એટલું ટપકાવવાનું નોંધમાં
Aug 10
ગઝલ Comments Off on એટલું ટપકાવવાનું નોંધમાં
એટલું ટપકાવવાનું નોંધમાં,
સુખ નથી મળતું, નકામું શોધ માં.
સાવ સાચો હું મને લાગ્યા કરું,
હોય છે જ્યારે બધા વિરોધમાં.
એક સમજણ આજ લગ સાથે હતી,
એ ય વહી ગઈ લાગણીના ધોધમાં.
પ્રેમ કે આદર ન સ્પર્શે જેમને,
છોડ, તું એને કશું સંબોધ મા.
આચરણથી એ ગળે ઊતરી જશે,
જે નથી શીખવી શકાયું બોધમાં.
ખૂબ ઝડપી દોડ થાતી જાય છે,
જ્યારથી દુનિયા ખડી અવરોધમાં.
: હિમલ પંડ્યા
સ્વરઃ ડો ભરત પટેલ
સ્વરાંકન : ડો ભરત પટેલ