વ્હાલ કરે તે વ્હાલું

No Comments

 

 

વ્હાલ કરે તે વ્હાલું
આ મેળામાં ભૂલો પડયો હું કોની આંગળી ઝાલું ?

ફુગ્ગા ને ફરફરિયાં જોઉં, જોઉં લેણાદેણી
કોઈક વેચે વાચા, કોઈક વ્હોરે ફૂલની વેણી

કોઈક ખૂણે વેચે કોઈ પરમારથનું પાલું…

ક્યાંક ભજન વેચાય, ક્યાંક વેચાય કંઠી ને ઝભ્ભો
શું-શું અચરજ, કરે કાળના જાદુગરનો ડબ્બો !

સૌ-સૌનો ઉત્સવ છે એમાં હું અટવાતો ચાલું…

કોઈક છાતી ખરીદ કરતી સસ્તા ભાવે સગડી
કોઈક લેતું મોંઘામૂલી છતાં લાડની લગડી

શું લઈશ તું ? – પૂછે મને આ મારું ગજવું ઠાલું…!

– રમેશ પારેખ

સ્વર : અમર ભટ્ટ

સ્વરાંકન : અમર ભટ્ટ

શાને ગુમાન કરતો

No Comments

 

 

અરે   ઓ  બેવફા સાંભળ ,તને  દિલની   દુવા  મારી
બરબાદ ભલેને થાતો હું, આબાદ રહે દુનિયા   તારી

શાને ગુમાન  કરતો , ફાની છે   જિન્દગાની
આ રૂપ ને જવાની ,એક દિન ફના થવાની

રડતાઓને     હસાવે ,   હસ્તાઓને   રડાવે
કુદરતની  એક  ઠોકર,   ગર્વિષ્ઠને     નમાવે
દુનિયામાં સિકંદરની પણ ના રહી નિશાની

પડછાય જલ્દી નીચે,જે  ખાય  છે  ઉછાળો
કુદરતે પણ ચંદ્રમા પર મૂક્યો છે  ડાઘ કાળો
સમજુ છતાં ન સમજે,   એ વાત  મૂર્ખતાની

આ  જિંદગીનો દીવો  પળમાં બૂઝાઈ જાશે
ચંદન સમી  આ  કાયા  ધરણી  ધૂળ   થાશે
માટે વિનય કરું  છું, બનતો  ન તું  ગુમાની

– રમેશ ગુપ્તા

સ્વર : તલત મહેમુદ
સંગીત : કેસરી મિસ્ત્રી

ઝુલ્ફમાં ભૂલી પડેલી આંગળી

No Comments

 

 

ઝુલ્ફમાં  ભૂલી   પડેલી    આંગળી,    તેં  સાંભળ્યું?
રાતભરનો   થાક   લઈ પાછી. વળી,  મેં સાંભળ્યું.

આંગળી   ખંડેરનો  હિસ્સો   નથી,   તેં સાંભળ્યું?
છે    હવે       ગુલમહોરની     કળી,   મેં સાંભળ્યું.

ટેરવે    ઘેઘુર     સન્નાટો      હતો,    તેં  સાંભળ્યું?
દરબદર  વાગે  હવે  ત્યાં  વાંસળી,    મેં સાંભળ્યું.

છે   ઉઝરડા  મખમલી આકાશમાં,   તેં સાંભળ્યું?
આ નખોનું નામ હિંસક    વીજળી,   મેં સાંભળ્યું.

સાવ બરછટ એ બધો  વિસ્તાર  છે,  તે સાંભળ્યું?
એટલે જ ત્યાં સ્પર્શની લાશો   ઢળી, મેં સાંભળ્યું.

આ અજાણ્યો દેશ માફક    આવશે, તેં સાંભળ્યું ?
એક જાણીતી ગલી અહિંયા મળી,    મેં સાંભળ્યું.

આપણું    મળવું ગઝલ  કહેવાય છે, તે સાંભળ્યું?
કાફિયા   ઓઢી   ફગાવી  કામળી,  મેં સાંભળ્યું

– વિનોદ જોશી

સ્વર : આશિત દેસાઈ

સ્વરાંકન : આશિત દેસાઈ

ઓ હૃદય, તેં પણ ભલા!

No Comments

 

 

ઓ હૃદય, તેં  પણ  ભલા!  કેવો  ફસાવ્યો  છે  મને?
જે નથી મારા  બન્યાં,  એનો   બનાવ્યો   છે   મને!

સાથ આપો  કે  ના  આપો  એ  ખુશી  છે  આપની,
આપનો ઉપકાર,  મારગ   તો   બતાવ્યો   છે   મને.

સાવ સહેલું  છે,   તમે  પણ  એ   રીતે   ભૂલી   શકો,
કે   તમારા   પ્રેમમાં    મેં   તો   ભુલાવ્યો   છે    મને.

