સુરેન ઠાકર ‘મેહુલ’
Oct 15
ગઝલ Comments Off on સુરેન ઠાકર ‘મેહુલ’
એકલો હું અવસરીને શું કરું ?
છું સભર પણ ઝરમરીને શું કરું ?
તું જ તો સંકલ્પ થઈ સામે ઊભી
ઈશને હું કરગરીને શું કરું ?
સ્વપ્નમાં ભોંઠો પડું છું હરઘડી
હું દિલાસા સંઘરીને શું કરું ?
હું સતત મારાપણામાં વિસ્તરું
અન્યથા હું વિસ્તરીને શું કરું ?
ડૂબવાથી તો તને પામી શક્યો
હું હવે આ ભવ તરીને શું કરું ?
છું સકળ સંવેદનોથી પર હવે
ભ્રમ ભરેલી હાજરીને શું કરું ?
– સુરેન ઠાકર ‘મેહુલ’