ઉથલાવવાની રાતો; દિવસોને વાંચવાના

No Comments

 

ઉથલાવવાની રાતો; દિવસોને વાંચવાના,
ફાટેલ ક્ષણ લઇને; યુગોને સાંધવાના!
આ જીંદગી જ છે કે છે ડાયરીના પાના!

સાચું બિછાનું અહીંયા કોને નસીબ થાતું?
ઇચ્છાઓ પાથરીને સપનાઓ ઓઢવાના…
આ જીંદગી જ…

જે આપણે ચહ્યું’તું એ આ કશું તો નહોતું,
જે આપણે ચહ્યું’તું એ ક્યાં જઇને ગોતું
ખોટી પડી હકીકત સાચા પડ્યા બહાના…
આ જીંદગી જ….

શું આપણી ભીતરથી ધ્રુસકે ને ધ્રુસકે રોતું?
શું આપણી ભીતરથી ઉખડ્યું છે મૂળસોતું!
મુળિયા વગરના સંબંધ કાયમ ઉછેરવાના…
આ જીંદગી જ….

નજદીક સાવ તો પણ અંતર વચાળે અંતર
નજદીક સાવ તો પણ રસ્તા રહ્યા સમાંતર
રસ્તાઓ જ્યાં અલગ ત્યાં પગલા શું જોડવાના?…
આ જીંદગી જ….

ખુદને અને પરસ્પર મળતા’તા બેઉ નોખું
સહવાસ લાગે ઝળહળ બળતા’તા બેઉ નોખું.
પોતે સળગતા હો એ બીજું શું ઠારવાના?…
આ જીંદગી જ….

સરખા હતા એ દ્રશ્યો જોતા’તા બેઉ નોખું
વાતાવરણ તો એક જ, શ્વસતા’તા બેઉ નોખું,
અંદરથી સાવ નોખા, બહારે શું તાગવાના?…
આ જીંદગી જ….

રાતો ભરે છે હીબકા દિવસો રડે છે છાના,
હસતી ક્ષણોના ખાલી ફોટા જ પડવાના!
આ જીંદગી જ છે કે છે ડાયરીના પાના!

– ડૉ. મનોજ જોષી ‘મન’

સ્વર : શૌનક પંડયા
સ્વરાંકન : શૌનક પંડયા

અમેતો જઈશુ અહીંથી

No Comments

 

અમેતો જઈશુ અહીંથી પણ આ, અમે ઉડાડ્યો ગુલાલ રહેશે (2)

ખબર નથી(૨)શું કરી ગયા એ
કરી ગયા એ કમાલ રહેશે..અમે તો……….
ઓ તાજો તખ્તો તમારી સામે,
અમારૂં શુ મુફલીસો નું ચાલે;(2)
છતાં તમારી(૨) ગુમાની છાતી પર એ અમારી મજાર રહેશે..

મને તો ભેટી રહ્યું છે, દોસ્તો,
હવે આ મ્રૃત્યુ ભુજાઓ ભીડી(૨)
ભુજા ઉઠાવી છતાં આ જીવન,
કહેછે મારી મશાલ. રહેશે..અમે તો….
તમેત્ર છો હાજર જવાબી(2)
હોઠે, ભલે જવાબો હજાર રાખો(2)
તમારી નીદર(2) હરામ કરતો,
અમારો ભૂખ્યો સવાલ રહેશે.
અમેતો ………

સ્વર : રાસબિહારી દેસાઈ

આજની ઘડી તે રળિયામણી

No Comments

 

આજની ઘડી તે રળિયામણી,
હાં રે ! મારો વ્હાલોજી આવ્યાની વધામણી જી રે…..આજની ઘડી

જી રે તરિયા તોરણ તે બંધાવિયા,
હે મારા વ્હાલાજીને મોતીડે વધાવિયા જી રે…. આજની ઘડી.

જી રે લીલુડાં વાંસ વઢાવિયા,
હે મારા વ્હાલાજીનો મંડપ રચાવિયે જી રે…. આજની ઘડી.

જી રે પૂરો સોહાગણ સાથિયો,
હે મારો વ્હાલો આવે મલપતો હાથિયો જી રે…. આજની ઘડી.

જી રે જમુનાના નીર મંગાવિયે,
હે મારા વ્હાલાજીના ચરણ પખાળિયે જી રે… આજની ઘડી.

જી રે સહુ સખીઓ મળીને વધાવિયે,
હે મારા વ્હાલાજીની આરતી ઉતારિયે જી રે… આજની ઘડી.

જી રે તન-મન-ધન, ઓવારિયે,
હે મારા વ્હાલાજીની આરતી ઉતારિયે જી રે… આજની ઘડી.

જી રે રસ વાધ્યો છે અતિ મીઠડો,
હે મે’તા નરસિંહનો સ્વામી દીઠડો જી રે….આજની ઘડી.

