાલણી રે બ્હેન!
અમૃત અંજલિમાં નહિ ઝીલું, રે બ્હેન!

ઝીલું નહીં તો ઝરી જતું, રે બ્હેન!
ઝીલું તો ઝરે દશ ધાર :
જગમાલણી રે બ્હેન!
અમૃત અંજલિમાં નહિ ઝીલું, રે બ્હેન!

ફૂલડાંમાં દેવની હથેળીઓ, રે બ્હેન!
દેવની કટોરી ગૂંથી લાવ :
જગમાલણી રે બ્હેન!
અમૃત અંજલિમાં નહિ ઝીલું, રે બ્હેન!

-ન્હાનાલાલ કવિ

સૌજન્ય : સંજય રાઠોડ સુરત

Older Entries Newer Entries

@Amit Trivedi