ગુજરાતી સાહિત્ય

કચક્કડાની ચૂડી રે મારું કૂણું માખણ કાંડું.
સૈયર શું કરીએ?

ફળિયે રોપ્યો લીંબુડીનો કાચો છોડ કાચો છોડ
કાચો રે પડછાયો એમાં
તકલાદી થડ ફરે,
ખડખડ કરતું પડે પાંદડું
ભણકારા અવતરે;

ખરબચડી કેડી પર પાની પરવાળાની માંડું.
સૈયર શું કરીએ?

અડધે મારગ ઠેબે આવ્યું રાતું ફૂલ રાતું ફૂલ
રાતું રે અજવાળું એમાં
લીલો સૂરજ તરે,

પડતર પાંપણના તોરણથી
ખરખર નીંદર ખરે;

સપનાનું સાંબેલું લઇને ઉજાગરાને ખાંડું.
સૈયર શું કરીએ?

– વિનોદ જોશી

સ્વર : વિભા દેસાઈ
સ્વરાંકનઃ ગૌરાંગ વ્યાસ

સૌજન્ય : સંજય રાઠોડ સુરત