વાત માંડી છે હજુ
Jun 09
ગઝલ Comments Off on વાત માંડી છે હજુ
[wonderplugin_audio id=”789″]
વાત માંડી છે હજુ, અંજામ લઈને આવ મા,
જીતવા તો દે મને, ઈનામ લઈને આવ મા;
ક્યાંય સુકાયા નથી કોઈ આંખના દરિયા હજુ,
હોઠ પર “શ્રી રામ” કે “ઈસ્લામ” લઈને આવ મા;
આ નગરની હર ગલી શોખીન સન્નાટાની છે,
શબ્દને તું આમ ખુલ્લેઆમ લઈને આવ મા;
જીન્દગી આખી વીતાવી ભૂલવામાં જેમને,
એમની તસ્વીર, એનું નામ લઈને આવ મા;
હું હળાહળ ઝેરને પીવા મથું છું ક્યારનો,
દોસ્ત, અત્યારે છલકતો જામ લઈને આવ મા.
– પ્રા. હિમલ પંડ્યા “પાર્થ”
સ્વર : ડો. ભાવના મહેતા
સ્વરાંકન : પ્રણવ મહેતા
સંગીત સંચાલન : નીરવ પંડ્યા તથા જ્વલંત ભટ્ટ