શૂન્યતામાં પાનખર ફરતી રહી.mp3

 

શૂન્યતામાં પાનખર ફરતી રહી
પાંદડીઓ આભથી ખરતી રહી

ને પવન નું વસ્ત્ર ભીનું થઇ ગયું
ચાંદનીની આંખ નીતરતી રહી

સૂર્ય સંકોચાઈને સપનું બન્યો
કે વિરહની રાત વિસ્તરતી રહી

મૌનની ભીનાશને માણ્યા કરી
જુલ્ફમાં બસ અંગુલિ ફરતી રહી

હું સમયની રેત માં ડૂબી ગયો
મૃગજળે મારી તૃષા તરતી રહી

તેજ ઊંડાણોમાં ખળભળતું રહ્યું
કામનાઓ આંખમાં ઠરતી રહી

આપણો સંબંધ તો અટકી ગયો
ને સ્મૃતિની વેલ પાંગરતી રહી

આ બધા લાચાર થઇ જોતા રહ્યા
હાથમાંથી જિંદગી સરતી રહી

– આદિલ મન્સૂરી

સ્વર: શ્રુતિ વૃંદ
સ્વરાંકન: ગૌરાંગ વ્યાસ