ફાગણનો ફાગ અને ટહુકાનો સાદ
Mar 08
ગીત Comments Off on ફાગણનો ફાગ અને ટહુકાનો સાદ
ફાગણનો ફાગ અને ટહુકાનો સાદ
પછી મલક્યા વિના તે કેમ રહીએ
કામણ કીધાં છે અહીં કેસુડે એવાં
કે મહેક્યા વિના તે કેમ રહીએ
ફૂલની ફોરમની પકડીને આંગળી
ફરવાને નીકળ્યો પવન
પાન-પાન ડાળ-ડાળ ઝૂમી ઊઠ્યાંને
ઝૂમે રે આખું ઉપવન
કલરવની કેડીએ રમતા પતંગિયાંને
પકડ્યા વિના તે કેમ રહીએ
ફાગણનો ફાગ અને ટહુકાનો સાદ
પછી મહેક્યા વિના તે કેમ રહીએ….
મઘમઘતી મંજરીને કાયા બદલાઈ
સાંભળીને વેણુ વસંતની
લીલેરા પાન સંગ ગાતાં ગુલમોર
લહાણી કરે છે સુગંધની
અરધી ભરાય મારા ઉમંગની હેલ
પછી છલક્યા વિના તે કેમ રહીએ
કામણ કીધાં છે અહીં કેસુડે એવાં કેે મહેક્યા વિના તે કેમ રહીએ
સ્વર-સંગીત: પુરુષોત્તમ ઉપાધ્યાય