મારા  દુઃખના   કાળમાં   એને  કરું   છું   યાદ   હું,
મારા  સુખના   કાળમાં   જેણે  હસાવ્યો   છે   મને.

હોત દરિયો તો હું તરવાનીય   તક   પામી   શકત,
શું   કરું   કે   ઝાંઝવાંઓએ    ડુબાવ્યો    છે   મને.

કાંઈ નહોતું  એ   છતાં   સૌએ   મને   લુંટી     ગયા,
કાંઈ નહોતુ એટલે     મેં   પણ   લુંટાવ્યો   છે   મને.

એ બધાંનાં નામ  દઈ  મારે   નથી   થાવું   ખરાબ,
સારાં    સારાં   માનવીઓએ   સતાવ્યો   છે   મને.

તાપ   મારો   જીરવી  શકતાં  નથી  એ  પણ   હવે,
લઈ   હરીફોની   મદદ   જેણે   જલાવ્યો   છે   મને.

છે હવે   એ   સૌને   મારો   ઘાટ   ઘડવાની   ફિકર,
શુદ્ધ   સોના  જેમ   જેઓએ    તપાવ્યો   છે   મને.

આમ   તો  હાલત અમારા બેય ની સરખી  જ  છે,
મેં ગુમાવ્યાં એમ   એણે પણ   ગુમાવ્યો    છે   મને.

આ રીતે સમતોલ  તો   કેવળ   ખુદા   રાખી   શકે,
ભાર માથા પર  મૂક્યો   છે  ને  નમાવ્યો   છે   મને.

સાકી, જોજે  હું    નશામાં  ગમને ભૂલી જાઉં નહિ,
એ જ તો આ તારા મયખાનામાં  લાવ્યો   છે   મને.

આપ સાચા અર્થમાં છો    મારે   માટે   તો   વસંત,
જ્યારે જ્યારે આપ આવ્યાં છો, ખિલાવ્યો છે મને.

એ   બધાં   બેફામ   જે   આજે  રડે  છે  મોત  પર,
એ બધાંએ  જિંદગી   આખી   રડાવ્યો   છે   મને.

– બરકત વીરાણી ‘બેફામ’

હરી પર અમથું અમથું હેત

No Comments

 

 

હરી પર અમથું અમથું હેત,

હું અંગુઠા જેવડી ને મારી વ્હાલપ બબ્બે વેંત.
અમથી અમથી પૂજા કરું ને અમથા રાખુ વ્રત,
અમથી અમથી મંગળ ગાઉં, લખુ અમસ્તો ખત;
અંગે અંગે અમથી અમથી અગત લપેટો લેપ,
હરી પર અમથું અમથું હેત.

‘અમથું અમથું બધુ થતું તે તને ગમે કે નઈં?’
એમ હરીએ પૂછ્યું ત્યારે બહુ વિમાસણ થઈ;
કોઈ બીજુ પૂછત તો એને ઝટપટ ના કહી દેત,
હરી પર અમથું અમથું હેત.

– રમેશ પારેખ

સ્વર : સુરેશ જોશી

સ્વરકાર : સુરેશ જોશી

જાણીબૂઝીને અમે અળગાં ચાલ્યાં

No Comments

 
પરેશ ભટ્ટના સ્વરમાં
 

 

પ્રણવ મહેતાના સ્વરમાં :

 

 

જાણીબૂઝીને અમે અળગાં ચાલ્યાં ને છતાં
પાલવ અડક્યાનો મને વ્હેમ છે
સાવ રે સફાળા તમે ચોંકી ઉઠ્યાને, પછી
ઠીક થઇ પૂછ્યું કે કેમ છે’ ?

આટલા અબોલા પછી આવો સવાલ, કહો
કેમ કરી ઊતરવું પાનું?
મૂંગા રહીએ તો તમે કારણ માનો ને, હોઠ ,
ખોલીએ તો બોલવાનું બ્હાનું !
હું તો બોલીશ છતાં માનશો તમે કે
હજી દુનિયા આ મારી હેમખેમ છે !

વાયરાથી નળિયાને ફૂટી છે પાંખ, થઇ
ચાલતી દીવાલ થકી ઇંટો ?
ભર રે ચોમાસે હવે છાપરા વિનાનો, કેમ
કોરો રહે સ્મરણોનો વીંટો ?
દુનિયાની વાત મૂકો, માનશો તમે કે, હજી
આપણી વચાળે જરી પ્રેમ છે ?

– હરિન્દ્ર દવે

સ્વરાંકન : પરેશ ભટ્ટ

ચાલ, સાથે બેસી કાગળ વાંચીએ,

No Comments

 

 

ચાલ, સાથે બેસી   કાગળ    વાંચીએ,
વીત્યાં     વર્ષોની    પળેપળ  વાંચીએ.

છે બરડ    કાગળ ને   ઝાંખા  અક્ષરો,
કાળજીથી   ખોલીને    સળ  વાંચીએ.

