રમતથી જે ડરે છે
Jun 04
ગઝલ Comments Off on રમતથી જે ડરે છે
રમતથી જે ડરે છે એના ભયના કેન્દ્રમાં શું છે?
રમતમાં જીતનારાના વિજયના કેન્દ્રમાં શું છે?
અવાજો નાદ ને શબ્દો બધાથી થૈ ગયા માયૂસ;
હવે તો મૌનને પૂછો કે લયના કેન્દ્રમાં શું છે ?
બિચારી વાત તો જીભે જ આવીને ઠરી ગઈ’તી;
અને સૌ જાણવા માંડ્યા વિષયના કેન્દ્રમાં શું છે ?
ધબકતું લોહી ને શ્વાસો ઢળીને સાંજ થાશે, ને –
તને તરત જ ખબર પડેશે હૃદયના કેન્દ્રમાં શું છે?
ભલેને અસ્ત સૂરજનો તને આંખો જ સમજાવે;
તને સપનું જ કે’શે કે ઉદયના કેન્દ્રમાં શું છે?
અહીં બે માણસો જીવે બનાવી વિશ્વને વર્તુળ;
પરંતુ બેઉ ના જાણે ઉભયના કેન્દ્રમાં શું છે ?
મને આ ઝાડ, ચકલી, વ્યોમ સઘળું વ્યર્થ લાગે છે;
મને હે દ્રોણ! સમજાવો સમયના કેન્દ્રમાં શું છે?
-અશરફ ડબાવાલા
સ્વર : શ્યામલ સૌમિલ મુનશી
સ્વરાંકન : શ્યામલ સૌમિલ મુનશી