– નરસિંહ મહેતા

સ્વર: હેમા દેસાઇ
સ્વરાંકન : આશિત દેસાઈ

આ નભ ઝૂક્યું તે કાનજી

No Comments

 

આ નભ ઝૂક્યું તે કાનજી ને ચાંદની તે રાધા રે.
આ સરવર જલ તે કાનજી ને પોયણી તે રાધા રે.

આ બાગ ખીલ્યો તે કાનજી ને લ્હેરી જતી તે રાધા રે,
આ પરવત-શિખર કાનજી ને કેડી ચડે તે રાધા રે.
આ નભ o

આ ચાલ્યાં ચરણ તે કાનજી ને પગલી પડે તે રાધા રે,
આ કેશ ગૂંથ્યા તે કાનજી ને સેંથી પૂરી તે રાધા રે.
આ નભ o

આ દીપ જલે તે કાનજી ને આરતી તે રાધા રે,
આ લોચન મારા કાનજી ને નજરું જુએ તે રાધા રે.
આ નભ o

– પ્રિયકાન્ત મણિયાર

સ્વર : હેમા દેસાઇ

સૂના સરવરિયાને કાંઠડે

No Comments

 

સૂના સરવરિયાને કાંઠડે હું બેડલુ મેલીને ન્હાવા ગઇ…
પાછી વળી ત્યારે બેડલુ નઇ… બેડલુ નઇ.. બેડલુ નઇ..

હું તો મનમાં ને મનમાં મુંઝાણી મારી બઇ
શું રે કેવુ મારે માવડીને જઇ..
પાછી વળી ત્યારે બેડલુ નઇ… બેડલુ નઇ.. બેડલુ નઇ..

કેટલુ એ કહ્યું પણ કાળજુ ના કોર્યું
ને ચોરી ચોરીને એણે બેડલુ ચોર્યુ

ખાલીખમ બેડલાથી વળે ના કંઇ
પાછી વળી ત્યારે બેડલુ નઇ… બેડલુ નઇ.. બેડલુ નઇ..

નીતરતી ઓઢણી ને નીતરતી ચોળી
ને બેડલાનો ચોર મારે કેમ લેવો ખોળી

દઇ દે બેડલુ મારુ દલડાને લઇ..
પાછી વળી ત્યારે બેડલુ નઇ… બેડલુ નઇ.. બેડલુ નઇ..

સૂના સરવરિયાને કાંઠડે હું બેડલુ મેલીને ન્હાવા ગઇ…
પાછી વળી ત્યારે બેડલુ નઇ… બેડલુ નઇ.. બેડલુ નઇ..

  • અવિનાશ વ્યાસ

સ્વર : ઐશ્વર્યા મજુમદાર
સ્વરાંકન : ગૌરાંગ વ્યાસ

મધદરિયેથી શાંત થઈને ચાલ્યું આવે મોજું,

No Comments

 

મધદરિયેથી શાંત થઈને ચાલ્યું આવે મોજું,
જોઈ કિનારો દોડે ભેટવા, ગાંડું થઈને મોજું.

થનગનતા યૌવન શું મોજું, મનગમતા પ્રીતમ શું મોજું,
અંગઅંગ ભીંજાવી જાણે હાથ ખેંચતું મોજું.

રીઝે તો એ ગેલ કરે, વિફરે તો એ જાન લઈ લે,
મૂંઝાવી માનવના મનને, ખુદ મલકાતું મોજું.

ના દીવાદાંડીની જરૂરત, ના હોડી ના નાવિકની,
આંખું મિંચી, ઘૂંઘટો ખેંચી, દોડી આવે મોજું.

સાંજે સોનેરી, રાતે રૂપેરી રંગ સજીને,
પરોઢિયે આળસ મરડીને બેઠું થાતું મોજું.

કાળમીંઢ પથ્થરને ભેટે, રૂપેરી રેતીને ભેટે,
સૌને સરખું વહાલ કરતું, ઈશ્વર જેવું મોજું.

  • જયસુખ પારેખ સ્વર : સ્તુતિ જાની

સ્વરાંકન : નિરવ પારેખ

વ્હાલમને મારા વરસાદ નથી ગમતો

No Comments

 

વ્હાલમને મારા વરસાદ નથી ગમતો
એનું કારણ પૂછું તો કહે તું,
વરસે વરસાદને મળવા ન જાઉં તોયે
એકાંતે તરસું છું હું.

ઉંબર ઉંચેરા લાગે છોકરીની જાતને
સમજે નહીં વ્હાલમજી વહેવારૂ વાતને,
મારે વ્હાલમને કહેવું રે શું?
એકાંતે તરસું છું હું.

વાદળ ના હોય તોય કોરી ક્યાં જાઉં છું
મળવા આવું છું ત્યારે હું યે ભીંજાઉ છું,
મારે કરવું તો કરવું યે શું?
એકાંતે તરસું છું હું.

