એક કાગળ, એક કલમ, કંપન ભરેલું કાળજું

Comments Off on એક કાગળ, એક કલમ, કંપન ભરેલું કાળજું

 

 
એક કાગળ, એક કલમ, કંપન ભરેલું કાળજું,
વચ્ચે એક કવિતાનું, અમથું અમથું શરમાવવું.

વાસંતી વાયરામાં, પુષ્પોનું લહેરાવવું,
ટહુકે કોયલના, સરગમનું સર્જાવવું,
વચ્ચે એક શાયરનું, અમથું અમથું ભમરાવવું…

રાતે, હોઠોનું, ધીમું ધીમું મુસ્કુરાવવું,
પરોઢે ગઝલનું ગેસુમાં ગુંથાવવું
વચ્ચે એક શમણાને, અમથું અમથું પંપાળવું…

પ્રણયની પહેલ છે, નયનોનું ટકરાવવું,
મહોબ્બતની મંઝિલ છે, આતમને મિલાવવું,
વચ્ચે એક હૈયાનું, અમથું અમથું નંદવાવવું…

ગીતાની શરૂઆત અર્જુનનો વિષાદયોગ,
ગીતાનો ઉપદેશ અર્જુનનો સન્યાસયોગ,
વચ્ચે આ ‘કમલ’નું અમથું અમથું અટવાવવું…

 
-કમલેશ સોનાવાલા
 
સ્વર: રૂપકુમાર રાઠોડ
સંગીત :પંડિત શિવકુમાર શર્મા
 
 

બંસીના સૂર તમે છેડો જો કા’ન

Comments Off on બંસીના સૂર તમે છેડો જો કા’ન

 

 

બંસીના સૂર તમે છેડો જો કા’ન, મારા કાનોમાં મધનો વરસાદ જો,
એક મનગમતો જન્મે ઉન્માદ જો…

છલકયાં ને કીધું મેં ગોકુળીયું ગામ અને મલકયાંનું કાલિંદી નામ,
છલકયાં ને મલકયાં નો સરવાળો કીધો, તો પ્રગટ્યા’તા પોતે ઘનશ્યામ,
પ્રગટીને પનઘટ પર પ્રીતીનો પાડયો’તો કા’ન તમે મીઠેરો સાદ જો…

બંસી જેવા જ તમે પાતળીયા શ્યામ અને હળવા કે પાંપણનો ભાર,
એક એક હૈયામાં કેવા વસો છો ને રાખો છો સૌની દરકાર,
કા’ન તણા કામણને બીરદાવું કૈ રીતે મનમાં જન્મે છે વિવાદ જો…

રાધાની આંખ મહી કા’નાનો પ્રેમ અને કા’નાની કીકીમાં રાધા,
જ્યાં લગ ઓ શ્યામ તમે જાકારો ના દો ને ત્યાં લગ છે રહેવાની બાધા,
કા’ન તમે મારૂ એ અણપ્રગટયું ગીત હવે ગોકુળીયું દેશે રે દાદ જો…
 
– દિલીપ રાવળ
 
સ્વર : સ્તુતિ કારાણી
સંગીત :સુગમ વોરા

 
 

શમણાં આવે ને તો યે…

Comments Off on શમણાં આવે ને તો યે…

 

 

શમણાં આવે ને તો યે કાળાંડિબાણ એવું સૂરજ વિનાનું સાવ ગામ
ઝાંખુંપાંખું ય હવે સૂતાં કે જાગતાં સૂઝે નહીં શમણું કે કામ

એવાં અણરૂપ અમે કેવાં લાગ્યાં કે
કોઈ લીલા રણવાસ આમ વીસરે
તકતે જોઉં ત્યાં આંખ આડે ઘેરાઈ જતી
ભીની તરબોળ ભીંત નીતરે

મારી હથેળીયુંની મેંદી ચીંધીને કોઇ કહેતું’તું, – જાળવશું આમ
ઝાંખુંપાંખું ય હવે સૂતાં કે જાગતાં સૂઝે નહીં શમણું કે કામ

સળકે ચોપાસ ઠેઠ અંધારી લૂ
ને મારી ભાતીગળ ઓઢણી ચિરાતી
લીલું એકાદ પાન ઠેસમાં ચડે છે
ત્યારે રૂ-શી પીંજાઈ જતી છાતી

તડકા રે હોય તો તો છાંયડા વિનાના કહી દુ:ખને અપાય કાંક નામ
શમણાં આવે ને તો યે કાળાંડિબાણ એવું સૂરજ વિનાનું સાવ ગામ.

 
– રમેશ પારેખ
 
સ્વરઃ ડો ભરત પટેલ
સ્વરાંકન : ડો ભરત પટેલ

 
 

આવ્યું આવ્યું રે ગુજરાત

Comments Off on આવ્યું આવ્યું રે ગુજરાત

 
 

 

આવ્યું આવ્યું રે ગુજરાત, સોરઠ કરે સામૈયું
ઝંખતા જીવને સાંપડી છે માત, સાબર પીરસે હૈયું
જે હતી અસ્મિતા કવિના મનમાં શબ્દ થતી સાક્ષાત
ગુર્જરતાના ઇતિહાસી કોડને મળી ભૂગોળની ભાત
સોરઠ કરે સામૈયું

ગળથૂથીમાં કૃષ્ણની રસિકતા હેમચંદ્રનું જ્ઞાન
વહાણવટું જગલક્ષી વણિકનું ગાંધીનાં બલિદાન
સિદ્ધરાજની શાસનશક્તિ પેઢીની શાખનું ભાન
ઘોળ્યું ઘોળ્યું રે સંગાત, સાબર પીરસે હૈયું
આવ્યું આવ્યું રે ગુજરાત, સોરઠ કરે સામૈયું

– કૃષ્ણલાલ શ્રીધરાણી
 
સ્વર : ગાર્ગી વોરા
સ્વરાંકન : અમર ભટ્ટ

 
 

રોઇ રોઇ કેને સંભળાવું તોળાંદે

Comments Off on રોઇ રોઇ કેને સંભળાવું તોળાંદે

 

 
રોઇ રોઇ કેને સંભળાવું તોળાંદે,
આવા દખ કોની આગળ ગાવું,
એમ જાડેજો કહે છે રે,
રૂદિયો રુવે ને માયલો ભીતર જલે …..

અમે રે હતા રે તોળી રાણી ઊંડે જળ બેડલા,
જી ….. રે તોળાંદે તમે રે તારીને લાવ્યાં તીર ……
એમ જાડેજો કહે છે રે …… (1)

તમે હાલ્યા રે સતી રાણી મોટા ધણી ને વાયદે,
જી ….. રે તોળાંદે તમ વિના દનડાં ન જાય…….
એમ જાડેજો કહે છે રે …… (2)

અમે રે હતા રે તોળી રાણી કડવી વેલે તુંબડા,
જી ….. રે તોળાંદે તમે આવે રે મીઠા હોય ……
એમ જાડેજો કહે છે રે …… (3)

હાલતી વેળાએ સતી રાણી ગાયત્રી સંભળાવ જો,
જી ….. રે તોળાંદે એ થકી મુક્તિ મારી હોય ……
એમ જાડેજો કહે છે રે ….. (4)

ગુરુનાં પ્રતાપે તોળાદે જાડેજા એમ બોલિયા,
જી ….. રે તોળાંદે તમે રે તર્યા ને અમને તારો ….
એમ જાડેજો કહે છે રે …… (5)

-જેસલ જાડેજા
 
સ્વરઃ ઈસ્માઈલ વાલેરા
 

Older Entries

@Amit Trivedi