મને કૈક એવા તો મિત્રો મળ્યા છે
Feb 22
ગઝલ Comments Off on મને કૈક એવા તો મિત્રો મળ્યા છે
મને કૈક એવા તો મિત્રો મળ્યા છે,
મને છાંય દેવા એ તડકે બળ્યા છે.
તિમિરને સદાકાળ હદપાર રાખ્યું.
થઈ મીણબત્તી એ સદા ઓગળ્યા છે.
કો પાણીકળા-શી નજર એમની છે,
છુપાવ્યાં જે આંસુ તે પળમાં કળ્યાં છે.
ભલે જીભથી એ છે કડવા છતાં પણ,
ખબર છે મને એ ભીતરથી ગળ્યા છે.
ગયા ભવ હશે આંસુ લૂક્યાં કોઈનાં,
મને મિત્ર થઈ આ ભવે એ ફળ્યાં છે.
-કિશોર બારોટ
સ્વર : અરવિંદ ગોસ્વામી
સ્વરાંકન : અરવિંદ ગોસ્વામી