પત્ર સૌ  પીળા પડયા    તો   શું   થયું?
તાજે તાજું   છાંટી    ઝાકળ  વાંચીએ.

કેમ તું  રહી   રહીને   અટકી જાય છે?
મન કરી કઠ્ઠણ ને   આગળ   વાંચીએ.

પત્રના શબ્દો   ચહેરાઈ   ઝાંખા  થયા,
આંખથી લુછી લઈ    જળ,  વાંચીએ.

લ્યો, ટકી રહી છે હજી થોડી  સુવાસ,
શ્વાસમાં   ઘુંટીનેે   પીમળ     વાંચીએ.

માત્ર આ પત્રો સીલકમાં   રહી   ગયા,
કંઈ નથી આગળ તો પાછળ વાંચીએ.

– ભગવતીકુમાર શર્મા

સ્વર : દેવેશ દવે

સ્વરાંકન : દેવેશ દવે

રોઈ રોઈ આંસુની ઊમટે નદી

No Comments

 

 

રોઈ રોઈ આંસુની ઊમટે નદી તો એને કાંઠે કદમ્બવૃક્ષ વાવજો,
વાદળ વરસે ને બધી ખારપ વહી જાય પછી ગોકળિયું ગામ ત્યાં વસાવજો.

આંખોમાં સાંભરણ ખૂંચશે કણાની જેમ
પાંપણનાં દ્વાર કેમ દેશું?
એક પછી એક પાન ખરશે કદમ્બનાં
ને વેળામાં વીખરાતાં રેશું.

છલકાતું વહેણ કદી હોલાતું લાગે તો વેળુમાં વીરડા ગળાવજો.

આઠમની ધોધમાર મધરાતે એક વાર
પાનીએ અડીને પૂર ગળશે,
પાણીની ભીંતો બંધાઈ જશે
ગોકુળને તે દી’ ગોવાળ એક મળશે.

લીલુડાં વાંસવન વાઢશો ન કોઈ, મોરપીંછિયુંને ભેળી કરાવજો.

પૂનમની એકાદી રાતના ઉજાગરાને
સાટે જીવતર લખી જાશું,
અમથુંયે સાંભરશું એકાદા વેણમાં
તો હૈયું વીંધાવીને ગાશું.

ભવભવની પ્રીતિનું બંધાણી ભેટે તો વનરાવન વાટે વળાવજો!
લીલુડાં વાંસવન વાઢશો ન કોઈ, મોરપીંછિયુંને ભેળી કરાવજો.

– માધવ રામાનુજ

સ્વર : વિભા દેસાઇ

સ્વરાંકન : ક્ષેમુ દિવેટિઆ

બધે સરખું નિહાળું હું

No Comments

 

 

બધે સરખું નિહાળું હું મને એવી નજર  દે  જે,
નશો ઉતરે કદી ના આ મને એવી અસર  દે જે

બદનને ‘હું’ જ સમજે છે થઇ  છે કલ્પના  કેવી
મને આ ‘હું’ને દફનાવવા ગુરુ ગમની કબર દેજે

અનુભવ ખુદને રબનો થયો  છે   ખુદને   જાણી
ગુરુ. ચરણે   રહું કાયમ મને એવી  સફર દેે  જે

નયનના દ્વાર ઉઘડે  ને    બધે  દીદાર  તારો  છે
કદી   અંધકાર આવે ના મને એવી સહર દે  જે

કહે વીંટી કહે કુંડળ જુવો તો ઘાટ   સૌ   જુદા
અઘાટે શું રહ્યું ‘ચાતક’ મને એની ખબર દે  જે

– ગફુલ રબારી “ચાતક”

સ્વર :ઓસમાન મીર

સ્વરાંકન : જનમેજય વૈદ્ય

કોઈને આગ લાગું છું

No Comments

 


 

કોઈને   આગ. લાગું   છું,  કોઈને નૂર  લાગું  છું,
ખરેખર તો હું ખાલી છું, છતાં ભરપૂર  લાગું  છું,

દયાળુએ   દશા   એવી  કરી છે મારા જીવનની,
નિખાલસ કોઈને, તો કોઈને   મગરૂર   લાગું  છું.

હકીકતમાં તો   મારી જિંદગી છે ઝાંઝવા જેવી,
કે હું દેખાઉં છું નજદીક ,ને જોજન દૂર લાગું છું.

તમારા. રૂપની   રંગત   ભરી છે મારી આંખોમાં,
અને   આ  લોકને લાગ્યું, કે  હું ચકચૂર લાગું છું.

કસોટી. પર તો  છું   ફકત   એક   કાચનો કટકો,
ખુદાની  મહેરબાની   છે  કે   કોહિનૂર  લાગું  છું.

–  નાઝીર દેખૈયા

સ્વર : સંજય ઓઝા

સ્વરાંકન :સંજય ઓઝા

Contact Us On WhatsApp @Amit Trivedi