રોઇ રોઇ કેને સંભળાવું તોળાંદે

Comments Off on રોઇ રોઇ કેને સંભળાવું તોળાંદે

 

 
રોઇ રોઇ કેને સંભળાવું તોળાંદે,
આવા દખ કોની આગળ ગાવું,
એમ જાડેજો કહે છે રે,
રૂદિયો રુવે ને માયલો ભીતર જલે …..

અમે રે હતા રે તોળી રાણી ઊંડે જળ બેડલા,
જી ….. રે તોળાંદે તમે રે તારીને લાવ્યાં તીર ……
એમ જાડેજો કહે છે રે …… (1)

તમે હાલ્યા રે સતી રાણી મોટા ધણી ને વાયદે,
જી ….. રે તોળાંદે તમ વિના દનડાં ન જાય…….
એમ જાડેજો કહે છે રે …… (2)

અમે રે હતા રે તોળી રાણી કડવી વેલે તુંબડા,
જી ….. રે તોળાંદે તમે આવે રે મીઠા હોય ……
એમ જાડેજો કહે છે રે …… (3)

હાલતી વેળાએ સતી રાણી ગાયત્રી સંભળાવ જો,
જી ….. રે તોળાંદે એ થકી મુક્તિ મારી હોય ……
એમ જાડેજો કહે છે રે ….. (4)

ગુરુનાં પ્રતાપે તોળાદે જાડેજા એમ બોલિયા,
જી ….. રે તોળાંદે તમે રે તર્યા ને અમને તારો ….
એમ જાડેજો કહે છે રે …… (5)

-જેસલ જાડેજા
 
સ્વરઃ ઈસ્માઈલ વાલેરા
 

મૃત્યુ પછી ની વાટ

Comments Off on મૃત્યુ પછી ની વાટ

 

 

મૃત્યુ પછી ની વાટ વિકટ ના બનાવજો
મારા મરણ માં કોઈ ન આંસુ વહાવજો

બાળક ને એક બે ની રજુઆત ના ગમે
તો એને મારા સુખ ના પ્રસંગો ગણાવજો

ત્યાંથી કદાચ મારે અટકી પણ જવું પડે
મારી કશી એ વાત ને મન માં ન લાવજો

કહે છે તમારું સ્થાન નથી ક્યાંય પણ નજીક
મકતા થી આ વિધાન ને ખોટું ઠરાવજો

– નઝીર ભારતી

 
સ્વર : મનહર ઉધાસ
સ્વરાંકન: પુરષોત્તમ ઉપાધ્યાય
 

ક્યાંક તું છે ક્યાંક હું છું

Comments Off on ક્યાંક તું છે ક્યાંક હું છું

 

 
ક્યાંક તું છે ક્યાંક હું છું અને સમય જાગ્યા કરે,
આપણા વચ્ચેનું વહેતું જળ મને વાગ્યા કરે.

બારણું ખૂલ્લું હશે ને શેરીઓ સૂની હશે,
આંગણે પગલાં હશે, તારા હશે લાગ્યા કરે.

એ હવાની જેમ અડકીને પછી ચાલ્યાં ગયાં,
પાંપણો ભીની થઈને પંથને તાક્યાં કરે.

રિક્ત મન ભરવા પવન મથતો રહેવાનો સદા,
ડાળ પરનાં પાંદડાં છૂટાં પડી વાગ્યા કરે.

 
-ચિનુ મોદી

 

સ્વર : પરાગી પરમાર
સ્વરાંકન :ઈમુ દેસાઈ
સંગીત : હરીશ બક્ષી

 

બધાંએ બોલવું પડશે….

Comments Off on બધાંએ બોલવું પડશે….

સત્ય ટૂંપાય એ પહેલાં બધાંએ બોલવું પડશે.
ચિત્ર ભુંસાય એ પહેલાં બધાંએ બોલવું પડશે.

અહીં ખુદ ભોમિયાને પણ નથી કંઈ ભાન મારગનું,
દિશા ફંટાય એ પહેલાં બધાંએ બોલવું પડશે.

સુગંધોનેય કરવા કેદ આ ટોળું થયું ભેગું,
ફૂલો મૂરઝાય એ પહેલાં બધાંએ બોલવું પડશે.

નથી કંઈ સૂરની સમજણ છતાંયે સાજ શણગાર્યાં !
બસૂરું ગાય એ પહેલાં પહેલાં બધાંએ બોલવું પડશે.

નર્યો ઉપજાઉ વાતો ને નિરંતર જૂઠનો રેલો,
વધુ લંબાય એ પહેલાં બધાંએ બોલવું પડશે.

જતન એનું કર્યું છે પૂર્વજોએ પ્રાણ પૂરીને,
મતા લુંટાય એ પહેલાં બધાંએ બોલવું પડશે.

સતત થાક્યા વિના બોલ્યા કરે છે એ ફકીરોનું –
ગળું રૂંધાય એ પહેલાં બધાંએ બોલવું પડશે.

હજી તો ઝળહળે છે આ સનાતન ધર્મનો દીવો,
તિમિર ઘેરાય એ પહેલાં બધાંએ બોલવું પડશે.

– નીતિન વડગામા

…. શું થશે ?

Comments Off on …. શું થશે ?

 

 
આશાનું’, ઈન્તઝારનું સપનાનું શું થશે ?
તું આવશે તો મારી આ દુનિયાનું શું થશે ?

આ ઝાંઝવાંથી એક ગતિશીલતા તો છે.
મળશે ઝરણ જો માર્ગમાં, પ્યાસાનું શું થશે ?

દુઃખ પર હસી તો દઉં છું મગર પ્રશ્ન થાય છે,
-જે દોસ્ત દઈ ગયા એ દિલાસાનું શું થશે ?

હું’ એ ફિકર કરીને ભટકતો રહ્યો સદા
-મંજિલ મળી જશે પછી રસ્તાનું શું થશે ?

ખીલે છે કુલ તોયે રૂદન ,છે તુષારનું
કરમાશે કુલ ત્યારે બગીચાનું શું થશે ?

ચમકે ન મારું ભાગ્ય ભલે કિન્તુ ઓ ખુદા,
– તારા ગગનના કોઈ સિતારાનું શું થશે ?

અત્યારથી જ મારી ફિકરમાં સુકાય છે,
હું જે ડૂબી જઈશ તો દરિયાનું શું થશે ? ?

-આ મયકદાનું એટલું તો અમને ભાન છે,
– નહિ આવશું અમે તો મદિરાનું શું થશે ?

બેફામ એટલે તો નિરાંતે ઊંઘી જશું
જીવવાનું દુઃખ જયાં થાય ત્યાં મરવાનું શું થશે ?

 
-બરકત વિરાણી ‘બેફામ’

 
સૌજન્ય : પ્રવિણભાઈ ત્રિવેદી

 

Older Entries

@Amit Trivedi