ધીરે ધીરે ધીરે ધીરે વાય પવન જો
Jun 03
ગીત Comments Off on ધીરે ધીરે ધીરે ધીરે વાય પવન જો
ધીરે ધીરે ધીરે ધીરે વાય પવન જો
ધીમે ધીમે ધીમે ધીમે ગાય ગગન જો
તું જો નહીં આવે સજના
સૂનું સૂનું લાગે સજના
ભીતરમાં છલકાતી લાગણીઓને સથવારે હું
પતિંગીયાની પાંખો પહેરી ફૂલો પર મંડરાવું
સૂર્યકિરણને સેંથે પૂરી મેઘધનું આકારું
દરિયાની લ્હેરો ઉપર હું નામ લખી લઉં તારું
હું તડપતી રેત બનું ને તું ભીનું આકાશ થાને
તું જો નહીં આવે સજના
સૂનું સૂનું લાગે સજના
સાજ નથી સરગમ નથી પણ તુજ સંગે મારે ગાવું
ભીના ભીના શમણાં લઇને તારે દ્વારે આવું
રીમઝીમ હેલી થઇને હું તુજ મનમંદિર સજાવું
વરસાદી ફોરાંના ફૂલો તુજ પર હું વરસાવું
ચાલને હું તું છોડી એક બીજામાં ભળીએ
તું જો નહીં આવે સજના
સૂનું સૂનું લાગે સજના
ધીરે ધીરે ધીરે ધીરે વાય પવન જો
ધીમે ધીમે ધીમે ધીમે ગાય ગગન જો
-પ્રજ્ઞા વશી
સ્વર: પાર્થિવ ગોહિલ, દ્રવિતા ચોકસી
સંગીત : મેહુલ સુરતી