મળવા આવું ને પછી વરસે વરસાદ જો
પાછા જવાનું મને આવે ના યાદ તો,
કોઈ ગમતું મળે તો કરું શું?
એકાંતે તરસું છું હું.

– તુષાર શુક્લ

સ્વર : નિશા કાપડિયા
સ્વરાંકન : કમલ ત્રિવેદી

એક પરબ પ્રેમની ખોલવાનો

No Comments

 

એક પરબ પ્રેમની ખોલવાનો, જો કદો હું વિધાતા થવાનો,
કોઈ તરસ્યો ન પાછો જવાનો, જો કદી હું વિધાતા થવાનો.

વહાલું જે હોય તે સૌને મળરો, કોઈને જોઈ કોઈ ન જલશે,
ને નહીં હોય વચ્ચમાં જમાનો, જો કદી હું વિધાતા થવાનો.

રહેશે ખ્વાહિરા કોઈ ન અધૂરી, આંખ મીંચે ને થાશે એ પૂરી,
એવો ઇલમ બધાને મળવાનો, જો કદી હું વિધાતા થવાનો.

જાન લેશે ન કોઈ કોઈની, જાન દેશે બધા ત્યાં બધાને,
આદમી હર ખુદા ત્યાં થવાનો, જો કદી હું વિધાતા થવાનો.

સૌ મહોબ્બતની કરશેઉજાણી,રહેશેનફરતબધાથીઅજાણી
હરઘડી પ્યાર પેદા થવાનો, જો કદી હું વિધાતા થવાનો.

પ્રેમ ઈશ્વર, જીવન ને ચલણ હો એક એવી વસાહત હશે ત્યાં,
ખુદ ખુદા પ્રેમ ને પૂજવાનો, જો કદી હું વિધાતા થવાનો.

  • જયસુખ પારેખ

સ્વર : મિહીર જાની
સ્વરાંકન : નિરવ પારેખ

વૃંદાવન વાટ સખી જાતાં ડર લાગે

No Comments

 

વૃંદાવન વાટ સખી જાતાં ડર લાગે,
કાંકરી ઉછાળી ઉભો વનમાળી,
કેમ જાવું પાણી જમુનાને ઘાટ સખી,
જાતાં ડર લાગે…..


જવું ‘તું ઘાટ પર આજે અકેલામાં સમય ખોળી,
અને મસ્તીભરી હસતી સખી નીસરી ટોળી;
ભર્યા ના નીર જીવનમાં, ઉરે ઝરતી રહી હોળી,
સદાની ખાલી ગાગર લઈ પાછી વળી ભોળી.
લખ્યું હશે એવું વીધીએ લલાટે સખી,
જાતાં ડર લાગે…..

  • નીનુ મઝમુદાર

સ્વર: દિપ્તી દેસાઈ

સૌજન્ય : તુલસીભાઈ સંકડેચા ( વલસાડ )

ટેરવાં ની જેમ જરા દુર

No Comments

 

ટેરવાં ની જેમ જરા દુર, અને આપણે આંગળી ના મૂળ જેમ ભેળાં , ગોરાંદે
ભોં માં હથેળીયું ની ભેળાં …
ટેરવાં ની જેમ જરા દુર……

કિકી ના કુવા માં, ઘૂ ઘૂ ઘૂ ઘૂઘવાતો, ભમ્મરિયો આપણો મુકામ,…
રેખા વિના ની મારી ખાલી હથેળીયું માં, લિપી વિના નું તારું નામ ..
એનઘેન આંખો માં સપનાંઓ ઉમટે છે, વહી જતાં લાગણી ના ભેળાં …
ગોરાંદે …
ભોં માં હથેળીયું ની ભેલા..
ટેરવાં ની જેમ જરા દુર ….

અલ્લડતા ઓઢી ને, ‘હોવા’ ના ગામ માં, નામ ઠામ હારી ને ફરીએ ..
રોમ રોમ ખીલેલાં , સ્મરણો નાં ખેતર માં, ચોર થઇ સ્પર્શો ને ચરીયે,…
આસોપાલવ સમી લાગણીઓ ઉજવે છે, ભીનાં સંભારણા નાં ચેડાં ….
ગોરાંદે …
ભોં માં હથેળીયું ની ભેળાં ..
ટેરવાં ની જેમ જરા દુર, અને આપણે આંગળી નાં મૂળ જેમ ભેળાં , ગોરાંદે ભોં માં હથેળીયું ની ભેળાં …

  • રમણીક સોમેશ્વર અને વંચિત કુકમાવાળા

સ્વર : અનિલ ધોળકિયા ..
સ્વરાંકન : શ્રી અનિલ વોરા

Older Entries

Contact Us On WhatsApp @Amit Trivedi