પરોઢિયાની પદમણી ને…
Oct 30
ગીત Comments Off on પરોઢિયાની પદમણી ને…
પરોઢિયાની પદમણી ને તારો લટકો લાલમલાલ
તારે મટકો લાલમલાલ
હળવે ચાલ હળવે ચાલ…
મનની મટકીનાં ગોરસમાં
છલકે રંગ ગુલાલ
ગોરી મલકે રંગગુલાલ…
તનડામાં ને મનડામાં પણ
આ દુનિયાના દલડાંમાં પણ
તાન પલટ ને તાલ…
જોજે રસ્તે ઠેસ ન વાગે
તાજું રૂપ છે નજર ન લાગે
હસે ગુલાબી ગાલ..
સપનાં નો છે કોણ સુકાની
આવી જાજરમાન જુવાની
એની આંગળી ઝાલ….
-વેણીભાઈ પુરોહિત
સ્વર: આરતી દવે ( મુનશી )
સ્વરાંકન : ક્ષેમુ દિવેટિયા