સારા થઈને થાક્યા જીવલા
Oct 14
ગીત Comments Off on સારા થઈને થાક્યા જીવલા
સારા થઈને થાક્યા જીવલા
હેંડ હવે બગડી જઈએ
ઊંચા ભાવે ખૂબ ઠગાણાં
હેંડ હવે ગગડી જઈએ
કર્યાં હોજરાં ખાતર જીવલા
પેટ વલોયા ઊણાં
પાડ્યાં તનનાં તેલ બાપલા
કરમ ન પડ્યાં કૂણાં
પત્યું હવે તો ફોલ્લા થઈને
હેંડ અલ્યા તતડી જઈએ
સારા થઈને થાક્યા જીવલા
હેંડ હવે બગડી જઈએ
હાંલ્લાં થઈને ફૂટ્યાં લલવા
નળિયાં થઈને ચૂયાં
કદીક કોડિયાં થયાં કાજળવા
ઈંટ્યો થઈ રૂંધાયાં
હેંડ્ય હવે તો પકવનાર પાકે
એવું ભભડી જઈએ
સારા થઈને થાક્યા જીવલા
હેંડ હવે બગડી જઈએ
-ભાનુપ્રશાદ ત્રિવેદી
સ્વર : રાસબિહાર દેસાઈ
સ્વરાકંન : રાસબિહાર દેસાઈ