દાદાના આંગણામાં કોળેલા આંબાનું…

Comments Off on દાદાના આંગણામાં કોળેલા આંબાનું…

 
 

દાદાના આંગણામાં .mp3

 
 

દાદાના આંગણામાં કોળેલા આંબાનું કૂણેરું તોડ્યું રે પાન
પરદેશી પંખીના ઊડ્યા મુકામ પછી માળામાં ફરક્યું વેરાન

ખોળો વાળીને હજી રમતા’તા કાલ અહીં સૈયરના દાવ નતા ઉતર્યા
સૈયરના પકડીને હાથ ફર્યા ફેર-ફેર, ફેર હજીય નતા ઉતર્યા
આમ પાનેતર પહેર્યું ને ઘૂંઘટમાં ડોકાયું જોબનનું થનગનતું ગાન

આંગળીએ વળગેલાં સંભાર્યા બાળપણાં, પોઢેલાં હાલરડાં જાગ્યાં કુંવારા દિવસોએ ચોરીમાં આવીને ભૂલી જવાના કોણ માંગ્યા
પછી હૈયામાં કાજળમાં સેંથામાં સંતાતું ચોરી ગયું રે કોક ભાન

– માધવ રામાનુજ

સ્વર : પ્રીતિ ગજ્જર
સ્વરાંકન :ડો. ભરત પટેલ

 
 

દીકરી મારા ઘરનો દીવો

Comments Off on દીકરી મારા ઘરનો દીવો

 
 

દીકરી મારા ઘરનો દીવો.mp3

 
 

દીકરી મારા ઘરનો દીવો
અજવાળાંની હેલ,
દીકરી હોય ત્યાં રોજ દીવાળી ,
સુખની રેલમછેલ

મમ્મીનો તું અંશ છે બેટા,
ઓળખ તું પપ્પાની
દીકરી, તું દોલત અમારાં
સહિયારાં સપનાંની
સાથમાં તારા ગૂંથાઇ લીલી
લાગણીઓની વેલ

ખોળલે ખેલતી, મીઠડું મલકે,
શું ય વિચારતી તું ?
સુખની તારા, મનમાં મારા,
કામના કરતી હું
લક્ષ્મી જેને ઘેર પધારે,
ઝૂંપડી લાગે મ્હેલ

એક દી’ આંગણ ગૂંજશે
મીઠાં સૂર ભરી શરણાઇ
પાનેતરમાં લાડકી જાણે
લજામણી શરમાઇ
કંકુભીનાં પગલાં પાડતાં
લઇ જશે તારો છેલ.

આપણે આંગણ કંકુપગલાં ,
કોઇને કંકુથાપા
સમય કેરાં રણમાં તરશે
સ્મરણોના તરાપા
વેળ વીતે એને વાળવી પાછી
નથી હવે એ સ્હેલ

ટહુકા સૂનો માળો એવું
દીકરી સૂનું ઘર
યાદનું વાદળ મનને ઘેરે ,
નયનોમાં ઝરમર
મનના માનેલ મોરલા સંગે
જાય ઢળકતી ઢેલ

દીકરી માનો દિલ ધબકારો ,
દીકરી બાપનો શ્વાસ
ઇશ્વર એને દીકરી દેતા
જેના પર વિશ્વાસ
પાંચ આંગળીએ પરમેશ્વરને
જેમણે હોય પૂજેલ.
 
– તુષાર શુક્લ
 

સ્વર: પાયલ વૈદ્ય
 
 

આખીએ રાત તને કહેવાની વાત મેં

Comments Off on આખીએ રાત તને કહેવાની વાત મેં

 
 

આખીએ રાત તને કહેવાની વાત મેં.mp3

 
 
આખીએ રાત તને કહેવાની વાત મેં
બોલ્યે રાખી તો થયાં ઝાકળનાં પાંચ સાત ટીપાં…

હોઠે જો હોત એ પંખીનું ગીત થઇ
છોડી હું દેત એને ફળિયાની ડાળના માળામાં
પગની જો થાત એ રણઝણતી ઝાંઝરી
મૂકી હું દેત એને સત્તરમા ઓરડે તાળામાં

અરે આંખોથી, ખોબાથી, ફૂલોથી, પાનોથી
કેમે સચવાય ના, ઝાકળનાં પાંચ-સાત ટીપાં…

પહેલું કિરણ જ્યાં સોયની અણી થઇ
સૂરજનું ખૂંપ્યું તો ફૂંટ્યાં કાળા ડિબાંગ પરપોટા
બીજું કિરણ જ્યાં ટીપાંને સ્પશ્યું ત્યાં
ટીંપાંમાં પડી ગયાં જળનાં ય કારમા તોટાં

મારા બોલ્યાનો નાદ, તને કહેવાની વાત ને
અંધારી રાત થયા દિવસ જેવા જ ખાલીપા…
 
-હર્ષદ ચંદારણા
 
સ્વર : સંજય ઓઝા
સ્વરાંકન : માલવ દિવેટીઆ
 
 

કોયલને કહેવું પણ શું ?

Comments Off on કોયલને કહેવું પણ શું ?

મધરાતે કોયલ બોલે, હ્રદયને ખોલે,
કોયલને કહેવું પણ શું ?

વ્હેતી કરાય નહીં અંગત કોઇ વાતને
જ્યાં ત્યાં પથરાય નહીં જળની બિછાતને
લાગણીને આમ કેમ ઢોળે , કોઇ ત્રાજવામાં તોલે
કોયલને કહેવું પણ શું ?

આપણી તે વેદનાને આપણે જ જાણવી
ભરોસો મુકાય એવો ક્યાં છે કોઇ માનવી ?
બંધ દરવાજા શાને ઢંઢોળે ને મૃગજળ ફંફોળે
કોયલને કહેવું પણ શું ?

-તુષાર શુક્લ

કાળજા કેરો કટકો મારો

Comments Off on કાળજા કેરો કટકો મારો

 
 

કાળજા કેરો કટકો મારો.mp3

 
 

કાળજા કેરો કટકો મારો, ગાંઠથી છૂટી ગ્યો
મમતા રૂવે જેમ વેળુમા વીરડો ફૂટી ગ્યો

છબતો નહીં જેનો ધરતી ઉપર, પગ ત્યાં થીજી ગ્યો,
ડુંગરા જેવો ઉંબરો એણે માંડ રે ઓળંગ્યો

બાંધતી નહીં અંબોડલો બેની, ઇ મર ને છૂટી ગ્યો,
રાહુ બની ઘુંઘટડો મારા ચાંદને ગળી ગ્યો

આંબલીપીપળી ડાળ બોલાવે હે બેના એકવાર હામું જો
અરે ધૂમકા દેતી જે ધરામાં ઈ આરો અણહર્યો

ડગલે ડગલે મારગ એને સો સો ગાઉનો થ્યો
ધારથી હેઠી ઉતરી બેની મારો સૂરજ ડુબી ગ્યો

લૂંટાઈ ગ્યો મારો લાડખજાનો ‘દાદ’ હું જોતો રયો
જાન ગઈ જાણે જાન લઈ હું તો સૂનો માંડવડો
  
-કવિ દાદ બાપુ
  
સ્વર : કવિ દાદ બાપુ
 
 

Older Entries Newer Entries

@Amit Trivedi