Archive for December 6th, 2018

ક્યાંક નાચતી કોયલ

Thursday, December 6th, 2018

 

 

આસ્વાદ : ડો સુનીલ જાદવ

 

ક્યાંક નાચતી કોયલ સાજણ ક્યાંક બોલતા મોર
વાટ નીરખતી વાટે પાક્યાં લીલા પીળા બોર

અંધારામાં મબલક વાવી
વણકીધેલી વાતુ
એકલતાને ભાંગી રહ્યો
જેમ ટીપે કો ધાતુ

અજવાળુ ઘુરકે છે જાણે બેઠો આદમખોર
ક્યાંક નાચતી કોયલ સાજણ ક્યાંક બોલતા મોર

ચકલુ ફરકે એય હવે તો  
સહી શકે ના કાન
મનની મૃત ધરા પર ખરતા
કુણેકુણા પાન

વાટ નીરખતી આંખે વાવ્યા લીલે લીલા થોર
ક્યાંક નાચતી કોયલ સાજણ ક્યાંક બોલતા મોર

– ડો.નરેશ સોલંકી

સ્વર : ગાર્ગી વોરા
સ્વરાંકન : ડો ભરત પટેલ

મજબૂરી કેવી ડાળની

Thursday, December 6th, 2018

 

 

મજબૂરી   કેવી  ડાળની, બટકી ય  ના શકે
એનાં   ખરેલાં   પાનને  અડકી ય  ના   શકે

એવા છે  ચ્હેરા   કૈંક   જે  છૂટે   ન  દ્રષ્ટિથી,
ભીતે   છબિની   જેમ  તે   ટકી  ય ના   શકે

વહેતી રહી અવાજની  સરવાણીઓ ભીતર,
કંઠે   ડૂમો   છે   એવો  કે  ત્રબકી ય ના શકે

કાયમ   ખૂલી  રહે  છે   પ્રતીક્ષાની   ટેવથી,
આંખો  હવે તો  ઊંઘમાં  ઝબકી ય ના શકે

આજે  દ્વિધાનો  પંથ   ચરણને   નડી  ગયો,
આગળ વધી શકે નહીં,અટકી  ય  ના  શકે

આંખોને દોસ્ત, આજ. નદી કઈ રીતે કહું?
જો આવે ઘોડાપૂર તો છલકી  ય  ના  શકે!

– મનોજ ખંડેરિયા

સ્વર : આલાપ દેસાઈ
સ્વરાંકન : અમર ભટ્ટ