ગુજરાતી સાહિત્ય

તે પૂછયો તો પ્રેમનો મર્મ
અને હું દઈ બેઠા આલિંગન
જ્યાં પ્રથમ મેઘ વરસ્યો
સરિતાએ તોડ્યા તટનાં બંધન

એક અગોચર ઇજન દીઠું નયન ભૂમિને પ્રાંગણ
હું સઘળી મોસમમાં માણું એક અહર્નિશ ફાગણ
શતદલ ખીલ્યા કામ્ય કમલ પર
સૌમ્ય ગીતનું ગુંજન..

નીલવર્ણનું અંબર એમાં સોનલવર્ણી ટીપકી
વીધી શ્યામલ ઘટા પલકને અંતર વીજળી ઝબકી
નયન ઉપર બે હોઠ આંકતાં
અજબ નેહનું અંજન……

-હરિન્દ્ર દવે

સ્વર : આનંદકુમાર સી.
સ્વરાંકન : ક્ષેમુ દિવેટિયા