હાથમાં કારોબાર રાખ્યો તેં
Jul 07
ગઝલ Comments Off on હાથમાં કારોબાર રાખ્યો તેં
હાથમાં કારોબાર રાખ્યો તેં,
ને મને બારોબાર રાખ્યો તેં.
એક ડગ છૂટથી ભરી ન શકું,
ખીણની ધારોધાર રાખ્યો તેં.
આંખમાં દઇ નિરાંતનું સપનું,
દોડતો મારોમાર રાખ્યો તેં.
કોણ છું કોઇ દિ’ કળી ન શકું,
ભેદ પણ ભારોભાર રાખ્યો તેં.
શ્વાસ સાથે જ ઉચ્છવાસ દીધા,
મોતની હારોહાર રાખ્યો તેં.
-મનોજ ખંડેરિયા
સ્વરઃ શ્યામલ સૌમિલ મુનશી
સ્વરાંકનઃ શ્યામલ સૌમિલ મુનશી