પ્રેમ કરું છું હું તને પ્રેમ કરું છું

No Comments

પ્રેમ કરું છું, હું તને પ્રેમ કરું છું,
જાણું નહીં કે કેટલો ને કેમ કરું છું.

વધતો રહે છે, સહેજ પણ ઘટતો નથી કદી
છલકાતો જાય છે, હું જેમ જેમ કરું છું.
હું તને પ્રેમ કરું છું..

દિવસો વીતી રહે છે તને જોઈ જોઈને,
રાતો પસાર હું જેમ-તેમ કરું છું.
હું તને પ્રેમ કરું છું..

ખીલતો રહું છું હુંય ને ખૂલતો જઉં છું હું,
ગમતું રહે છે જેમ તને હું તેમ કરું છું.
હું તને પ્રેમ કરું છું..

ભૂલીને ઘાટ જૂજવા એકાંતની ક્ષણે,
ઓગાળી એને હેમનું હું હેમ કરું છું.
હું તને પ્રેમ કરું છું..

– તુષાર શુક્લ

સ્વર : નયન પંચોલી
સ્વરાંકન : નયન પંચોલી

આમ સંકોચાય છે એ કોણ છે

No Comments

આમ સંકોચાય છે એ કોણ છે?
કટકા કટકા થાય છે એ કોણ છે?

પૂછવા ક્યાં જાય છે એ કોણ છે?
એને પૂછતાં શું થાય છે એ કોણ છે?

પૂછીએ ક્યાં ચાલ સ્પર્શી જોઈએ,
સ્પર્શથી ગભરાય છે એ કોણ છે?

પ્રેમથી જે પાય છે પી જાવું છું,
રામ જાણી પાય છે એ કોણ છે?

એજ છે નિશંક ‘ઘાયલ’ એજ છે,
ઝૂમતા જે જાય છે એ કોણ છે?

– અમૃત ‘ઘાયલ’

સ્વર: નયન પંચોલી
સ્વરાંકન : નયન પંચોલી

વાદળ વરસાદ અને વ્હાલપ ને….

No Comments

વાદળ વરસાદ અને વ્હાલપ ને વ્હાલમાં ભીંજવવું એમનો સ્વભાવ
આષાઢી ઈજન દઈ બોલાવે બહાર મને કહેતા અગાસીમાં આવ
મારે કેમ કરી કહેવું કે જાવ

ભીંના ઈશારે એ બોલાવે તો ય હું તો જોઈ લઉં બારીની બહાર
આંખોથી ચોકી દે ઉંબર પર રોકી છો ખુલ્લા હો ઘર કેરા દ્વાર
તરસી હું તડપું કોરી ધાકોર બહાર લૂંટાતો લાખેરો લાલ મારે કેમ કરી કહેવું કે જાવ

બંધ કરું બારી કે ભીડી દઉં બારણા તો આંખો માં વરસે ચોધાર
ભીંતો ને તોડીને વહી આવે આમ એવો છેડયો છે એણે મલ્હાર

-તુષાર શુક્લ

સ્વર : નયન પંચોલી
સ્વરાંકન : નયન પંચોલી

હવે મંદિરના બારણા ઉઘાડો

No Comments

હવે મંદિરના બારણા ઉઘાડો મોરી માત
ગગન કેરે ઘાટ આવી નોરતાની રાત

ચંદ્રમાનું ચંદન અને સૂરજનું કંકુ
આસમાની ઓઢણીમાં ટપકીયાળી ભાત
ગગન કેરે ઘાટ આવી નોરતાની રાત

કે નભના તારલિયા તારી આરતી ઉતારે
ને સમીરની શરણાઇ ગાઇ તુજને સત્કારે
આજે માવડીના મિલનની જાગ્યું અભિરાત
ગગન કેરે ઘાટ આવી નોરતાની રાત

– અવિનાશ વ્યાસ

સ્વર : પુરૂષોત્તમ ઉપાધ્યાય
સ્વરાંકન : પુરૂષોત્તમ ઉપાધ્યાય

આજ મારું મન માને ન માને…

No Comments

આજ મારું મન માને ના માને ના

કેમ કરી એને સમજાવું
આમ ને તેમ ઘણુંય રીઝાવું
રેઢું મૂકી આગળ શેં જાવું

વાત મારી લે કાને ના કાને ના
આજ મારું મન માને ના માને ના

ચાલ પણે છે કોકીલ-સારસ
આવ અહીં છે મીઠી હસાહસ
દોડ ત્યાં લૂંટીએ સાહસનો રસ

સમજતું કોઈ બહાને ના બહાને ના
આજ મારું મન માને ના માને ના

ના થઈએ પ્રિય છેક જ આળા
છે જગ-મંડપ કૈંક રસાળા
એ તો જપે બસ એકજ માળા

તું કેમ મળતો હવે ના હવે ના
આજ મારું મન માને ના માને ના

કેમ કરી એને સમજાવું
આમ ને તેમ ઘણુંય રીઝાવું
રેઢું મૂકી આગળ શેં જાવું

વાત મારી લે કાને ના કાને ના
આજ મારું મન માને ના માને ના

આજ મારું મન માને ના માને ના

-ઉમાશંકર જોશી

સ્વર : ગાર્ગી વોરા
સ્વરાંકન : અમર ભટ્ટ

રોનક છે એટલે કે બધે

No Comments

રોનક છે એટલે કે બધે તારું સ્થાન છે,
નહિંતર આ ચૌદે લોક તો સૂનાં મકાન છે…

દીવાનગીએ હદ કરી તારા ગયા પછી,
પૂછું છું હર મકાન પર, કોનું મકાન છે?

દિલ જેવી બીજે ક્યાંય પણ સગવડ નહીં મળે,
આવી શકે તો આવ, આ ખાલી મકાન છે…

થાશે તકાદો એટલે ખાલી કરી જશું,
કીધો છે જેમાં વાસ, પરાયું મકાન છે…

બાળે તો બાળવા દો, કોઈ બોલશો નહી,
નુકસાનમાં છે એ જ કે એનું મકાન છે…

કોને ખબર ઓ દિલ, કે એ ક્યારે ધસી પડે,
દુનિયાથી દૂર ચાલ કે જૂનું મકાન છે…

એને ફનાનું પૂર ડૂબાડી નહીં શકે,
જીવન એટલું ઊંચું મકાન છે…

– અમર પાલનપુરી

સ્વર : પુરૂષોત્તમ ઉપાધ્યાય

Contact Us On WhatsApp @Amit Trivedi