અર્થના કુંડાળાંમાં અટવાય છે
Apr 02
ગઝલ Comments Off on અર્થના કુંડાળાંમાં અટવાય છે
અર્થના કુંડાળાંમાં અટવાય છે.mp3
અર્થના કુંડાળાંમાં અટવાય છે,
શબ્દ રોજેરોજ ગોથાં ખાય છે.
જે ખરેખર બ્હારથી દેખાય છે,
એ કશે ના હોય છે, ના થાય છે.
તું કહે છે એટલે માની લઉં,
તું કહે છે એ હંમેશા થાય છે.
કોણ જાણે શું હવે દઈને જશે?
આ દશા સુખ-ચેન તો લઈ જાય છે.
આંસુઓએ બેધડક પૂછી લીધું!
એ જ રસ્તે કાં ફરીથી જાય છે?
બહુ ભરોસો રાખશો ના વાત પર,
જિંદગી નામે અહીં અફવા ય છે.
આવવા જેવું જ ન્હોતું અહીં સુધી,
એ અહીં આવ્યા પછી સમજાય છે.
હું બીજું તો શું કહું એના વિશે?
ખોટ છે, ને ખોટ તો વરતાય છે.
-હિમલ પંડ્યા
સ્વરઃ અનંત વ્યાસ
સ્વરાંકન : અનંત વ્યાસ