ગુજરાતી સાહિત્ય

[wonderplugin_audio id=”920″]

તમે વાતો કરો તો થોડું સારું લાગે,
આ દૂરનું આકાશ મને મારું લાગે.

વૃક્ષો ને પંખી બે વાતો કરે છે
ત્યારે ખીલે છે લીલેરો રંગ;
ભમરાના ગુંજનથી જાગી ઊઠે છે
ફૂલોની સૂતી સુગંધ.
તમે મૂંગા તો ઝરણું પણ ખારું લાગે … તમે વાતો કરો

રોમાંચે રોમાંચે દીવા બળે
અને આયખું તો તુલસીનો ક્યારો;
તારી તે વાણીમાં વ્હેતો હું મૂકું છું
કાંઠે બાંધેલો જનમારો.
એક અમથું આ ફૂલ પણ ન્યારું લાગે … તમે વાતો કરો

-સુરેશ દલાલ

સ્વર : આરતી મુનશી
સ્વરાંકનઃ ગૌરાંગ વ્યાસ

ભાઈશ્રી માલવ દિવેટિયાનો ખાસ આભાર lyrics માટે

સૌજન્ય : સંજય રાઠોડ સુરત